Република

Коњановски потпиша договор за подобрување на ефикасноста на „Водовод“ Битола

Градоначалникот на Битола, Тони Коњановски, и директорот на ЈКП „Водовод“, Андреј Гинов, денес во Министерството за животна средина и просторно планирање потпишаа договор за техничка и финансиска поддршка на битолското комунално претпријатие, како дел од проектот „Отпорни и ефикасни комунални претпријатија“.

Проектот се реализира во соработка со Владата на Швајцарската Конфедерација преку Државниот секретаријат за економски прашања (SECO), и има за цел да ја зајакне отпорноста и енергетската ефикасност на јавните комунални претпријатија, особено во услови на климатски предизвици и енергетски кризи.

„Оваа поддршка претставува значаен чекор во подобрување на работните перформанси на ‘Водовод’, како и во модернизацијата на инфраструктурата која е клучна за квалитетно и стабилно водоснабдување во Битола“, изјави Коњановски.

Проектот предвидува и унапредување на регулаторната и институционалната рамка, како и воведување на обновливи извори на енергија во работењето на претпријатијата. Битола е една од седумте општини кои ќе ја користат оваа поддршка во насока на поефикасно, одржливо и отпорно локално управување.

Република

Повеќе тетовски села утре без електрична енергија поради планирани прекини

Повеќе села во тетовскиот регион утре, 18 декември, ќе останат без електрична енергија поради планирани прекини во снабдувањето со струја, информираат надлежните служби.

Без струја во периодот од 09:00 до 14:00 часот ќе бидат делови од селото Челопек, и тоа објекти лоцирани во средниот дел на селото, како и објекти во близина на училиштето. Исто така, прекин во снабдувањето ќе има и во селото Милетино, каде без електрична енергија ќе останат објекти во близина на автобуската станица во т.н. Македонско Маало.

Планиран прекин е најавен и за селото Порој, каде дел од населението исто така ќе биде без струја во истиот временски интервал.

Од надлежните апелираат граѓаните навремено да ги планираат своите обврски и информираат дека прекините се дел од редовни активности за одржување и унапредување на електродистрибутивната мрежа.

Република

Проданоски ги отвори вратите на Општината за најмладите

Кабинетот на градоначалникот на Општина Прилеп, Дејан Проданоски, денеска беше исполнет со детска љубопитност и насмевки, откако во посета пристигнаа четвртоодделенци кои, во рамки на наставната програма, учат за локалната самоуправа и надлежностите на градоначалникот.

Учениците имаа можност одблизу да се запознаат со работата на општината, поставувајќи бројни интересни и искрени прашања, на кои градоначалникот одговараше низ пријатен и едукативен разговор.

Проданоски истакна дека ваквите средби се особено значајни, бидејќи ја поттикнуваат младата генерација да развива интерес за општествените процеси и институциите.

„На младите им припаѓа иднината, а наша обврска е континуирано да работиме на подобрување на условите за живот и создавање подобра и посигурна иднина за нив“, порача градоначалникот Проданоски.

Република

Општина Битола инсталира фотоволтаици во уште три училишта

Општина Битола продолжува со активна имплементација на праведната енергетска транзиција, со цел поголемо искористување на обновливите извори на енергија.

На следната седница на Советот на Општина Битола ќе се разгледува анекс на договорот со Фондацијата Отворено Општество, со кој Општината ќе добие донација за поставување фотоволтаици на уште две основни училишта – „Св. Климент Охридски“ и централното училиште „Даме Груев“.

Анексот претставува дополнување на претходниот договор, со кој минатата година беа инсталирани фотоволтаици на шест основни училишта во градот.

Во рамки на заложбата за искористување на обновливата енергија, Општината ќе постави фотоволтаици од сопствени средства и на една од зградите на основното училиште „Гоце Делчев“.

Овој проект е дел од стратегијата на Општина Битола за поддршка на одржливи решенија и намалување на трошоците за енергија во образовните институции.