Република

Коњановски: Утревечер „Кларинетска одисеја“ на Бит Фест – гордост за Битола и македонската култура

„Битола е град кој има публика за вакви настани“, изјави градоначалникот Тони Коњановски, најавувајќи го концертот „Кларинетска одисеја“, што ќе се одржи утревечер во античкиот локалитет Хераклеја, во рамките на БИТ ФЕСТ. Настанот, поддржан од Министерството за култура и туризам, се реализира како дел од повикот за креативни индустрии и претставува пример за успешна меѓуинституционална соработка.

„Ова е најава за спектакл на нашите виртуози, наше – а светско. Настан што, со гордост можам да кажам, ќе биде еден од кулминациските моменти на Битолското културно лето. Присуството на четворица мајстори на кларинетот, меѓу кои и битолчани и велешанец, значи многу за нашиот град и нашата публика“, истакна Коњановски.

Во фокусот на концертот ќе бидат интернационално афирмираните уметници: Исмаил Лумановски, Благојче Трајковски, Горан Бојчевски и Благој Ламњов – музичка четворка со светско реноме, кои за првпат настапуваат заедно во ваков состав. Нивната „кларинетска одисеја“ ќе понуди богата звучна палета од традиционална, класична и современа музика, а концертот ќе биде збогатен и со вокални изведби од хорот „Коруновска Арс Нова“, поезија од Зоран Пејковски, како и настапи од врвни инструменталисти.

Коњановски истакна дека БИТ ФЕСТ веќе прераснува во репер-настан за културниот календар на земјата. „Минатиот месец Битола беше домаќин и на светската ѕвезда Армин ван Бурен, но и овој концерт покажува дека нашиот град не живее само за едно музичко искуство – туку за културна ренесанса. Горд сум што Битола може да прими и да препознае уметност од ваков калибар“, рече тој.

Концертот „Кларинетска одисеја“ ќе се одржи на 7 август, со почеток од 21:00 часот, а организаторите најавуваат вечер исполнета со емоции, музика и културна гордост.

Република

Повеќе тетовски села утре без електрична енергија поради планирани прекини

Повеќе села во тетовскиот регион утре, 18 декември, ќе останат без електрична енергија поради планирани прекини во снабдувањето со струја, информираат надлежните служби.

Без струја во периодот од 09:00 до 14:00 часот ќе бидат делови од селото Челопек, и тоа објекти лоцирани во средниот дел на селото, како и објекти во близина на училиштето. Исто така, прекин во снабдувањето ќе има и во селото Милетино, каде без електрична енергија ќе останат објекти во близина на автобуската станица во т.н. Македонско Маало.

Планиран прекин е најавен и за селото Порој, каде дел од населението исто така ќе биде без струја во истиот временски интервал.

Од надлежните апелираат граѓаните навремено да ги планираат своите обврски и информираат дека прекините се дел од редовни активности за одржување и унапредување на електродистрибутивната мрежа.

Република

Проданоски ги отвори вратите на Општината за најмладите

Кабинетот на градоначалникот на Општина Прилеп, Дејан Проданоски, денеска беше исполнет со детска љубопитност и насмевки, откако во посета пристигнаа четвртоодделенци кои, во рамки на наставната програма, учат за локалната самоуправа и надлежностите на градоначалникот.

Учениците имаа можност одблизу да се запознаат со работата на општината, поставувајќи бројни интересни и искрени прашања, на кои градоначалникот одговараше низ пријатен и едукативен разговор.

Проданоски истакна дека ваквите средби се особено значајни, бидејќи ја поттикнуваат младата генерација да развива интерес за општествените процеси и институциите.

„На младите им припаѓа иднината, а наша обврска е континуирано да работиме на подобрување на условите за живот и создавање подобра и посигурна иднина за нив“, порача градоначалникот Проданоски.

Република

Општина Битола инсталира фотоволтаици во уште три училишта

Општина Битола продолжува со активна имплементација на праведната енергетска транзиција, со цел поголемо искористување на обновливите извори на енергија.

На следната седница на Советот на Општина Битола ќе се разгледува анекс на договорот со Фондацијата Отворено Општество, со кој Општината ќе добие донација за поставување фотоволтаици на уште две основни училишта – „Св. Климент Охридски“ и централното училиште „Даме Груев“.

Анексот претставува дополнување на претходниот договор, со кој минатата година беа инсталирани фотоволтаици на шест основни училишта во градот.

Во рамки на заложбата за искористување на обновливата енергија, Општината ќе постави фотоволтаици од сопствени средства и на една од зградите на основното училиште „Гоце Делчев“.

Овој проект е дел од стратегијата на Општина Битола за поддршка на одржливи решенија и намалување на трошоците за енергија во образовните институции.