Свет

„Луѓе, повеќе не смееме да бидеме наивни — Кина е подготвена за напад! Имаат огромна војска, ние не можеме сами да се бориме против нив…“

„Луѓе, повеќе не смееме да бидеме наивни – Кина се подготвува за напад,“ изјави заменикот министер за надворешни работи на Тајван, Ву Чих-чунг, во интервју за Sky News. Додека кинеската војска сè почесто изведува маневри во близина на островот, Тајван тестира готовноста на своето население преку големи вежби за цивилна одбрана, како неодамнешната на стратешки важниот архипелаг Понгху.

Притисокот од Пекинг станува сè поагресивен: кинески патролни и неидентификувани бродови редовно ја преминуваат демаркациската линија во Тајванскиот теснец, додека кинеската армија развива нови инвазивни технологии, како амфибиски мостни системи за евентуален десант. Претседателот Си Џинпинг веќе ја задолжи армијата да биде подготвена за акција до 2027 година.

Под водство на новиот претседател Лај Чинг-те, Тајван одговори со засилени безбедносни мерки – воведе воен судски систем, зголеми апсења за шпионажа и протераше инфлуенсери со врски до Русија. Пекинг возврати со жестока реторика, опишувајќи го Лај како „паразит кој повикува уништување“.

Во целата геополитичка игра, се вмеша и Вашингтон. Американскиот претседател Доналд Трамп остро ја обвини Тајван за „кражба на американската индустрија на чипови“ и воведе 32% царина на тајванските производи. Иако одбива јасно да се обврзе дали би интервенирал во случај на кинески напад, Тајван се обидува да ги зачува блиските врски со САД преку економска соработка – најголемиот производител на чипови TSMC најави нови инвестиции во САД од 100 милијарди долари.

И покрај владините напори да ја зајакне одбраната, вклучително и забрзана домашна продукција на дронови, реалноста покажува дека Тајван е далеку од посакуваното. До април 2025 се произведени само 5% од планираните 180.000 дронови годишно.

Руската инвазија врз Украина за Тајван беше предупредување, вели директорот на компанијата Thunder Tiger, Џин Су: „Тоа беше аларм за будење.“ Но, иако владата нагласува дека одржувањето на статус-кво ситуацијата – која обезбеди мир речиси 80 години – е приоритет, тој мир денес изгледа покревко од кога било.

Свет

Лекарите во Англија стапија во петдневен штрајк

Лекарите во Англија денес започнаа петдневен штрајк поради несогласувања околу платите и условите за работа, јавува Ројтерс.

Станува збор за помладите болнички лекари, познати како „жители“, кои тврдат дека нивните плати во последните години значително се намалиле и дека работат под зголемен притисок и во тешки услови.

Владата, од своја страна, соопшти дека нема фискален простор за значителни покачувања на платите и дека штрајковите се неодговорни, нагласувајќи ја потребата за заштита на здравствениот систем и пациентите.

Свет

Вашингтон најавува нов притисок врз Москва преку енергетски санкции

САД подготвуваат нов пакет санкции насочени кон рускиот енергетски сектор, со цел дополнително да го зголемат притисокот врз Москва доколку рускиот претседател Владимир Путин одбие да прифати можен мировен договор со Украина, објавуваат странски медиуми повикувајќи се на информирани извори.

Според истите извори, меѓу мерките што се разгледуваат е и таргетирање на бродовите од руската флота на нафтени танкери, како и санкционирање на трговците и посредниците кои учествуваат во олеснување на трансакциите поврзани со извозот на руска нафта.

Изворите наведуваат дека станува збор за опции кои сè уште се во фаза на разгледување, а конечната одлука ќе зависи од развојот на дипломатските напори поврзани со војната во Украина.

Според најавите, новите санкции би можеле да бидат објавени уште во текот на оваа недела.

Свет

Мелони: Европа губи време поради внатрешна слабост и бавни одлуки

Италијанската премиерка Џорџа Мелони изјави дека Европската Унија се соочува со сериозни предизвици, предупредувајќи дека најголемата закана за Унијата не доаѓа однадвор, туку од нејзината сопствена неодлучност и неспособност навреме да носи клучни одлуки.

Говорејќи пред пратениците во Долниот дом на италијанскиот парламент, Мелони нагласи дека актуелниот геополитички момент бара прагматичен пристап, ослободен од идеолошки догматизам. Според неа, токму таквиот пристап е неопходен за соодветен одговор на новата безбедносна стратегија на Соединетите Американски Држави.

„Бесмислено и штетно е да се напаѓаат имагинарни непријатели. Вистинскиот проблем е нашата неспособност да изнаоѓаме конкретни и одржливи решенија“, истакна Мелони во пресрет на претстојниот Самит на ЕУ.

Премиерката се осврна и на прашањето за користење на замрзнатите руски средства за поддршка на Украина, оценувајќи дека станува збор за сложен процес кој мора да биде заснован на цврста и правно издржлива основа. Таа ја повтори поддршката на Италија за Украина и ставот дека Русија треба да ги сноси трошоците за војната, но додаде дека Москва поставува, како што рече, „неразумни“ услови во рамките на мировните напори поддржани од САД.

Мелони упати критики и до предлог-буџетот на Европската комисија за периодот 2028–2034 година, оценувајќи дека во сегашната форма е неприфатлив за Италија. Таа посочи дека документот предвидува зголемени финансиски придонеси, но намалени средства за политики кои се од клучно значење за земјата, како заедничката земјоделска и кохезиската политика.

„Нема да прифатиме да плаќаме повеќе, а да добиваме помалку“, порача италијанската премиерка.