Балкан

Словенија погодена од силна бура: Ветер кршел дрвја, 6.000 домаќинства без струја

Силна бура проследена со обилни врнежи од дожд, бурен ветер и град го погоди западниот дел на Словенија, движeјќи се кон источниот дел од земјата. Веќе се пријавени значителни штети, а повеќе од 6.000 корисници на „Електро Љубљана“ останаа без електрична енергија.

Агенцијата за животна средина издаде портокалово метео-предупредување за поголемиот дел од земјата, предупредувајќи на опасни временски услови. Најсилно погодени беа Бовец и Кобарид, каде бурата попладнево предизвика штети на имоти и инфраструктура. Бурата потоа се прошири кон Крањ, Камник и главниот град Љубљана.

Во Љубљана, краткотраен пороен дожд и силни ветрови оштетија комерцијални објекти и кршеа гранки и дрвја. Паднати дрвја го отежнаа сообраќајот на автопатите кон Долењска и Приморска, како и на јужната и западната обиколница на градот. Надлежните повикаа на внимателно возење и прилагодување кон временските услови.

Бурниот систем продолжува да се движи кон областа Штаерска, но според метеоролозите, се очекува негово слабеење во текот на вечерта. Според прогнозите, стабилизација на времето се очекува по 21 часот.

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.