Британскиот премиер Кир Стармер утрово во Даунинг стрит го прими украинскиот претседател Володимир Зеленски, додека Европа со внимание го очекува исходот од претстојните разговори меѓу американскиот претседател Доналд Трамп и рускиот лидер Владимир Путин, закажани за петок на Алјаска.

Средбата доаѓа по најавата на Стармер дека Велика Британија е подготвена да го зголеми притисокот врз Русија доколку биде потребно. Истовремено, Трамп ѝ се закани на Москва со „тешки последици“ доколку Путин одбие примирје.

Загриженост предизвика одлуката украинскиот претседател да не биде поканет на разговорите меѓу Трамп и Путин. Стармер и европските лидери, меѓу кои францускиот претседател Емануел Макрон и германскиот канцелар Фридрих Мерц, повеќепати истакнаа дека расправите за Украина не треба да се одржуваат без нејзино учество.

Трамп, кој претходно предложи примирје што би можело да вклучи и „размена“ на територии, изјави дека по средбата со Путин можно е да се одржи и посебен состанок со Зеленски. Се верува дека еден од условите на Москва е Украина да се откаже од делови од Донбас кои сè уште ги контролира, што Киев категорично го одбива, повикувајќи се на неповредливоста на меѓународно признатите граници.