Економија

Виктор Грозданов за Плусинфо – Државата покажува подготвеност да го врати рударството како столб на македонската економија

Со новиот предлог-закон за рударство, државата покажува подготвеност да го врати рударството како столб на македонската економија, а создава развојни можности и да помогне во намалување на иселувањето, вели колумнистот Виктор Грозданов во последната колумна објавена во Plusinfo.mk.

Тој оценува дека Македонија со воведување на двата засебни закони, за рударство и за геологија, ја третира индустриската гранка како стратешки неопходна за држвата и за граѓаните. Новите закони ќе стават силна контрола врз сите осум постапки за отворање нов или за постоечките рудници.

Во предлог-законот, како најзначајни ги издвојува геолошките истражувања, елаборатите за заштита на животната средина, експлоатацијата и економскиот развој, и рехабилитација и рекултивација на употребеното земјиште.

„Само со јасна регулатива рударството може да стане повторно столб на македонската економија и да помогне во спречување на белата чума и иселувањето“, вели Гроздановски.

Тој посочува дека при подготовка на конечната верзија на законите задолжително треба да учествуваат професори и експерти од различни области: геолози за истражување на рудните богатства, рудари за дефинирање на современи и безбедни практики, металурзи кои ќе гарантираат еколошка заштита во процесот на екстракција, лекари за заштита на рударите, економисти за следење на глобалните движења на металите.

„Нема рудар и металург кој не сака да соработува со „нормални еколози“. Тоа се личности кои знаат да разговараат дека да го стопирате или изгаснете процесот на индустријализација е утопија. Напротив мора да го контролирате и тоа по сите прописи согласно Европската унија кои ние ги имаме прифатено во целост, а за тоа мораме да ја јакнеме држават пред се“, нагласува Грозданов

Во колумната наведува и пример за „еко лажговци”. Според него, тоа се случува на реката Дошница, каде од 1952 година функционира хидроцентрала со рибник каде се мрестат стотици илјади млади пастрмки, спротивно на тврдењата дека таквите зафати ја уништуваат природата.

Гроздановски истакнува дека иднината на рударството е без изградба на нови хидројаловишни брани. Тој посочува дека рудниците „Генезис“ и „Иловица-Штука“ веќе го прифатиле овој концепт, а металурзите предлагаат нови начини за безбедно искористување на ретки метали од старите јаловишта.

Тој најави две колумни кои ќе ги објавим овој месец каде ќе објасни за еко лажговците по нарачка со детали за Асан Бег и за неговите другари од еко партиите и какви се зулуми имаат направено во делот хидро системи и рудници.

Извор: plusinfo.mk

Економија

Странски „хај-тек“ инвестиции од Германија и Турција: 80 милиони евра и илјада нови работни места

Македонската економија влегува во нова фаза на развој со најавата за две значајни странски инвестиции во областа на високата технологија. Премиерот Христијан Мицкоски соопшти дека германска и турска компанија ќе инвестираат околу 80 милиони евра, носејќи свеж капитал надвор од досега доминантната автомобилска индустрија.

Според најавите, двата проекта ќе имаат силен извозен карактер и значајна додадена вредност. Се очекува годишен извоз од над 200 милиони евра, како и отворање на приближно 1.000 нови работни места, главно во сегментот на високо квалификуван кадар.

Мицкоски истакна дека ваквите инвестиции го потврдуваат стратешкото насочување на државата кон високо-технолошки индустрии, со цел диверзификација на економијата и намалување на зависноста од еден сектор. Тој изрази оптимизам дека до крајот на годината ќе следат уште нови странски вложувања.

Најавените проекти се оценуваат како јасен сигнал за подобрена инвестициска клима и дел од пошироките напори за привлекување современи технологии, повисоки плати и одржлив економски раст.

Економија

Димитриеска – Кочоска: 97 милиони евра за клучни енергетски проекти

Денеска беа потпишани договори за државна гаранција и заеми во вкупна вредност од 97 милиони евра, со кои ќе се реализираат стратешки енергетски проекти што значително ќе ја променат енергетската слика на државата.

Министерството за финансии, преку издавање државна гаранција, овозможи финансирање од 87 милиони евра за проектот „Фотонапонска електроцентрала Битола 3“. Од оваа сума, 50 милиони евра се обезбедени од КфВ, а 37 милиони евра од Европската банка за обнова и развој. Дополнително, обезбедени се и 10 милиони евра за ревитализација на хидроелектраните.

Министерката за финансии Гордана Димитриеска – Кочоска изрази благодарност до меѓународните финансиски институции за континуираната поддршка, како и до тимот на АД ЕСМ за нивната посветеност во реализацијата на проектите.

Според неа, овие капитални инвестиции ќе придонесат за зајакнување на домашното производство на електрична енергија, ќе обезбедат посигурно и постабилно снабдување и ќе дадат силен поттик за економска стабилност и одржлив развој на државата.

Економија

Божиновска: Нема енергетска криза, државата има резерви од мазут!

Граѓаните нема да почувствуваат никакви прекини во снабдувањето со топлинска енергија, иако ЕСМ побара прогласување кризна состојба. Министерката за енергетика, Сања Божиновска, денеска на брифинг со новинарите порача дека државата има доволно резерви на мазут за да ги покрие потребите.

Барањето за кризна состојба ќе се разгледува на утрешната владина седница, но Божиновска нагласи дека тоа е технички чекор за да се активираат државните резерви. Причина за ова е триесетдневната неможност за редовна набавка на мазут од Грција поради тамошните протести.

„Нема да има никаква криза. Постои мазут во државата – ако не го земат од Грција, ЕСМ ќе го земе од државните резерви. За граѓаните ова нема да значи апсолутно ништо“, истакна министерката.