Двајца мажи на возраст од 39 и 31 година се осомничени за брутален напад врз маж кој, според нив, украл лубеници од нива во селото Орешани. Инцидентот се случил на 24 јули, а Основното јавно обвинителство Скопје соопшти дека против нив е поведена истрага за кривично дело – Насилство по член 386 став 6 во врска со став 3 и 1 од Кривичниот законик.

Според информациите, оштетениот со својот автомобил се движел од Петровец кон Таор, кога бил следен од осомничените со товарно возило. Откако влегол во дворот на куќата на својот внук во Орешани, осомничените го стигнале, насилно го извлекле од возилото и започнале да го удираат со тупаници и шамари.

Вториот осомничен дополнително извадил водоводџиски клешти од камионот и продолжил да го удира додека жртвата не паднала во безсознание. Нападнатиот добил тешки телесни повреди и е хоспитализиран на Клиниката за неврохирургија во Скопје, каде се наоѓа во животозагрозувачка состојба.

Сè се случувало пред очите на внукот на оштетениот, кој бил сведок на настанот. Според Обвинителството, нападот предизвикал чувство на страв и загрозеност кај него и пошироката јавност.

Поради тежината на делото и опасноста од бегство или повторување на насилството, јавниот обвинител побара притвор за двајцата осомничени.