Магазин

Samsung Electronics ги претставува новите Odyssey G7 монитори и ги прикажува најпопуларните игри на своите екрани на саемот Gamescom 2025

Новите Odyssey G7 монитори од 37’’ и 40’’ нудат подобра резолуција, поголема стапка на освежување и имерсивни перформанси за гејминг од новата генерација

Samsung го проширува Odyssey 3D гејмингот преку сè поголем број партнерства, носејќи оптимизирани ефекти за наслови како Stellar Blade и MONGIL: STAR DRIVE

Скопје, 20. август 2025 – Samsung Electronics ги претстави своите нови Odyssey G7 монитори со широк екран на саемот Gamescom 2025, најголемиот гејминг настан во светот, кој се одржува во Келн, Германија, од 20 до 24 август. Освен новите G7 модели, Samsung исто така го претставува и сè поширокиот екосистем на Odyssey 3D гејминг без очила, како и нови партнерства со најпознатите креатори на игри и водечки светски студија за игри.

„Со нетрпение очекуваме да ги претставиме нашите најнови производи на водечкиот светски собир како што е Gamescom“, изјави Џанг Хун (Jung Hoon), потпретседател на секторот за производи со екрани во компанијата Samsung Electronics. „Нашите неодамна воспоставени соработки ќе донесат поавтентично гејминг искуство преку оптимизирани 3D ефекти прилагодени на секој наслов. Ќе продолжиме да го предводиме пазарот на премиум гејминг монитори преку подобрени хардверски перформанси, нови партнерства поврзани со содржината на игрите и унапредено 3D корисничко искуство.“

Samsung останува глобален лидер во сегментот на монитори, рангиран како најдобар светски бренд на гејминг монитори веќе шест години по ред. Во првиот квартал од 2025 година, Samsung повторно беше лидер на пазарот со глобален удел од 18,9% и е подготвен да го продолжи своето лидерство и седмата година по ред, според најновите податоци на Меѓународната корпорација за податоци (IDC)¹. Во Европа, Samsung има пазарен удел од 24,6% и со тоа го диктира темпото на регионалниот пазар на гејминг монитори.

Приказ на новата Odyssey G7 линија: широки екрани осмислени за имерсивно играње

Новиот Odyssey G7 (модел G75F) е достапен во две големини: 37” 4K UHD (3.840×2.160) со сооднос 16:9 и првиот Samsung 40” Wide UHD (WUHD), со резолуција 5K2K (5.120×2.160) и сооднос 21:9. На овој начин се проширува понудата на големи гејминг монитори, надвор од постоечките модели од 32 и 43 инчи со 4K резолуција.

Исто така, ги поддржува функциите Picture-by-Picture (PBP) и Picture-in-Picture (PIP), што на гејмерите им овозможува мултитаскинг со поделен екран. Мониотрите поседуваат VESA DisplayHDR 600 сертификат и осветлување од 350 нити, за да обезбедат одличен контраст и живописна репродукција на боите – како за гејминг, така и за видео содржини. За унапредување на гејминг искуството и секојдневната употреба, секој модел нуди:

HDR10+ Gaming за подобрен HDR квалитет,

AMD FreeSync™ Premium Pro за намалување на доцнењето и сечењето на сликата, обезбедувајќи мазни прикази без прекини,

CoreSync за синхронизација на бојата на амбиенталното позадинско осветлување со приказите на екранот,

Auto Source Switch+ за автоматско регистрирање на уредите кога ќе се поврзат или вклучат,

разновидно поврзување со еден DisplayPort 1.4 и два HDMI 2.1 порта,

ергономски дизајн со постојка за прилагодување на висина (HAS) и можност за навалување и ротација.

Посетителите на саемот Gamescom ќе можат да ги испробаат новите Odyssey G7 модели со широк екран играјќи Genshin Impact, акциона RPG игра во отворен свет од компанијата HoYoverse, на двете големини на екрани на штандот на Samsung, во сала 9, на првиот кат.

