Скопје

Хаос со летот од Крит: Наместо во Белград, авион со 200 патници слета во Скопје

Необична ситуација се случи ноќеска на скопскиот аеродром, откако авион на авиокомпанијата Wizz Air кој требало да лета од Крит за Белград, слета во македонската престолнина со околу 200 патници, пренесува N1.

Летот, закажан 15 минути по полноќ, првично бил пријавен како празен, што предизвикало забуна кај полицијата и вработените на аеродромот во Скопје. Сепак, околу 4 часот утрото, патниците биле пренасочени и изненадени пристигнале во Скопје.

Една од патничките изјавила дека во текот на ноќта добивале СМС пораки за одложување, а потоа, без објаснување, биле упатени кон Скопје. По слетувањето биле задржани во авионот подолго време, а излез им бил дозволен дури откако една жена почувствувала здравствени проблеми. На крајот, патниците останале на празен аеродром додека не им бил обезбеден автобуски превоз кон Белград.

Пилотот им појаснил дека неговото работно време е завршено и дека повеќе информации ќе добијат на аеродромот, но и таму вработените биле збунети бидејќи им било пријавено дека летот е без патници.

Од Амбасадата на Србија патниците добиле одговор дека не може ништо да се стори, бидејќи „аеродромот во Белград не работи и не прима авиони“.

Според официјалните податоци, веб-страницата на белградскиот аеродром летот го прикажува како откажан, додека на скопскиот аеродром е евидентиран како реализиран, но со повеќе од три часа задоцнување. На веб-сервисот FlightRadar, пак, се забележува дека авионот наместо во Белград, навистина слетал во Скопје, без официјално образложение за причините.

Скопје

Николоски: Карпош добива нов урбан лик со реконструкција на над 15 улици

Преку петнаесетина улици ќе се реконструираат во општина Карпош со подршка на Владата. Општината полека ќе го смени урбаниот лик и ќе се развива, истакна вицепремиерот и министер за транспорт Александар Николоски при денешната посета на општина Карпош.

Николоски заедно со градоначалникот Сотир Лукровски извршија увид во реконструкција на ул. Јуриј Гагарин, проект кој се реализира со подршка на Министерството за транспорт, а во заедничка соработка со општината.

“ Ова беше заглавен проект, ова беше проект без разлика што имавме обезбедено средства, не можевме да го реализираме. Откако беше избран за градоначалник, заедно со службите во општината, успееја да ги решат сите предизвици на овој проект, да се решат проблемите и еве веќе се гради и ако се оди добро и не послужи времето до Нова година може да се заврши оваа улица, паркингот зад зградите и да се добие нов урбан лик на овој простор. Сакам да најавам дека дополнително на ова имаме уште еден проект кој се реализира со Светска банка во вредност од над 13 милиони денари, тоа е улицата Петар Чаулев, целосна реконструкција околу 600 метри што дополнително се надевам ќе допринесе за урбаниот развој на општината. На тоа додаваме уште дванаесетина проекти кои што ги резлизираме преку вториот повик на Владата и севкупно имаме значајни проекти за општина Карпош. Тука е и подршката на Владата, мојата лична подршка за дополнителни работи кои треба да ги направиме во Карпош. Со изборот на новиот градоначалник, со неговата напорна работа се гледаат промените и навистина сите имаме желба да помогнеме и да се случуваат убави работи во општина Карпош”-изјави вицепремиерот Николоски.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.