Балкан

По 30 години од војната: Мините продолжуваат да убиваат во Босна и Херцеговина

Деветнаесетгодишниот Мехмед Хасанамиџиќ трагично загина во минско поле во близина на Добој, централна Босна и Херцеговина, станувајќи уште една жртва на нелекуваните последици од војната од 1992 до 1995 година.

Според семејството, Мехмед се грижел за козите кои често се движеле во минските полиња, кога се случила несреќата. „Тој беше сè за мене. Работеше, беше вреден. Заедно се боревме за корка леб. Одеше таму горе да се грижи за козите што често талкаа во минските полиња. Се обидуваше да ги врати. И тука нешто пукна“, изјави неговата мајка, Ферида Хасанамдижиќ, за порталот Аваз.

Семејството живее во селото Хоџиќи, од кое Бошњаците биле протерани за време на војната, но многумина се вратиле по конфликтот. Многу други жители во минатото биле жртви на мини, со сериозни повреди или загуба на живот.

Според Босанскиот центар за акција против мини (MAC), од крајот на војната 1.781 лице било повредено од мини, од кои 624 починале. Во расчистувањето на минските полиња загинале и 53 деминери.

Повеќе од 800 квадратни километри од територијата на Босна и Херцеговина сè уште се минирани, со проценка дека се наоѓаат над 170.000 мини. Повеќе од 132.000 луѓе живеат во близина на овие опасни области.

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.