Odyssey G7 моделот веќе е достапен во Јужна Кореја и Северна Америка, а во Европа се очекува во септември².

Уште побогат 3D свет благодарение на новите партнерства

Samsung Electronics го проширува својот екосистем на 3D гејминг преку нови партнерства и ексклузивна содржина поврзана со Odyssey 3D монитор (модел: G90XF), кој овозможува играње игри во 3D формат без очила.

На саемот Gamescom 2025, Samsung ќе ги најави новите партнерства со најзначајните креатори на игри, вклучувајќи ги Netmarble и SHIFT UP. Така, посетителите на штандот на Samsung за првпат ќе можат да ја испробаат Mongil: STAR DIVE, новиот наслов од Netmarble, како и Stellar Blade, популарната игра на SHIFT UP, во своето прво 3D издание на Samsung штандот.

Samsung на 22 и 23 август ќе биде домаќин на настанот The World of #PlayGalaxy, на локацијата Dock2 во центарот на Келн. Настанот ќе ги собере гејмерите, нудејќи им имерсивно и динамично искуство на играње на различни уреди, како Galaxy Z Fold7 и Odyssey 3D.

Преку стратешките партнерства со гејминг студија, Odyssey 3D го унапредува играњето со фино подесени ефекти на длабочина кои се прилагодуваат на ликовите, позадините и сцените во секоја игра — без потреба од 3D очила. Овој монитор поддржува функции за прилагодлива фокална далечина и персонализирани 3D опции кои им овозможуваат на гејмерите да ја контролираат 3D длабочината на секоја игра врз основа на паралаксата помеѓу левата и десната слика.

Samsung продолжува да ја проширува својата понуда на 3D игри на Odyssey 3D Hub, платформа специјализирана за 3D содржина, која моментално поддржува повеќе од 25 3D игри, како што е First Berserker: Khazan. До крајот на годината³, архивата ќе брои над 50 поддржани 3D игри⁴, меѓу кои Lies of P: Overture DLC, Stellar Blade и Mongil: STAR DIVE.

Запознавање со премиерните наслови на водечките студија за игри на Odyssey OLED мониторите

Samsung ги проширува можностите за испробување на Odyssey OLED мониторите на саемот Gamescom 2025 преку соработка со водечките студија за игри, вклучувајќи ги Blizzard и Pearl Abyss.

Samsung на овогодинешниот саем ќе ги опреми партнерските штандови со своите водечки екрани – Odyssey OLED G6 со ултрабрза стапка на освежување од 500Hz (модел: G60SF) и Odyssey OLED G8 со 240Hz во 4K резолуција (модел: G81SF).

Штандот посветен на играта World of Warcraft содржи повеќе од 80 гејминг станици со Odyssey OLED G6 монитор од 500Hz, нудејќи им на фановите на World of Warcraft ултра-одзивно, врвно гејминг искуство, додека првпат имаат можност да ги испробаат новите системи за дома.

Pearl Abyss ќе ја претстави својата нова акционо-авантуристичка игра со отворен свет Crimson Desert на повеќе од 180 единици од Odyssey OLED G6 мониторите со 500Hz освежување и Odyssey OLED G8 моделите со 4K резолуција и освежување од 240Hz.

Со извонредниот квалитет на сликата од OLED линијата, овие монитори ќе им овозможат на посетителите целосно да ја доживеат импресивната графика на игрите.

Посетителите на Gamescom 2025 ќе можат да го најдат штандот на Samsung на 1. кат, Хала 9, на локациите B030 и C031.

¹IDC Worldwide Gaming Tracker Q1 2025, класификацијата на гејминг мониторите е заснована на критериумите на IDC: монитори со стапка на освежување поголема од 144 Hz (од II квартал 2023) или поголема од 100 Hz (пред II квартал 2023). Рангирањето е засновано на износот на вредноста.

