Спорт

Ристовски за Newsmax Balkans: Македонија инвестира во спортот – нови базени, сали и спортски центри

Министерот за спорт, Борко Ристовски, во интервју за Newsmax Balkans зборуваше за приоритетите и идните планови на ресорот, нагласувајќи дека фокусот останува на инвестициите во спортската инфраструктура и системската поддршка за младите спортисти.

Ристовски потсети дека во првата година од постоењето на Министерството за спорт главен предизвик бил деблокирањето на заостанати проекти кои со години биле во застој. Меѓу нив се изградбата и пуштањето во употреба на неколку спортски базени, реконструкцијата на спортските сали во Радовиш и Ново Село, како и почетокот на реконструкцијата на салата „Рasadnik“.

„Нашата цел беше младите спортисти да добијат современи услови за тренинг, а локалните заедници инфраструктура за секојдневни спортски активности. Успеавме да завршиме работа која со години постоеше само на хартија,“ изјави министерот.

Во моментов е во тек изградбата на спортска сала на Воената академија, како и подготовките за спортски центар во близина на скопскиот аеродром. Дополнително, во Крушево започна изградба на современа спортска сала која ќе биде база за подготовка на македонските национални репрезентации.

„Верувам дека за две до три години ќе можеме да кажеме дека Македонија располага со респектабилна спортска инфраструктура. Тоа ќе значи услови за меѓународни натпревари, но уште поважно – простор каде младите ќе можат да се развиваат,“ додаде Ристовски.

Освен на инфраструктурата, Министерството работи и на подготовка на законски измени за зголемена транспарентност во финансирањето на спортот. Средствата, како што истакна министерот, мора да завршуваат кај вистинските корисници – клубови, федерации и млади таленти.

„Поддршката мора да биде јасна и транспарентна. Нашата цел е да изградиме систем во кој клубовите и федерациите ќе имаат сигурност во финансирањето, а младите спортисти вистинска шанса да го покажат својот потенцијал,“ рече тој.

Ристовски нагласи дека спортот е еден од најсилните инструменти за промоција на државата на меѓународна сцена и најави продолжување на соработката со локалните самоуправи, федерациите и спортските работници.

„Спортот е повеќе од рекреација, тој е дел од идентитетот и меѓународната афирмација на државата. Со вложувања во инфраструктура и поддршка за младите, Македонија може да стане регионален пример за развој на спортот,“ порача министерот.

Тој заклучи дека визијата на ресорот е спортот да стане национален приоритет и секое дете да има можност да се занимава со спорт:

„Со континуирана работа и посветеност, за три години можеме да направиме историски исчекор за спортот и да создадеме генерации кои со гордост ќе ја претставуваат Македонија.“

Спорт

ПСЖ и Фламенго во финалето за Интерконтиненталниот куп

Вечерва во 18:00 часот, на стадионот „Ал Рајан“ во Катар, во големото финале на Интерконтиненталниот куп, силите ќе ги одмерат Пари Сен Жермен и Фламенго. Французите го бркаат својот прв светски трофеј во историјата, додека Бразилците сакаат да се вратат на тронот по пауза од цели 44 години.

Тимот на Луис Енрике пристигнува во Доха со амбиција конечно да ја круниса својата европска доминација со глобален печат. Како актуелни шампиони на Европа, ПСЖ имаа привилегија на директен билет за финалето, но патот до овој момент не беше без трње. Се уште се под впечаток од летниот пораз од Челзи (0:3) во финалето на Светското клупско првенство, а притисокот е зголемен и поради неизвесната трка во домашното првенство каде Ленс им дише во врат.

Сепак, токму во Катар започна нивната златна серија со триумфот над Монако, а со враќањето на Усман Дембеле и голманот Лукас Шевалие, Енрике верува дека ќе успее да го земе трофејот. Единствен голем хендикеп останува отсуството на брзоногиот Ашраф Хакими.

Од другата страна стои „црвено-црната“ лавина од Рио де Женеиро. Фламенго преживува ренесанса под палката на Филипе Луис. Откако во само седум дена ги покорија Бразил и Јужна Америка (Копа Либертадорес), сега нивниот нишан е насочен кон светот.

Навивачите на Фламенго со децении го прераскажуваат митот за 1981 година и лекцијата одржана на Ливерпул (3:0). Денешниот тим, предводен со тактичката дисциплина, сака да го повтори тој подвиг. Иако настапот на голгетерот Педро е под знак прашалник, Фламенго покажа дека знае како со европските гиганти, потсетувајќи на неодамнешната победа над Челзи (3:1).

Спорт

Бразилецот Да Силва потпиша за Вардар – новитет во редовите на скопскиот гигант

Ракометниот клуб Вардар повлече значаен стратешки потег во пресрет на клучниот дел од сезоната. Жоао Педро да Силва (30) е новиот бек на линијата на „вардарци“. Неговиот ангажман, кој ќе трае две и пол сезони, е потврда за долгорочната визија на управата за враќање на врвот.

Стручниот штаб во Да Силва гледа профил на играч кој носи брзина, интелигентни решенија и потребна разновидност во офанзивата. Со оглед на тешките предизвици во Лига Европа кои следуваат во февруари и март, како и домашниот плеј-оф, Бразилецот доаѓа како клучно засилување во вистински момент. Неговата промоција во Скопје е закажана за почетокот на идната година, кога ќе бидат финализирани и последните детали од соработката.

Спорт

Лоши вести за македонскиот ракомет

Европската ракометна федерација (ЕФХ) го одреди новиот формат за Лигата на шампионите, а македонскиот ракометен шампион нема директно учество во најквалитетното натпреварување туку тоа ќе може да го оствари со барање за вајлд-карта.

Извршниот комитет го потврди системот, а рангирањето на федерациите е според резултатите од сезоните 2022/23, 2023/24 и 2024/25. На првите десет места се рангирани следните федерации: Германија, Шпанија, Франција, Данска, Полска, Унгарија, Романија, Португалија, Хрватска и Норвешка, а тоа значи дека овие држави имаат една загарантирано место во Лигата на шампионите. Овие федерации можат да побараат и по две вајлд карти, а ЕХФ ќе додели осум „специјални покани“.

Во натпреварувањето од следната сезона ќе бидат 24 екипи, поделени во шест групи по четири, а дванаесет од нив ќе се пласираат во главната рунда. Другите 12 екипи ќе продолжат во 1/16 финалето од Европската лига.