Црна Хроника

Кривична пријава за пожарот во Скопје: Велешани и фирма осомничени за еколошка катастрофа

Секторот за внатрешни работи Скопје поднесе кривична пријава до Основното јавно обвинителство против две физички лица од Велес и едно правно лице со седиште во Шуто Оризари, поради сомнение за сторено кривично дело „загрозување на животната средина и природата со отпад“.

Осомничените М.К. (40) и А.Н. (46), заедно со фирма чие име не се открива, во период од најмалку шест месеци до 9 јули 2025 година, на парцели во сопственост на М.К. во Шуто Оризари, нелегално складирале и транспортирале отпаден материјал без потребните дозволи.

На 9 јули околу 08:45 часот, складираниот отпад се запалил, предизвикувајќи голем пожар со сериозни последици по животната средина. На терен интервенирала и Армијата на Република Северна Македонија, чии специјализирани единици за атомска, биолошка и хемиска одбрана извршиле мерења и констатирале зголемено ниво на загаденост.

Случајот отвора сериозни прашања за контрола и управување со отпадот, особено во урбаните зони, а институциите најавуваат дека истрагата ќе продолжи во насока на утврдување на сите одговорни лица.

Црна Хроника

Жена од Скопје приведена по инцидент со полициски службеници

На 18.12.2025 во 14:20 часот во Скопје, на подрачјето на општина Аеродром, полициски службеници од СВР Скопје ја приведоа Д.Ц.(49) од Скопје, затоа што се однесувала агресивно кон полициски службеници кои вршеле службени дејствија.

По целосно документирање на случајот ќе следува соодветен поднесок.

Црна Хроника

Финансиската полиција поднесе кривична пријава за даночно затајување од речиси 65 милиони денари

Управата за финансиска полиција поднесе кривична пријава против Б.А. и Д.Х., сопственици и управители на АРЃИРА ДООЕЛ Скопје, поради сомнение за сторено кривично дело „Даночно затајување“ според член 279 од Кривичниот законик на Република Северна Македонија.

Првопријавениот Б.А. во периодот 2020 – 2023 година присвоил трговска стока – златен накит во вредност од 197.742.227 денари, при што не пресметал и не уплатил ДДВ во износ од 35.593.601 денар и данок на личен доход од 21.969.161 денар, предизвикувајќи штета на државниот буџет од 57.562.762 денари.

Второпријавениот Д.Х. во 2024 година присвоил дел од увезената стока – златен накит и необработено сребро во вкупна вредност од 22.659.754 денари, избегнувајќи да пријави и уплати ДДВ од 4.551.963 денари и данок на личен доход од 2.809.573 денари, со што државата е оштетена за 7.361.536 денари.

Со овие дејствија, пријавените се стекнале со противправна имотна корист и ја оштетиле државата за вкупно 64.924.298 денари во периодот 2020 – 2024 година.

Финансиската полиција истакнува дека случајот е предаден на Основното јавно обвинителство – Скопје за понатамошно постапување.

Црна Хроника

Тепачка во Швајцарија: Уапсени шест лица, меѓу нив и двајца малолетници од Македонија

Шест лица, меѓу кои и двајца малолетници од Северна Македонија, се уапсени по физичка пресметка што се случила во вторникот вечерта во градот Винтертур, Швајцарија.

Инцидентот се случил во населбата Винтертур-Сенхоф и бил пријавен нешто пред 21 часот, откако полицијата добила дојава за лице кое лежи на земја со повреди на главата. По пристигнувањето на терен, полициските патроли затекнале повеќе лица вклучени во пресметката.

Според првичните информации од истрагата, настанот бил претходен од жестока вербална расправија која ескалирала во физичка тепачка, при што бил употребен и бибер-спреј. Во инцидентот биле повредени три лица – државјани на Сирија на возраст од 48, 18 и 17 години, кои со возило на итна медицинска помош биле пренесени во болница.

Повреди заработил и 15-годишен тинејџер од Северна Македонија, кој, според полициските информации, сам се упатил на лекарски преглед.

Полицијата привела и испрашала вкупно шест лица инволвирани во настанот. Меѓу нив се тројцата повредени државјани на Сирија, двајца малолетници од Северна Македонија на возраст од 15 и 17 години, како и 16-годишен швајцарски државјанин.

Сите учесници ќе бидат процесуирани од надлежните институции, при што малолетните лица ќе одговараат пред Обвинителството за малолетници, а полнолетните пред Јавното обвинителство.