Црна Хроника

Кривична пријава за Инспектор од МВР – Ова се причините

Одделот за внатрешна контрола, криминалистички истраги и професионални стандарди при МВР на РСМ до надлежното Основно јавно обвинителство за гонење на организиран криминал и корупција поднесе кривична пријава против А.Ќ. вработен како самостоен инспектор-главен дежурен во ДОЦ во РЦ за ГР Исток, поради постоење основи на сомнение дека сторил кривично дело – „Оштетување и неовластено навлегување во компјутерскиот систем“ по член 251 став 1 и став 4 од КЗ на РСМ.

Пријавениот, според документираните сознанија од истрагата, во повеќе наврати неовластено влегувал во компјутерскиот систем кој се користи во работењето на Министерството за внатрешни работи до програмата за изработка на плати во МВР, со туѓо корисничко име, при што направил измени во системот за евиденција на работните часови и ги променил компјутерските податоци за остварени работни часови. Притоа додал невистинити податоци за исплата на платата кај самиот себе и врз основа на тие изменети податоци од страна на Министерството за внатрешни работи му се исплатени плати и придонеси за плата, со што пријавениот се стекнал со противправна имотна корист на штета на министерството.

Воедно, ОВККИПС против А.Ќ. ќе поднесе и предлог за поведување на постапка за кршење на работниот ред и дисциплина и ќе изрече задолжителни мерки одземање на службеното оружје и муниција и отстранување од работното место, односно суспендирање до завршување на дисциплинската постапка.

Црна Хроника

Насилство меѓу ученици во Скопје: малолетник претепан пред основно училиште

Малолетно дете било физички нападнато од свои соученици пред основно училиште на подрачјето на општина Гази Баба, соопштија од полицијата.

Според пријавата во СВР Скопје, на 15 декември 2025 година во 11:30 часот, А.Џ. (37) од Скопје пријавила дека инцидентот се случил на 12 декември околу 12:00 часот, кога нејзиниот малолетен син бил нападнат од тројца негови соученици пред училишниот објект.

По пријавениот случај, надлежните служби започнале постапка за утврдување на сите околности поврзани со инцидентот. Од СВР Скопје информираат дека се преземаат соодветни мерки за целосно расчистување на случајот.

Црна Хроника

Почина поранешен ММА борец на 45 години

Поранешниот ММА борец Џеронимо „Мондрагон“ дос Сантос почина на 45-годишна возраст, откако трагично се удавил во реката Рио Негро во Бразил. Веста за неговата смрт беше потврдена по неколкудневна потрага, а телото беше пронајдено на неколку километри од местото каде што последен пат бил виден.

Несреќата се случила во саботата, на 13 декември, кога Дос Сантос престојувал на плажа покрај реката заедно со својот партнер. Тој решил уште еднаш да се нурне пред заминување, но повеќе не излегол на површината. Подоцна неговиот брат открил дека „Мондрагон“ не знаел да плива. Иако веднаш била организирана спасувачка акција со бродови, потрагата завршила трагично.

Телото било пронајдено во понеделникот, 15 декември, од нуркачи на противпожарната служба, потопено под карпи во речното корито. Општината Сао Габриел да Качоеира официјално ја потврди смртта и прогласи тридневна жалост.

Дос Сантос зад себе остави богата, но и турбулентна боречка кариера. Во професионалниот ММА имаше скор од 45 победи, 26 порази и едно реми, настапувајќи во повеќе меѓународни организации. Дел од својата кариера ја мина и во хрватската организација FNC, каде во септември 2022 година се бореше за титулата во тешка категорија.

Во 2012 година потпиша договор со UFC, но неговото деби никогаш не се реализираше откако медицинските тестови покажаа дека има хепатитис Б. Поради здравствените проблеми и недобиената дозвола за настап, две години подоцна побара раскин на договорот.

Неговата последна борба ја имаше во април годинава во Bare Knuckle Fighting Championship, каде со нокаут во првата рунда го совлада поранешниот UFC борец Алексеј Олеиник. Планираниот меч со Андреј Арловски во јуни беше откажан.

Смртта на Џеронимо „Мондрагон“ дос Сантос предизвика бројни реакции во боречката јавност, која го памети како борец со силен дух и необичен животен пат.

Црна Хроника

Брутален напад во Тетово: Маж претепан од четири лица на улица

На 15.12.2025 година во 22:20 часот во СВР Тетово, С.Р.(33) од с.Желино пријави дека на улица ,,113″ во Тетово, додека се движел со неговиот пријател, бил физички нападнат од четири лица. Според пријавеното, едниот од нив при нападот користел и метален предмет. Се преземаат мерки за расчистување на случајот.