Црна Хроника

ФИЛМСКА ПОТЕРА ВО СКОПЈЕ: УАПСЕНИ ДВАЈЦА КОСОВЦИ СО ОСУМ МИГРАНТИ ОД КИНА

Двајца државјани на Косово се уапсени синоќа по драматична полициска потера на автопатот кај Скопје, откако биле фатени како превезуваат осум мигранти од Кина. Потерата, проследена со истрели, оштетени возила и урнати рампи, заврши кај излезот Визбегово, каде возилото излета од патот.

Како што информираат од МВР, уапсените се Г.Л. (24) и Б.Л. (18). Тие при бегство ја оштетиле рампата на наплатната станица во Градско, а во Катланово удриле во „Опел Инсигниа“ со странски регистарски таблички и мотоцикл со македонски ознаки. Потерата продолжила и во Петровец, каде што дополнително ја урнале и рампата на наплатната станица.

„На клучката за Приштина, возилото излетало од патот, по што еден од осомничените се обидел да побегне и физички нападнал полициски службеник. Со употреба на сила бил совладан и приведен“, соопштуваат од МВР.

Во обид да го запрат возилото, полициските службеници испукале предупредувачки куршуми, но никој не бил повреден. Двајцата осомничени се пренесени во полициска станица, а мигрантите се сместени во транзитен центар. Против нив ќе биде поднесена соодветна кривична пријава.

Црна Хроника

Женa пронајдена мртва во езерцето во Градскиот парк во Струмица

Во Струмица, синоќа околу 01:45 часот, во Градскиот парк е пронајдена почината жена во едно од езерцата, потврдија од Регионалниот центар за управување со кризи – Струмица.

На местото на настанот веднаш излегле јавен обвинител и полициски службеници, кои извршиле увид. Телото на жената е предадено на Судска медицина за обдукција, со цел да се утврдат точните причини за смртта.

Од Министерството за внатрешни работи информираат дека подетални информации за случајот ќе бидат објавени во текот на денот.

Црна Хроника

Кривични пријави за врвот на ОФС Охрид: Лажни податоци и фиктивни натпревари за позиционирање во ФФМ

СВР Охрид поднесе кривични пријави против двајца функционери на Општинскиот фудбалски сојуз Охрид, поради основано сомнение за фалсификување документи и измама со цел стекнување влијание во Фудбалската федерација на Македонија.

Според информациите од полицијата, Ц.М. и Н.Ц., кои во 2024 година ја извршувале функцијата претседател и секретар на ОФС Охрид, во повеќе наврати внеле лажни и неточни податоци во информацискиот систем „Комет“ на ФФМ. Во системот биле евидентирани натпревари кои никогаш не биле одиграни, како и лица прикажани како играчи и судии, иако тие немале регистрација и не ги исполнувале условите за учество.

Со ваквите дејствија, како што наведува СВР Охрид, пријавените се обиделе да прикажат дека се исполнети критериумите за ОФС Охрид да добие свои претставници во органите и телата на ФФМ.

Против двајцата функционери се поднесени кривични пријави за кривичните дела фалсификување исправа и измама, а случајот е доставен до надлежното јавно обвинителство за понатамошно постапување.

Црна Хроника

Апсење на граничниот премин Табановце – МВР со детали

59-годишен скопјанец доби кривична пријава поради фалсификување дипломатска исправа и лажно претставување на Граничниот премин Табановце.

Според полицијата, Регионалниот центар за гранични работи Север поднел кривична пријава против С.С. од Скопје, откако постојат основи за сомнение дека сторил кривични дела „фалсификување исправа“ и „лажно претставување“.

Инцидентот се случил на 25 јули 2025 година, кога мажот управувајќи „фолксваген голф“ се претставил како дипломат и приложил фалсификувана дипломатска патна исправа. Граничните службеници го документирале случајот, а по разгледувањето на доказите, С.С. се соочува со официјална кривична пријава и натамошни правни постапки.

Случајот ја потенцира сериозноста на законите за граничен надзор и ризикот од лажно претставување, особено со употреба на документи со висок легален и дипломатски статус.