Економија

ФЕД повторно против Трамп: Каматните стапки остануваат исти, и покрај притисоците од Белата куќа

Федералните резерви на САД одлучија по петти пат по ред да ги задржат каматните стапки на исто ниво, и покрај интензивниот притисок од претседателот Доналд Трамп и неговите сојузници за нивно намалување. Референтната каматна стапка останува во опсег од 4,25 до 4,5 проценти, ниво кое е непроменето од декември минатата година, јавува CNN.

Одлуката, која не беше едногласна, покажа длабоки поделби во раководството на ФЕД. Комитетот за отворен пазар гласаше со 9-2 за задржување на стапките, а несогласување изразија гувернерите Мишел Боуман и Кристофер Волер, кои сметаат дека инфлацијата е веќе под контрола и дека ФЕД треба да започне со намалување на каматите.

Ова е првпат од крајот на 1993 година повеќе од еден гувернер да гласа против ваква монетарна одлука, што укажува на растечка несигурност околу идниот правец на економската политика.

Во соопштението по состанокот, ФЕД наведува дека растот на економската активност се забавил во првата половина од годината, додека пазарот на трудот и натаму е солиден, а инфлацијата останува покачена. Централната банка нагласува дека ќе продолжи да ја следи економската состојба, пред сè во контекст на царинската политика на Трамп и нејзиното влијание врз цените.

Претседателот на ФЕД, Џером Пауел, изјави дека моменталната економска сила на САД овозможува задржување на стабилни стапки, но додаде дека нејаснотиите околу ефектите од трговската политика на Трамп сè уште се големи.

„Почнуваме да гледаме влијание на повисоките царини врз цените на одредени производи, но сè уште не е јасно каков ќе биде нивниот севкупен ефект врз инфлацијата и економската активност“, рече Пауел. Тој додаде дека краткорочните ефекти се можни, но не е исклучено да се појават и подолготрајни инфлаторни притисоци.

И покрај постојаните напади од Белата куќа и реториката на Трамп, ФЕД останува на својата стратегија „почекај и види“, инсистирајќи дека стабилноста и анализата на податоците се клучни во носењето на идните одлуки.

Економија

МБИ10 со пад од 0,42%, вкупен промет од 75,7 милиони денари

Изготвен од Илирика Инвестментс АД Скопје врз основа на официјални податоци од Македонска берза.

На берзанската сесија од 23 декември 2025 година, индексот МБИ10 забележа пад од 0,42%, спуштајќи се на 10.071,87 поени, додека индексот ОМБ остана непроменет на 129,44 поени. Вкупниот дневен промет изнесуваше 75,7 милиони денари, при што активноста беше концентрирана кај Комерцијална банка, Алкалоид и Македонски Телеком, кои придонесоа за најголемиот дел од реализираниот обем на тргување.

Најтргувани хартии од вредност

● Комерцијална банка АД Скопје (KMB) – 61.096.000 денари (вклучува блок-зделка)

● Алкалоид АД Скопје (ALK) – 2.054.570 денари

● Македонски Телеком АД Скопје (TEL) – 4.830.000 денари

Топ добитници

● Комерцијална банка АД Скопје (KMB) +0,02%

Топ губитници

● Алкалоид АД Скопје (ALK) –0,06%

● Стопанска банка АД Скопје (STB) –2,98%

● Македонски Телеком АД Скопје (TEL) –2,74%

Обврзнички пазар

На денешната сесија беше реализирана една трансакција со државната обврзница „Р. Македонија – денационализација 22“, во износ од 318.930 денари по цена од 94 евра. Сите други државни и корпоративни обврзници останаа без промени во цените, при што индексот ОМБ остана стабилен на 129,44 поени.

На берзанската сесија од 23 декември 2025 година, пазарот беше активен, со висок вкупен промет од 75,7 милиони денари, главно поради блок-зделката со акциите на Комерцијална банка. Индексот МБИ10 забележа пад од 0,42%, поттикнат од негативните движења кај Македонски Телеком, Стопанска банка и Алкалоид, додека Комерцијална банка и покрај минималниот раст остана најликвидна хартиија од вредност. Обврзничкиот пазар беше слабo активен, со една реализирана трансакција и непроменет индекс ОМБ.

Економија

Бислимовски потврдува: Струјата поскапува

По барање на „ЕВН Хоум“, Регулаторната комисија за енергетика (РКЕ) донесе одлука за поскапување на електричната енергија. Според прес-конференцијата на претседателот на РКЕ, Марко Бислимовски, за првиот тарифен блок цената ќе расте за 2,45%, вториот блок за 2,87%, третиот за 3,33%, а четвртиот блок дури за 3,84%.

За евтината тарифа, РКЕ одлучи зголемување од 2,5%.

Бислимовски истакна дека одлуката е донесена по внимателна анализа и се однесува на сите домаќинства, со цел да се усогласат трошоците на електричната енергија со пазарните услови.

Економија

Домашните компании добиваат нова инјекција: 14,2 милиони евра веќе стигнаа до Развојната банка

Министерството за финансии соопшти дека од Буџетот се извршени две нови исплати кон Развојната банка, во вредност од 305 и 568 милиони денари, односно вкупно 873 милиони денари, што изнесува околу 14,2 милиони евра.

Со овие трансакции, вкупната државна поддршка за домашната економија достигна 217,5 милиони евра, од вкупно планираните 250 милиони евра.

Средствата се обезбедени преку кредитна линија од унгарската Експорт-импорт банка, а целта е да се стимулира растот на домашните компании преку поволни услови за инвестирање и развој. Финансирањето се одобрува преку деловните банки, со каматна стапка од 1,95% годишно, рок на отплата до 15 години и грејс период до 3 години.

Министерството за финансии истакнува дека вкупниот буџет за поддршка на домашните компании изнесува 250 милиони евра, додека проценетата вредност на инвестицискиот циклус изнесува околу 300 милиони евра.