Црна Хроника

Македонци меѓу уапсените во голема акција за дрога во Србија – запленети над 2,4 тони

Српската полиција во координирана акција низ целата земја заплени повеќе од 2,4 тони наркотични средства и уапси голем број лица осомничени за трговија со дрога.

Најголемата заплена е извршена во Земун, каде што биле пронајдени речиси два милиони грама марихуана, скриени во торби и вреќи што осомничените ги префрлале меѓу возила. Полицијата извршила претреси и во Врање, Бор и Нови Сад, каде се откриени плантажи и лаборатории за одгледување и сушење марихуана.

Во Врање, во соработка со граничната полиција кон Северна Македонија, бил уапсен 41-годишниот А.Ѓ., кај кого биле откриени 910 растенија канабис со тежина од околу 450 килограми, како и импровизирана лабораторија и нелегално оружје. Во Бор, кај 33-годишниот И.Т. биле пронајдени кокаин, амфетамини и 24 растенија канабис.

Во Нови Сад, кај Н.Ѓ. (32) и С.А. (33) полицијата открила лабораторија со 51 растение, 115 помали стебла и сушена марихуана, додека на граничниот премин Прешево бил уапсен албански државјанин со 758 грама хероин.

Особено внимание привлече апсењето на државјанин на Северна Македонија, И.С., кој на автопатот Ниш–Лесковац превезувал 8,3 килограми кокаин скриен во автомобил „Форд“.

Во Белградската општина Палилула, пак, бил уапсен Бојан М. (45), кај кого полицијата пронашла 28 килограми марихуана, два килограми кокаин и над 81.000 евра во готово.

Српското МВР соопшти дека ова е една од најголемите акции против организирана трговија со дрога во последните години, спроведена со висок степен на координација и во соработка со македонските власти.

Црна Хроника

Маглата предизвика верижна сообраќајка во Скопје, сообраќајот се одвива отежнато

Попладнево на влезот во Скопје, веднаш по наплатната рампа кај Петровец, се случи верижна сообраќајна несреќа во која учествувале повеќе патнички возила.

Според сведоштва на граѓани објавени на социјалните мрежи, густата магла значително ја намалила видливоста, што довело до отежнато и забавено одвивање на сообраќајот во овој дел од патот. Возачите кои минуваат низ оваа делница апелираат на зголемена претпазливост и прилагодување на брзината на актуелните услови.

Полициски екипи се присутни на терен и вршат увид на местото на несреќата. Повеќе информации за причините и евентуалните последици од сообраќајката се очекуваат по завршување на истрагата.

Црна Хроника

Работник загина при несреќа на градилиште – врз него паднала машина за бетон

Работник од Република Албанија го загуби животот во тешка несреќа на работно место во близина на селото Требеништа, во општина Дебрца, информираат од Министерството за внатрешни работи.

Според МВР, на 19 декември 2025 година околу 16:10 часот во СВР Охрид било пријавено дека за време на изведување работни активности на трафостаница, врз Х.И. (44) од градот Либражд, Албанија, паднала работна машина – пумпа за бетон.

Мажот се здобил со тешки телесни повреди и со патничко возило бил пренесен во близина на аеродромот во Охрид, каде што бил преземен од екипа на Итната медицинска помош. И покрај укажаната помош, лекарите констатирале смрт.

На местото на несреќата извршен е увид од јавен обвинител, полициски службеници и претставници на Државниот инспекторат за труд. Надлежните институции преземаат мерки за утврдување на причините за несреќата и евентуална одговорност.

Црна Хроника

Уапсени 12 лица за дрога во училиште, половина од нив малолетни

Грчката полиција уапси 12 лица поради трговија со дрога во училиште во регионот Атика, меѓу кои шест се малолетници. Акцијата ја спровела Дирекцијата за безбедност на Атика, која открила организиран синџир за продажба на наркотични средства, јавуваат грчките медиуми.

Според информациите, осомничените продавале кокаин и хашиш, при што дел од нелегалните активности се одвивале во училишен објект. Надлежните соопштија дека дрогата била дистрибуирана и за време на петдневна училишна екскурзија.

Истрагата продолжува, а против уапсените ќе бидат преземени соодветни законски мерки.