Свет

Кремљ повторно се заканува со нуклеарно оружје: Русија губи тактичка предност на Балтикот

Русија повторно ја активира својата реторика за нуклеарна закана, овој пат како одговор на засиленото присуство на НАТО на источниот фронт и најавите од американскиот генерал Кристофер Донахьу дека Алијансата може брзо да неутрализира каква било закана од руската енклава Калининград. Зад овој потег, според анализите, стои нервоза на Кремљ поради губење на единствената вистинска тактичка предност во балтичкиот регион.

На 17 јули беше објавено дека САД и НАТО започнуваат со имплементација на планот „Линија на одвраќање на источниот бок“, насочен кон зајакнување на копнените капацитети и подобрување на одбранбената интероперабилност. Главен фокус е Балтикот, каде што Калининград досега претставуваше силна точка на руското влијание.

Изјавата на генерал Донахьу, дека НАТО може за многу кратко време да одговори на каква било закана од Калининград, предизвика вознемиреност во Москва. Русија со години го претвора овој регион во воено упориште, сметајќи го за стратешки бедем меѓу Литванија и Полска. Но, со новата стратегија на НАТО, таа предност станува несигурна.

Како одговор, Николaj Патрушев, советник на Владимир Путин и поранешен шеф на ФСБ, порача дека секоја воена акција кон Калининград ќе биде возвратена „со сите расположиви средства“, вклучително и нуклеарно оружје, според руската воена доктрина. Оваа ескалација доаѓа во време кога Кремљ се соочува со се поголем притисок на меѓународната сцена, особено поради активностите на други глобални жаришта како Блискиот Исток и Азија, кои ја одвлекуваат вниманието од руската инвазија врз Украина.

Покрај ова, ситуацијата во Русија дополнително се комплицира. Единствениот руски носач на авиони „Адмирал Кузњецов“ се подготвува за повлекување од употреба поради старост и неисплатлива модернизација. Украинските сили, иако без класична морнарица, ѝ нанесоа тешки удари на руската флота во Црното Море со беспилотни пловила, вклучувајќи го и потопувањето на крстосувачот „Москва“.

Сето ова укажува дека вистинската, и единствена реална, воена предност на Русија останува нејзиниот нуклеарен арсенал. Затоа, секоја загуба на тактичка предност, како онаа во Калининград, Кремљ ја компензира со повторни нуклеарни закани.

Свет

Хаос на европските аеродроми по воведувањето на новиот Шенген систем

Воведувањето на Шенген системот за влез и излез (EES) на 12 октомври 2025 година предизвика сериозни проблеми на аеродромите во Европа, при што патниците во периоди на зголемена фреквенција чекаат и до три часа за да поминат гранични контроли, соопшти Европскиот оддел на Меѓународниот совет на аеродроми (ACI).

Оттаму велат дека прогресивното снимање на биометриски податоци и регистрација на државјани од трети земји ја зголемуваат обработката на патниците до 70%, а недостигот на киосци и полициски кадар дополнително ја усложнува ситуацијата. Најзасегнати се аеродромите во Франција, Германија, Грција, Исланд, Италија, Португалија и Шпанија.

ACI повикува Европската комисија, eu-LISA, Фронтекс и земјите-членки итно да преземат мерки или да овозможат поголема флексибилност во примена на системот до целосното воведување. Генералниот директор на ACI EUROPE, Оливие Јанковец, предупредува дека доколку проблемите не се решат пред зголемувањето на прагот за регистрација на 35% од 9 јануари, хаосот на аеродромите ќе се продлабочи, со сериозни последици по безбедноста и оперативноста.

Свет

Украински дронови предизвикаа штета на руската нафтена инфраструктура во Таман

Украински беспилотни летала го погодиле руското пристаниште Таман во Црното Море, при што биле оштетени две пристаништа, еден цевковод за снабдување со мазут и два танкера, соопшти регионалната администрација на Краснодарската област. На едниот танкер избувнал пожар кој веќе е изгаснат, а два резервоари за складирање биле оштетени од падот на остатоци од дрон.

Службите за цивилна заштита информираат дека екипажите на погодените бродови се евакуирани, а пожарите се целосно изгаснати. Пристаништето Таман се смета за клучна точка за испорака на нафта и течен природен гас.

Украина зачестено ги напаѓа руските нафтени и енергетски објекти како дел од својата одбрана од руската инвазија.

Свет

Пентагон алармира: Кина тајно распоредила над 100 нуклеарни ракети – можно воено сценарио за Тајван до 2027

Најнов извештај на Пентагон, сè уште необјавен, открива дека Кина значително го забрзува својот нуклеарен капацитет и не покажува интерес за преговори за контрола на оружјето. Според американските разузнавачи, Пекинг тајно распоредил повеќе од 100 интерконтинентални балистички ракети од типот ДФ-31 во „полиња со силоси“ во близина на границата со Монголија, што им овозможува брзо лансирање во случај на конфликт.

Американскиот претседател Доналд Трамп претходно најави план за денуклеаризација во соработка со Кина и Русија, но извештајот на Пентагон укажува дека Пекинг не покажува сериозен интерес за такви мерки или разговори за контрола на вооружувањето.

Според документот, кинескиот нуклеарен арсенал сè уште брои под 600 боеви глави, но експанзијата продолжува, а до 2030 година се очекува бројката да надмине 1.000. Пентагон истакнува дека клучната година е 2027, кога Кина се проценува дека ќе биде способна да води и да победи во потенцијален конфликт за Тајван.

Стратегијата на Пекинг вклучува удари на далечина од 1.500 до 2.000 наутички милји од кинескиот брег, со што би можело сериозно да се попречи американското воено присуство во Азиско-пацифичкиот регион. Кина засега го застапува ставот дека се придржува до „нуклеарна стратегија на самоодбрана“ и политика на ненапаѓање, додека Пентагон предупредува на зголемената закана за стабилноста во регионот.