²Распоредот на лансирање може да варира во зависност од земјата.
³Датумот на лансирање на секоја од игрите може да варира.
⁴За да го проверат ажурираниот список на нови 3D игри, корисниците можат да ја преземат најновата верзија на Odyssey 3D Hub во продавницата MS Store или на веб-страницата Samsung.com.

За компанијата Samsung Electronics Co. Ltd.

Samsung го инспирира светот и ја обликува иднината преку идеи и технологии што носат трансформација. Компанијата ги редефинира световите на телевизорите, дигиталното огласување, паметните телефони, носливите уреди, таблетите, апаратите за домаќинство и мрежните системи, како и на мемориските решенија, LSI системите и чиповите по нарачка. Samsung исто така ги унапредува технологиите за медицинска дијагностика, HVAC решенијата и роботиката, како и иновативните решенија во автомобилската и аудио индустријата преку компанијата Harman. Со SmartThings екосистемот, отворената соработка со партнери и интеграцијата на вештачката интелигенција во својата понуда, Samsung нуди интелигентно, поврзано и беспрекорно корисничко искуство. За најнови вести посетете ја Samsung Newsroom: https://www.samsung.com/mk/.

Магазин

Најскапиот град на светот: Зошто богатството не значи среќа за жителите

Општо е познато дека животот во големите градови е поскап, особено кога станува збор за кирија и домување. Но, понекогаш дури и самото излегување од дома може сериозно да ја погодне домашната каса

Редакцијата на „Тајм аут“ секоја година анктира десетици илјади жители низ целиот свет за да ја состави својата листа на најдобрите градови за живот. Иако квалитетот на ноќниот живот, гастрономијата и културните настани се важни, пристапноста – односно колку едноставно и евтино граѓаните можат да уживаат во секојдневните забави — е клучен фактор.

Во истражувањето, жителите на повеќе од 100 градови ги оценувале трошоците за одење во ресторани, кино, кафулиња, галерии и музеи, театар или стендап, концерти, барови и вечерни излегувања. Податоците покажаа кои градови навистина ги „трошат џебовите“ на своите жители и кои градови нудат забава што не ја празни сметката.

На врвот на листата на најскапи градови за излегување се најде Сеул. Само 30% од жителите сметаат дека оброк во ресторан е достапен, а само 21% сметаат дека вечерното излегување не ги оптоварува финансиските можности. Пијалакот во бар, пак, е евтин само за 27% од жителите.

Не е изненадување што Осло се појавува меѓу најскапите градови – главниот град на Норвешка традиционално важи за скап, особено кога станува збор за ресторани. Според анкетата, само 24% од Ословците сметаат дека оброкот во ресторан е финансиски прифатлив.

На листата се најдоа и Лондон, Сиднеј и Лос Анџелес, кои повторно се поклопуваат со извештајот на „Хенли енд партнерс“ за најскапи градови во светот. Лондон е прогласен за најскап град за ноќно излегување – само 16% од луѓето сметаат дека тоа е пристапно. Меѓутоа, британската престолнина го заслужува признанието за култура: 83% од лондончаните оцениле дека уметноста и културните настани во нивниот град се евтини или бесплатни.

На спротивната страна се наоѓаат Меделин и Богота во Колумбија, градови каде што локалното население ги смета излегувањата за многу пристапни. Во Меделин, 89% од жителите сметаат дека одењето во ресторан е евтино, 83% велат истото за пијалак во бар, а 94% дека кафето е достапно.

Изненадување за многумина е присуството на два големи кинески градови на листата на поволни дестинации. Пекинг и Шангај се истакнуваат по тоа што одењето во театар не е голем трошок – тоа го потврдуваат 73% од Пекинжани и 72% од Шангајци.

Единствениот американски претставник меѓу поволните градови е Њу Орлеанс, кој добива високи оценки за концерти во живо и пијалаци во барови.

Важно е да се потенцира дека истражувањето на „Тајм аут“ се концентрира исклучиво на трошоците за забава и излегувања, без да ги вклучи киријата, домувањето или секојдневните прехранбени трошоци.

