Република

Тоневски за А1он: Време е да го потсетиме Пробиштип за неговиот потенцијал

Пробиштип е мала, но динамична општина која се соочува со големи предизвици – од економска зависност и ограничени буџетски ресурси, до иселувањето на младите и потребата од нови инвестиции. Кандидатот за градоначалник од редовите на ВМРО-ДПМНЕ, Тони Тоневски, има долгогодишно искуство во јавната сфера како директор на „Булмак 2016“ и како градоначалник кој раководеше со општината два мандати. Во ова интервју тој зборува за својата визија за иднината на Пробиштип, за плановите за отворање нови индустриски зони и привлекување инвеститори, како и за решавањето на проблеми кои со години го оптоваруваат градот, како јаловишната депонија и недоволната патна поврзаност. Посебен акцент тој става на младите – на мерките за нивно задржување, создавање услови за сопствен дом и поддршка за нивните идеи и бизниси.

Веќе имате искуство од два мандати како градоначалник на општина Пробиштип. Кои се најзначајните предизвици со кои денес се соочува општината и што сметате дека недостасува за да напредува подобро?

Тоневски: Нашиот Пробиштип е мала општина, но со големо срце. Како една од помалите општини во државата, се соочува со ограничени буџетски приходи и силна економска зависност од неколку поголеми индустриски капацитети. За да обезбедиме одржлива финансиска стабилност – и за локалната самоуправа и за граѓаните, потребно е стратешко вложување во диверзификација на економијата. Значителен предизвик е и иселувањето од Пробиштип, проблем кој речиси целосно беше запоставен во последните неколку години. За надминување на овие предизвици, потребен е сериозен и системски приод кој ќе роди одржливи резултати на долги стази.

Клучен приоритет за сузбивање на овие предизвици е создавање на нови индустриски зони и привлекување свежи инвестиции кои ќе продуцираат нови работни места, а со самото тоа и зголемена конкурентност и повисоки плати. Покрај тоа, Пробиштип располага со значителни природни ресурси и потенцијали за развој на туризмот и земјоделството. Само со вистинско менаџирање, може да ја позиционираме општината како важен центар на мапата на економските и туристичките промотори.

Силен акцент ставаме на младите и затоа во изборната програма предвидуваме посебни поволности и мерки за задржување на младите во општината. Нема да е лесно, но со отворена врата и подадена рака кон граѓаните верувам дека изгубената доверба во институциите и целокупниот систем полека ќе се врати и заедно ќе ја градиме нашата иднина, во Пробиштип, каде што е домот.

Целото интервју може да го прочитате на a1on.mk

Република

Проданоски: Наставата на мајчин турски јазик е темел на културниот идентитет и соживотот

По повод Денот на наставата на турски јазик, градоначалникот на Општина Прилеп, Дејан Проданоски, упати искрени честитки до сите наставници, ученици и образовни работници кои ја негуваат и унапредуваат наставата на мајчин турски јазик.

Тој упати посебни честитки до колективот и учениците од ООУ „Св. Кирил и Методиј“ во село Канатларци, каде што успешно се реализира настава на турски јазик и со голема посветеност се негува јазикот како значаен дел од културниот идентитет.

Проданоски ја истакна важноста од негувањето на мајчиниот јазик и почитувањето на повеќекултурните вредности, нагласувајќи дека мајчиниот јазик е нераскинлив дел од идентитетот, традицијата и културното наследство на секој народ, а неговото почитување придонесува за меѓусебно разбирање, почит и пријателство во мултикултурно општество.

Општина Прилеп, како што беше нагласено, ќе продолжи посветено да ги негува повеќекултурните вредности и да го чува културниот идентитет на сите заедници, вклучително и на турската заедница, со цел создавање подобри услови за изучување и унапредување на наставата на мајчин турски јазик.

Република

Коњановски: Мерките за младите мора да станат конкретни политики и буџетски приоритети

Во Битола денеска се одржа четвртата средба на Регионалната платформа за млади, на која учествуваа граѓански организации и градоначалници од Пелагонискиот регион. На настанот се обратија претседателката на Про Локал Емилиа Ѓероска, амбасадорот на Швајцарија во Македонија Кристоф Зомер, како и градоначалникот на Битола, Тони Коњановски.

Во рамки на дискусијата за младински политики по мерка на младите, беше отворена дебата за предизвиците и потребите на младите во областите на социјалната заштита, образованието, спортот, младинското учество и јавниот превоз во Пелагонискиот регион.

Градоначалникот Коњановски истакна дека локалните самоуправи се соочуваат со бројни ограничувања при имплементацијата на младинските политики, но нагласи дека токму регионалната соработка овозможува поефикасен пристап.

„Сите сме свесни дека младинските политики не се едноставни за имплементација поради ограничени финансиски и човечки ресурси и различни реалности меѓу општините. Затоа Регионалната платформа за млади има посебна вредност – ни овозможува заеднички да ги адресираме предизвиците, преку размена на искуства и креирање применливи мерки за целиот регион“, рече Коњановски.

Тој додаде дека анализите и предлог-мерките за образованието, социјалната заштита, младинското учество, спортот и јавниот превоз се клучни за иднината на младите и нивната одлука дали ќе останат во своите општини и ќе имаат доверба во институциите.

„Наша обврска е овие мерки да не останат само препораки, туку да ги преточиме во конкретни политики, одлуки и буџетски приоритети“, потенцираше градоначалникот.

На форумот се говореше и за нееднаквите можности за младите во руралните во споредба со урбаните општини, како и за првичните наоди од националната проценка на влијанието на Законот за младинско учество и младински политики. Беа отворени и прашања поврзани со улогата на младинските организации и националните стратешки насоки за подобрување на положбата на младите.

Настанот беше организиран од Про Локал, а проектот е поддржан од Владата на Швајцарија преку програмата Цивика Мобилитас.

Република

Прекин со водоснабдувањето во дел од Тетово поради дефект со електрична енергија

Ги информираме жителите на населбата 146 дека, поради прекин на електричната енергија, бевме принудени да го прекинеме снабдувањето со вода за пиење од филтер-станицата. Снабдувањето ќе биде повторно воспоставено веднаш по санирањето на дефектот од страна на ЕВН.

Ви благодариме за разбирањето.