Балкан

Додик ќе бара од Путин поддршка за отцепување на Република Српска

Поранешниот претседател на Република Српска, Милорад Додик, најави дека во октомври ќе отпатува во Русија каде директно ќе побара од рускиот претседател Владимир Путин да ја поддржи идејата за отцепување на РС од Босна и Херцеговина.

Во изјава објавена од BBC на руски јазик, Додик призна дека и претходно се обидел да го убеди Путин, но дека рускиот лидер тогаш останал на ставот за поддршка на Дејтонскиот договор и територијалниот интегритет на БиХ. „Многу се промени од тогаш. Ќе се обидам да го убедам да го поддржи нашиот став за независност. Не знам дали ќе успеам, но сигурно ќе разговараме за тоа“, изјави Додик.

Додик по сила на закон повеќе не е претседател на РС, откако Судот на БиХ го осуди на една година затвор поради непочитување на одлуките на високиот претставник. Сепак, тој одбива да го напушти кабинетот во Бања Лука, а за 25 октомври веќе е закажан референдум на кој граѓаните ќе се изјаснат дали треба да се почитува одлуката на Судот за одземање на мандатот.

Според Додик, овој референдум е само „загревање“ за идни процеси на самоопределување. Тој изјави дека БиХ „не заслужува право на постоење“ и дека логично е Србите во РС да бараат статус на независна држава.

Во претходни изјави за прорускиот портал Sputnik, Додик најави дека исто така ќе побара Русија во октомври во Советот за безбедност на ОН со вето да го блокира продолжувањето на мисијата на ЕУФОР „Алтеа“ во БиХ.

Балкан

Заглавен европскиот пат: БиХ останува без одлука за старт на преговори со ЕУ

Советот на министри на Босна и Херцеговина денес не успеа да донесе одлуки што би овозможиле отворање на преговорите за членство со Европската Унија пред седницата на Европскиот совет закажана за 18 и 19 декември. Причина за тоа беше повторното одбивање на министрите именувани од Милорад Додик да се дискутира за два клучни реформски закона.

На дневниот ред, објавен минатата недела од претседателката на Советот на министри Борјана Кришто, беа предлог-законите за Судот на БиХ и за Високиот судски и обвинителски совет, како и одлуката за формирање канцеларија на главниот преговарач со ЕУ. Сепак, по ултиматумот од министрите за надворешна трговија и за финансии, овие точки воопшто не беа разгледувани.

Тие се заканија дека ќе го блокираат дневниот ред доколку се отвори расправа за реформските закони, што практично би значело и неодржување на седницата. Поради тоа, Кришто ги повлече спорните точки, а Советот разгледуваше само помалку значајни информации и технички прашања.

Властите на Република Српска не ги прифаќаат нацрт-законите подготвени од Министерството за правда, иако тие се изработени согласно препораките на Европската комисија. Дополнително, инсистираат главниот преговарач со ЕУ да доаѓа од СНСД, барање што партиите од бошњачко-граѓанскиот блок категорично го одбиваат.

Засега нема најава кога клучните реформски закони ќе се најдат повторно на дневен ред на Советот на министри или во државниот парламент. Сè поизвесно е дека Босна и Херцеговина ќе ја дочека 2026 година без јасна перспектива за започнување преговори со Европската Унија.

Иако земјата доби условно зелено светло за отворање преговори уште во март 2024 година, оттогаш нема конкретен напредок. Заедно со Косово, БиХ во моментов се наоѓа на дното од процесот на европска интеграција меѓу земјите од Западен Балкан.

Балкан

Грчките земјоделци повторно блокираа премин: Богородица ограничен за патнички возила

Граничниот премин Богородица од 18 часот попладнево е блокиран за сите видови сообраќај поради протест на грчките земјоделци, соопшти Автомото сојузот на Македонија.

Засега, на преминот можат да влегуваат само товарни возила од Грција кон Македонија, додека излез од Грција е дозволен само за товарни моторни возила. Патнички возила и автобуси засега не можат да ја користат граничната линија.

Автомото сојузот апелира на внимателност и следење на сообраќајните информации пред патувањето кон граничниот премин Богородица.

Балкан

Турски Ф-16 собори дрон над Црното Море

Турските воени сили соборија неидентификуван дрон кој се приближувал кон турскиот воздушен простор над Црното Море, соопшти Министерството за одбрана. Објектот бил „надвор од контрола“, а соборувањето се извршило на безбедна локација, надвор од населени места, за да се избегне потенцијална штета.

Инцидентот се случува во услови на зголемени регионални тензии, по нападите на украинските поморски дронови врз руски танкери во близина на турскиот брег. Турските воздухопловни сили реагирале со подигање на ловци Ф-16 откако дронот бил детектиран.

Претседателот Реџеп Таип Ердоган претходно ги осуди украинските напади, оценувајќи ги како сериозна закана за безбедноста на пловидбата, човечките животи и животната средина. Министерството за одбрана не соопшти дополнителни детали за точната локација и времето на инцидентот.