Балкан

За недела дена три ликвидации во балканскиот криминален судир – Шкалјарци и Кавчани зад новиот бран насилство?

Во само една недела, три лица беа убиени во пресметки што, според безбедносни извори, се последица на обновеното насилство помеѓу двата озлогласени криминални клана од Котор – Шкалјарскиот и Кавчкиот. Последните ликвидации се случија во Црна Гора и Шпанија, а сите жртви се поврзуваат со споменатите групи.

На 16 јули во Подгорица беше убиен Игор Недовиќ, за кого се верува дека во минатото му припаѓал на Шкалјарскиот клан, но подоцна се приклучил кон Кавчаните. Само три дена подоцна, во саботата на 19 јули, во локал во центарот на Подгорица беше ликвидиран Иван Милачиќ, кој, според локалните медиуми, бил близок до Шкалјарците. Во нападот е ранет и едно друго лице.

Паралелно, во Барселона беше убиен Филип Кнежевиќ од Цетиње, исто така поврзан со Кавчаните. Напаѓачот го пресретнал пред влезот на станбена зграда и испукал повеќе куршуми, по што избегал. Шпанските власти сè уште не доставиле официјално известување за настанот, но црногорската полиција сомничи дека се работи за продолжение на меѓуклановски одмазди.

– Иницијалната каписла за последните убиства дојде од Шпанија. Според нашите сознанија, ова е одмазда за стари крвни долгови – изјави директорот на црногорската полиција Лазар Шќепановиќ на прес-конференција.

Кнежевиќ се поврзува со ликвидацијата на шкалјарските водачи Алан Кожар и Дамир Хаџиќ во Грција во 2020 година, што дополнително го зацврстува сомнежот дека се работи за брутална одмазда.

Судирот меѓу Шкалјарци и Кавчани трае од 2014 година, кога исчезна пратка од 200 килограми кокаин во Валенсија. Од тогаш, борбата за доминација во балканскиот подземен свет не престанува, и досега се евидентирани над 70 ликвидации поврзани со двата табора.

Црногорската полиција денес предупредува дека во земјата активно дејствуваат 11 организирани криминални групи, од кои двете најголеми – поврзани со Шкалјарскиот и Кавчкиот клан – имаат над 300 членови. Безбедносните власти најавуваат засилен одговор на новиот бран насилство.

Балкан

Пијан возач фатен со 200 км/ч

Припадници на Министерството за внатрешни работи на Србија денес околу 14 часот го запреа Д.В. (39) во Лозница, кој управуваше возило „суди“ со брзина од 200,8 километри на час на дел од патот Лозница – Шабац, каде што ограничувањето е 100 км/ч.

Со алкотестирање е утврдено дека возачот бил во тешка алкохолна интоксикација, со 1,41 промили алкохол во крвта.

Возачот веднаш бил исклучен од сообраќај и задржан во службените простории, а против него е поднесена прекршочна пријава за насилно возење и возење под дејство на алкохол.

Балкан

Вучиќ: Србија има гориво до 15 јануари

Српскиот претседател Александар Вучиќ увери дека Србија има обезбедено доволно керозин, мазут, дизел и бензин најмалку до 15 јануари, а можеби и до 25 јануари, обидувајќи се да ги смири граѓаните по информациите за проблеми во нафтената индустрија.

Иако државата веќе 70 дена функционира без увоз на нафта, Вучиќ истакна дека енергетскиот систем е стабилен и дека нема причина за паника пред претстојните празници. Тој сепак призна дека ситуацијата е комплицирана, особено поради статусот на Нафтната Индустрија Србија (НИС), за што Белград следната недела ќе испрати итни барања до американската канцеларија за контрола на странски средства (ОФАК) за добивање оперативна лиценца.

„Доволно керозин, мазут, дизел и бензин обезбедивме најмалку до 15 јануари, можеби и до 25 јануари. Никој не треба да се грижи, имаме безброј технички проблеми, но државата знае како да ги реши“, рече Вучиќ.

Претседателот потенцираше дека Србија нема да дозволи колапс на енергетскиот сектор и им се заблагодари на граѓаните за поддршката. „Ве уверувам дека ќе имате доволно од сè што е потребно за празниците. Ќе добивате навремени информации за секоја промена“, додаде тој.

Балкан

Тешка несреќа на Дурмитор: Турист загина по пад од жичара, жена тешко повредена

Трагичен инцидент се случи денеска на ски-центарот Савин Кук на Дурмитор, кога две лица – странски туристи – паднале од корпа на ски-лифт, при што едно лице го загуби животот, а друго се здоби со тешки повреди.

Несреќата се случила на жичара број два, во стрмниот втор дел од трасата што води кон Савин Кук. Според првичните информации, загинал маж, додека повредената жена е во свесна состојба и комуникативна.

На терен се ангажирани спасувачки и надлежни служби, кои вршат увид и ја утврдуваат причината за инцидентот. Првичните сознанија укажуваат на можен технички дефект во вториот дел од жичарата, по што корпата во која се наоѓале туристите започнала да се движи наназад.