Балкан

Солун под вода: Улиците за неколку минути се претворија во реки

Силно невреме го погоди Солун попладнево, предизвикувајќи големи проблеми во сообраќајот и секојдневното функционирање на градот. По само неколку минути обилен дожд, улиците буквално се претворија во реки, а движењето на возилата беше речиси невозможно на неколку клучни локации.

Особено критично беше на улицата Лагада, каде што водата ги поплави патиштата, а граѓаните се обидуваа да спречат продирање на водата во нивните дуќани. Продавачите со метли и кофи ја туркаа водата од праговите на своите објекти, додека возачите се пробиваа низ длабокиот воден слој.

На терен интервенираше и сообраќајната полиција, откако беа регистрирани неколку судири и застои во сообраќајот. Колони од автомобили се формираа на повеќе места, а поплавените шахти ја влошија ситуацијата. Надлежните служби веднаш почнаа со испумпување на водата.

Видеа објавени на социјалните мрежи го покажуваат вистинскиот хаос: автомобили заглавени во вода, поплавени улици и граѓани кои со мака се обидуваат да се движат низ градот. Според информациите, иако има материјална штета и неколку помали несреќи, засега нема информации за повредени лица.

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.