Црна Хроника

Кривична за Дехари: Наместо санација – дозволил депонија меѓу куќи во Кичево

Градоначалникот на Кичево, Фатмир Дехари, се соочува со сериозни обвинувања откако против него беше поднесена кривична пријава за „несовесно работење во службата“ и „загрозување на животната средина и природата со отпад“. Според информациите од Одделението за внатрешни работи Кичево, Дехари во изминатите неколку години дозволил да се формира нелегална депонија во населена зона од градот, со што директно го загрозил здравјето на граѓаните.

Од 2020 година наваму, како што наведуваат од полицијата, градоначалникот давал усни и писмени наредби отпадот секојдневно да се одлага на спорната локација – простор од неколку илјади квадратни метри, во близина на станбени објекти. Притоа не биле почитувани ниту еден од еколошките стандарди пропишани со Законот за управување со отпад и Законот за заштита на животната средина.

„Овие постапки доведоа до сериозно нарушување на квалитетот на воздухот, загадување на почвата и водотеците, како и до уништување на животната и растителната разновидност во подрачјето“, соопштуваат од ОВР Кичево.

Полицијата истакнува дека случајот бил темелно документиран по повеќегодишна истрага и теренско следење. Според нив, Дехари не спровел никаков надзор над состојбата, и со тоа овозможил трајно загадување на средината, со потенцијално опасни последици по здравјето на жителите.

Случајот го води надлежното обвинителство, а јавноста очекува понатамошни информации и развој на постапката.

Црна Хроника

Тепачка пред казино во Тетовско

На 17.12.2025 во 11:10 часот во СВР Тетово, Г.С.(25) од с.Волковија пријави дека во казино во Тетово, по претходна расправија, бил физички нападнат од едно лице. Се преземаат мерки за расчистување и документирање на случајот.

Црна Хроника

Уапсени лихвари – Полицијата со детали

Кривична пријава против двајца кавадарчани за сторено кривично дело “лихварство”

ОВР Неготино, до Основното јавно обвинителство Кавадарци, поднесе кривична пријава против Н.С.(59) и Р.С.(34), двајцата од Кавадарци, поради постоење основи на сомнение дека сториле кривично дело „лихварство“ по член 260 од Кривичниот законик. Според пријавнеото, тие во периодот од јуни 2023 до ноември 2025 година на лице од Неготино му давале пари на заем со писмени и усни договори, а за себе договарале несразмерна имотна корист во вкупна вредност од 167.000 денари. за што оштетениот доставил и докази. Со наредба од Основен суд Кавадарци извршен е претрес во нивниот дом и помошни простории, при што се пронајдени и одземени мобилни телефони, а од Н.С. се одземени тефтери со забелешки, по што двајцата се лишени од слобода.

Црна Хроника

Кривична пријава за поранешен градоначалник – МВР со детали

Кривична пријава за „несовесно работење во службата“ и „злоупотреба на службената положба и овластување“ против поранешниот градоначалник на Струмица и двајца вработени во општината

СВР Струмица, до Основното јавно обвинителство Струмица, поднесе кривична пријава против К.К.(35) и Б.Ш.(64), двајцата од Струмица, поради постоење основи на сомнение дека сториле кривично дело „несовесно работење во службата“ и против И.Г.(54) од Струмица поради постоење основи на сомнение дека сторила кривично дело „злоупотреба на службената положба и овластување“.
Пријавената И.Г., во својство на раководител на Одделението за администратирање на приходи при општина Струмица, постапувајќи спротивно на одредбите од Законот за даноците на имот, во четири наврати ги пречекорила своите овластувања со тоа што изготвила решенија за даночно ослободување од данокот на промет на недвижен имот при продажба на станови од станбена куќа со наменска класификација А1. Ваквото ослободување од плаќање било направено повикувајќи се на член 25 од Законот за даноците на имот, меѓутоа одредбите за таквото даночно ослободување се однесувале само за станбени згради и станови кои согласно класата на намени се со номенклатура А2.1, но не и за станбени куќи со номенклатура А1.1, за кои и биле изготвени решенијата. Исто така, И.Г. во три од четирите решенија, во отсуство на пријавениот Б.Ш., се потпишала и во полето Потврдил-контролирал.
Пријавениот Б.Ш., во својство на Раководител на Секторот за финансиски прашања при општина Струмица и пријавениот К.К., во својство на градоначалник на општина Струмица, постапиле несовесно при вршењето на своите службени овластувања и пропуштиле должен надзор при постапувањето по тие предмети и ги потпишале изготвените решенија за даночно ослободување изготвени од И.Г.. Со ваквите дејствија пријавените лица го оштетиле буџетот на општина Струмица за износ од 668.388 денари.