Република

Загубите на ЈКП „Никола Карев“ – Пробиштип се удвоија: локалната власт под критика за неодговорно управување

Пробиштип, август 2025 – Јавното комунално претпријатие „Никола Карев“ од Пробиштип ја заврши 2024 година со загуба од 6.774.000 денари, што претставува речиси двојно зголемување во однос на 2023 година, кога минусот изнесувал 3.305.000 денари. Податоците се преземени од официјалните финансиски извештаи објавени на порталот CompanyWall, кој ја следи јавната финансиска документација на сите фирми и институции во земјава.
Иако приходите на претпријатието бележат постепен раст – од 82,2 милиони денари во 2022 на 96,1 милион во 2024 – сепак тој е недоволен да ги покрие уште побрзо растечките расходи, кои достигнаа 102,9 милиони денари во 2024 година. Разликата меѓу приходите и расходите ја продуцира загубата, што ја отвора дилемата: дали Пробиштип влегува во сериозна финансиска криза во делот на комуналните услуги?

Недоволна транспарентност и одговорност

Локалната самоуправа, предводена од градоначалникот Драган Анастасов, и раководството на ЈКП „Никола Карев“ досега не понудија јавно објаснување за причините за растот на загубите. Недостатокот на транспарентност за финансиското работење на претпријатието и отсуството на чувството за одговорност да ја објаснат состојбата во претпријатието, наметнуваат потреба да се направи увид колку одговорно се управува со јавните средства.
Врз основа на официјалните бројки, повеќе прашања остануваат неодговорени: Зошто расходите растат побрзо од приходите, иако нема значителни инфраструктурни или капитални проекти објавени за 2024 година? Дали се спроведуваат доволно ефикасни мерки за наплата на долговите од граѓаните и компаниите? Зошто јавноста не е информирана за конкретни планови за стабилизирање на финансиската состојба на претпријатието?

Потреба од итни мерки

Побарувањата од граѓани и компании бележат пад од 46,1 милион денари во 2022 на 43,8 милиони во 2024 – што може да е последица на проблеми со наплатата на услугите. Коефициентот на тековна ликвидност, кој ја мери способноста на претпријатието да ги покрива своите краткорочни обврски, исто така се намалува од 2,55 на 1,78 за истиот период, што е предупредувачки сигнал за финансиска ранливост.
Анализата на финансиските параметри покажува дека доколку не се преземат итни и структурни реформи, комуналното претпријатие ќе се соочи со уште поголеми проблеми, како намалена способност за одржување и развој на инфраструктурата (водовод, канализација, јавна чистота), како и потенцијално зголемување на цените на услугите за граѓаните.
Во услови на постојан раст на загубите, јавноста со право очекува градоначалникот Анастасов, поранешниот в.д. директорот Ненад Павиќевиќ и актуелниот Драган Ристовски да понудат детален извештај – не само за тоа што довело до ваквата состојба, туку и за тоа кои конкретни чекори ќе се преземат. Комуналните претпријатија се основа на функционирањето на градот и нивната ефикасност директно влијае врз секојдневниот живот на граѓаните.

Република

ВИДЕО: Битола секоја година се поубаво украсена

Битола повторно ја облече новогодишната светлина и ја отвори вратата за празничната магија што ја прави препознатлива. Улиците, плоштадите и сцените каде што и оваа година ќе се одвива „Зимската приказна“ засветкаа во празничен сјај, носејќи радост и топла атмосфера за граѓаните и посетителите.

Новогодишното украсување донесе свежа енергија и чувство на празнична возбуда низ целиот град, создавајќи амбиент кој секоја година изгледа сè поубаво и повпечатливо. Битола и овој декември е подготвена да ги пречека гостите со светлина, музика и празничен дух.

Со видео ви пренесуваме дел од атмосферата од градот под Пелистер, кој е подготвен за уште едно ново издание на предновогодишната програма „Зимска приказна“, на радост на сите генерации.

Република

„Шпанец“ се враќа на пругите: Модернизиран и подготвен за патници

Легендарниот воз „Шпанец“, некогаш заборавен и речиси отпишан, се враќа на пругите со целосно нов лик. Денес беше тестирана обновената верзија на возот, кој сега располага со модерен дизајн, телевизори, озвучување, алармни системи и видео надзор.

Одговорните најавуваат дека подготовките за поудобно и побезбедно патување се во полн ек, со цел патниците да уживаат во современо и безбедно патување.

Следуваат уште новости за враќањето на овој легендарен воз – останете со нас за сите детали.

Видеото може да го погледнете тука

Република

После многу години конечно Тетово ќе се украсува

На онлајн седница одржана денеска, 12 декември 2025 година, Советот на Општина Тетово со мнозинство гласови донесе одлука за украсување на градот за претстојните новогодишни празници.

„За оваа програма „за“ гласаше советничкото мнозинство составено од Коалицијата „Вреди“ и ВМРО-ДПМНЕ, додека против беа советниците од коалицијата НАИ. Воздржани беа од Подобро за Тетово, Левица и СДСМ. Со оваа одлука, Општина Тетово ја потврдува намерата градот да добие празничен сјај за крајот на 2025 година“, изјави претседателот на Советот, Јусуф Абдули.

Истовремено, изгласана е измена на Програмата за активности на Општина Тетово во областа на културата за 2025 година. Според новата програма, за празничното украсување се предвидени еден милион и петстотини илјади денари, што е над 24 илјади евра.