Шумските пожари што беснеат во неколку провинции во Турција продолжуваат да предизвикуваат огромни проблеми и загуби. Според објавата на Канцеларијата за управување со катастрофи и вонредни состојби при турското Министерство за внатрешни работи, досега 2.619 лица се евакуирани и преместени во безбедни зони.

Пожарите сè уште горат во провинциите Сакарја, Билеџик, Ескишехир, Афјонкарахисар и Карабук, а гаснењето се одвива од земја и од воздух со вклучување на 4.231 лице, 45 авиони и 1.236 копнени возила.

Генералната дирекција за шумарство информира дека пожарите во Измир (округот Газиемир) и Газиантеп (округот Шехиткамил) се ставени под контрола, како и оние во Мудурну и Бол, но ситуацијата во округот Сејитгази во Ескишехир и Сафранболу во Карабук останува критична.

Трагедијата од вчера е голема — десет пожарникари ги загубија животите додека се обидуваа да го изгаснат огнот во централна Турција, откако силен и изненаден ветер ја промени насоката на пламенот и ги зафати тие што беа заробени.

Состојбата е сериозна, а напорите за гаснење и превенција на нови пожари продолжуваат со полна пареа.