Скопје

Орце Ѓорѓиевски: Чаршијата заслужува грижа, Скопје достоинство

Во срцето на Скопје, старата чаршија – симбол на историјата, културата и занаетчиството, денес беше во фокусот на вниманието. Орце Ѓорѓиевски, заедно со министерката за финансии Гордана Димитриеска-Кочоска, пратеникот Ѓорѓија Сајкоски и претставници од еснафот, ја посетија чаршијата и остварија средба со занаетчиите кои со генерации го чуваат нејзиниот дух.

„Чаршијата е место каде секој камен раскажува приказна. Таа заслужува грижа, а Скопје – достоинство“, порача Ѓорѓиевски, истакнувајќи дека проблемите на ова културно наследство премногу долго се игнорирани од страна на градските власти.

Занаетчиите информирале дека со години поднесуваат писмени реакции до градската администрација, но нивните барања ретко кога добиваат одговор. Како главни проблеми ги посочиле лошата состојба на калдрмата, која по интервенции на Водовод останува несанирaна, како и недоволната грижа за хигиената и јавниот ред.

Покрај реконструкција со почит кон традицијата, чаршијата бара и подземни контејнери, уреден јавен простор и посериозен однос од институциите.

„Овие барања се праведни и оправдани и за мене ќе бидат приоритет. Скопје ќе биде повторно достоинствен град – метропола со иднина, со култура, ред и автентичност“, нагласи Ѓорѓиевски, додавајќи дека заедно со занаетчиите и граѓаните ќе го направат тоа можно.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.

Република

Системот „Безбеден град“ ќе санкционира само сериозни прекршоци, најавува Тошковски

Министерот за внатрешни работи Панче Тошковски истакна дека системот „Безбеден град“ ќе се спроведува со прецизно дефиниран праг на толеранција, со цел зголемување на безбедноста во сообраќајот и јавниот простор, а не казнување по секоја цена.

Тошковски нагласи дека системот ќе биде насочен кон препознавање и санкционирање на сериозни и опасни прекршоци, особено оние кои директно го загрозуваат животот и безбедноста на граѓаните. Според него, целта е да се воспостави ред и превенција, а не репресија без разум.

„Ќе има јасни правила, транспарентност и точно утврдени критериуми. Граѓаните ќе знаат што се санкционира и зошто. Системот нема да биде лов на прекршители, туку алатка за заштита на човечки животи“, потенцираше министерот.

Проектот „Безбеден град“ предвидува користење на современи технолошки решенија, камери и софтвер за следење на сообраќајот, со што ќе се подобри контролата и ќе се намали бројот на сообраќајни несреќи.

Министерството најави дека имплементацијата ќе оди фазно, со претходна информираност на јавноста и соодветен период за прилагодување, со цел граѓаните навремено да се запознаат со новиот систем и неговото функционирање