Република

„Мечо“ – малото вовче што ја освојува Битола со европски шмек

Битола доби туристичка атракција – малото вовче „Мечо“, кое за кратко време стана омилено меѓу најмладите и симбол на европскиот шмек во градот.

По големиот интерес на првиот училиштен ден, ЈП „Паркинзи“ – Битола реши да им подари бесплатни возења на дечињата на 11 и 25 септември. Директорот на претпријатието, Зоран Михајловски, изјави дека „Мечо“ е типичен градски патен воз, кој е општински и има за цел да биде привлечен, сладок и забавен за граѓаните.

Цената за едно возење е 50 денари, но, според Михајловски, вистинската вредност е во емотивниот ефект и радоста што ја предизвикува кај децата и туристите.

Слични мали туристички возови постојат во многу европски градови – Париз, Прага, Салзбург и Фиренца – и претставуваат дел од туристичкото искуство. „Мечо“ ја збогатува понудата на Битола, овозможувајќи полесно разгледување на градот и намалување на сообраќајниот метеж.

Иако има сезонски карактер и не функционира во лоши временски услови, вовчето повторно се враќа секоја пролет, како и за време на „Зимската приказна“. Според Михајловски, оваа атракција ќе биде дополнително развивана со нови туристички пакети, културни содржини и забавни програми.

„Мечо“ веќе успеа да стане препознатлив симбол на Битола и вистинска радост за најмладите битолчани.

Извор: vecer.press

Република

ВЛЕН најавува изборна офанзива: Работа за Гостивар, обединување за Врапчиште

Општините не смеат да бидат прибежиште за политичко преживување, туку одговорност за работа, развој и вистинска услуга кон граѓаните. Во тој дух, коалицијата ВЛЕН го продолжува консолидирањето на изборните структури во пресрет на локалните избори закажани за 11 јануари.

Во Гостивар, како што се посочува, граѓаните добро паметат дека последниот период на сериозна и посветена работа бил за време на раководењето на Невзат Бејта. Денес, велат од ВЛЕН, време е градот повторно да се врати на вистинскиот пат, да се работи и да се санираат штетите од импровизациите. Во таа насока се зајакнува и изборната организација, при што Бахар Шабани ја презема одговорноста за раководење со изборниот штаб.

Во Врапчиште, потребата од поголемо внимание, развој и подобра благосостојба е очигледна. Зулхајрат Демири, независен кандидат поддржан од ВЛЕН, се истакнува како обединувачка фигура со широка поддршка од граѓаните. Тоа, според коалицијата, се одразува и во организацијата на кампањата, каде за раководител на изборниот штаб е избран Буњамин Кадриу.

Од ВЛЕН порачуваат дека локалните избори на 11 јануари се избор меѓу работа и импровизација, меѓу одговорност и политичко преживување, нагласувајќи дека секогаш ќе бидат на страната на граѓанинот, работникот и секој глас што бара функционални општини и подобар живот.

Република

Четири тетовски села утре ќе бидат без струја

Дел од тетовските села Цепчиште, Јажинце, Доброште и Слатино утре, 23 декември 2025 година, ќе бидат без електрична енергија поради планирани прекини во дистрибутивната мрежа.

Според најавата, прекинот ќе трае од 09:00 до 14:00 часот. Во селото Џепчиште без струја ќе останат објекти кои се наоѓаат кон центарот на селото, додека во Јажинце прекинот ќе ги зафати објектите во близина на џамијата. Во Доброште и Слатино без напојување ќе бидат делови од селата, согласно планираните активности.

Од надлежните апелираат граѓаните навреме да ги планираат своите обврски и да преземат потребни мерки за време на прекинот.

Република

Хумана новогодишна акција: Дедо Мраз пристигна на мотор кај децата од „Кочо Рацин“ во Битола

Моторџиите од МК Конзули Битола денеска организираа хумана новогодишна посета во Ресурсниот центар Кочо Рацин во Битола, носејќи го Дедо Мраз на мотор за да им подели пакетчиња на децата.

Настанот помина во празнична атмосфера, исполнета со детска радост, насмевки и искрена возбуда. Од МК „Конзули“ истакнаа дека ваквите моменти се потсетник на вистинската смисла на празниците – хуманост, споделување и грижа за најмладите.

Тие упатија благодарност до вработените во ресурсниот центар за топлиот пречек и посветеноста што секојдневно ја вложуваат во грижата и образованието на децата, најавувајќи дека и во иднина ќе продолжат со вакви хуманитарни активности.

Извор: Апла.мк