Најскапи за излегување: Сеул, Истанбул, Осло, Стокхолм, Кјото, Атина, Сиднеј, Окланд, Минхен, Бризбејн, Лос Анџелес, Сингапур, Лондон, Ванкувер, Мајами.

Најповолни за излегување: Меделин, Богота, Пекинг, Њу Орлеанс, Наполи, Ханој, Чианг Мај, Шангај, Лима, Џакарта, Јоханесбург, Бангкок, Абу Даби, Сантијаго, Кејптаун.

Магазин

Рим воведува наплата на билети за една од своите најголеми атракции

Градските власти во Рим размислуваат за воведување наплата за посетите на една од најпознатите туристички атракции во градот – Фонтаната Треви, поради сè поголемиот број туристи и проблемите со пренатрупаност во централното градско подрачје.

Фонтаната Треви, сместена во истоимениот кварт, со децении е симбол на Рим и место каде посетителите традиционално фрлаат парички за среќа. Обичајот стана светски познат по филмот „Три парички во фонтаната“, а според проценките, од фонтаната дневно се собираат околу 2.800 евра, односно повеќе од 900.000 евра годишно. Собраните средства се донираат на католичка добротворна организација.

Во првата половина од 2025 година, повеќе од 5,3 милиони туристи ја посетиле Фонтаната Треви, што предизвика бројни поплаки за преголеми гужви, долги редици и појава на џепчии. Како одговор на состојбата, од јануари се планира воведување два одделни влеза – еден за жителите на Рим и еден за туристите.

Италијанските медиуми објавија дека се разгледува можност од 7 јануари туристите да плаќаат билет од две евра за посета на фонтаната, што, според неофицијални проценки, би можело да донесе значителни приходи во градскиот буџет. Сепак, Градскиот совет на Рим соопшти дека засега нема конечна одлука и дека станува збор само за опција која е предмет на анализа.

Фонтаната Треви е доцнобарокно архитектонско дело, изградена во 18 век, со ширина од 20 и висина од 26 метри, и претставува најголемата фонтана во градот. Таа неодамна беше прогласена за една од најдобрите туристички атракции според изборот на патниците за 2025 година.

Поради пренатрупаноста, од минатата година бројот на посетители е ограничен на максимум 400 лица во исто време, а воведен е и систем за организирано чекање во ред. И покрај тоа, гужвите остануваат сериозен проблем, а не е јасно дали евентуалната наплата на билети ќе придонесе за негово решавање, со оглед на континуираниот раст на туризмот во Рим.

Магазин

САД се закани со жестоки мерки поради острата казна на ЕУ за X на Маск

Администрацијата на американскиот претседател Доналд Трамп упати предупредување за можни протумерки кон европските компании поради „дискриминаторни“ мерки против американските услуги.

Во објава на платформата X, Уредот за трговски претставници на САД (USTR) го обвини Европскиот сојуз и некои членки за „дискриминаторни и проблематични тужби, даноци, казни и директиви против американските услуги“. Во исто време, USTR посочи дека европските компании како Accenture, DHL, Siemens и Spotify „слободно работат“ во САД.

„Ако ЕУ и земјите членки инсистираат на продолжување со ограничувањата и дискриминирачките мерки, САД нема да имаат друг избор освен да користат сите расположливи алатки за да се спротивстават на овие неправедни мерки“, се наведува во соопштението.

Ова следува по казната од 120 милиони евра што Европската комисија ја изрече на платформата X на Елон Маск за кршење на правилата за транспарентност според Актот за дигитални услуги. По казната, X го укина акаунтот за реклами на Европската комисија, а Маск спореди ја Унијата со нацистичка Германија.

ЕУ нагласи дека казната е изречена поради обесхрабрување на корисниците, оневозможување на истражувачите да дојдат до податоци и недостаток на транспарентност во документацијата за реклами. Трамп претходно ја критикуваше казната, велејќи дека „Европа се движи во погрешен правец“.