Црна Хроника

Сообраќајна расправија на Бит Пазар прерасна во вооружен инцидент – млад скопјанец ранет со пиштол

Едно лице е хоспитализирано со повреди од огнено оружје по инцидент што се случил ноќеска околу 00:30 часот во населбата Бит Пазар. Според информациите од Министерството за внатрешни работи, до пукањето дошло поради недоразбирање во сообраќајот меѓу два соседа.

Нападнатиот, 25-годишниот О.Е. од Скопје, бил пренесен и задржан во Ургентниот центар при Комплекс клиники „Мајка Тереза“, со прострелни рани во градниот кош и раката. Настанот бил пријавен во полиција во 01:10 часот.

Како што информираат од СВР Скопје, расправијата започнала пред дворот на куќата на О.Е., каде неговиот сосед Ќ.Ч. најпрво го нападнал физички. Потоа, заедно со уште четворица – М.Ч., Ш.Ч., О.Ч. и Б.М. – влегле во дворот и физички ги нападнале и другите членови на семејството: неговиот татко Д.Е. и братот М.Е.

Во текот на нападот, Ќ.Ч. извадил пиштол и пукал, при што го погодил О.Е. Увид на местото на настанот извршила екипа на СВР Скопје, при што биле пронајдени три чаури.

Случајот е целосно документиран и во тек е понатамошна постапка. Против напаѓачите ќе бидат поднесени соодветни кривични пријави.

Црна Хроника

Исчезна 30-годишен скопјанец

На 15.12.2025 во 01:50 часот во Полициската станица Гази Баба, И.Т.(51) од с.Инџиково, скопско, пријави дека од домот се оддалечил неговиот син А.Т.(30).

Се преземаат мерки за пронаоѓање на лицето.

Црна Хроника

Примил мито од 50.000 евра за да влијае кај судија – МВР со детали

Полициски службеници по наредба на јавен обвинител од Основното јавно обвинителство за гонење на организиран криминал и корупција го лишија од слобода Ф.С. поради сторено кривично дело – Примање награда за противзаконито влијание.

Во периодот од октомври до 13.12.2025 година осомничениот примил вкупен износ од 50.000 евра за да посредува и да го искористи своето реално влијание за да интервенира кај судија во Апелациониот суд Скопје и за со поткуп кон судијата да влијае за да се изврши службено дејствие што не би смеело да се изврши.

Првично, осомничениот побарал 100.000 евра за да влијае за укинување на мерка притвор определена кон лице кое е недостапно на органите на прогонот и против кого ОЈОГОКК води друга постапка за кривични дела против јавните финансии, платниот промет и стопанството. На 06.10.2025 година примил дел од побараниот износ и тоа 30.000 евра, што му ги предала сестрата на лицето во бегство. На 13.12.2025 година директно побарал и примил уште 20.000 евра како дел од поткупот што го барал за да го даде на судијата.

Непосредно по примањето на паричните средства осомничениот е лишен од слобода и кај него се пронајдени парите.

Црна Хроника

Лажен полицаец измами старица за 23.300 евра, уапсен на граница

Полицијата од Опатија уапси 46-годишен хрватски државјанин кој измами 79-годишна жена за 23.300 евра. Измамникот се претставувал како полицаец и ја убедил старицата дека истражува хакерски напад врз нејзините банкарски сметки. Тој ја натера да ги подигне сите свои пари за наводна проверка на истрагата.

На 12 декември, жртвата му ги предала парите пред својата куќа, по што измамникот се обидел да ја напушти земјата. Благодарение на брза и координирана акција на полицијата, тој бил уапсен на граничниот премин во Брод-Посавина, а целата украдена сума веднаш била вратена на сопственичката.

Против осомничениот е поднесена кривична пријава, тој е предаден на надзорникот на притвор, а истрагата продолжува.