Скопје

Крим-полиција истражува дали пожарот во „Дрисла“ е подметнат

Криминалистичката полиција денеска разговара со вработените во депонијата „Дрисла“ за да утврди дали пожарот што изби пред неколку дена бил подметнат од внатре или, како што рече директорот на Дирекцијата за заштита и спасување Стојанче Ангелов, некој преку ридиштата влегува со канта бензин.

„Горење со видлив оган нема, има само активно чадење кое значително е намалено. Се работи со засилена механизација за затрупување на просторот, но депонијата е лесно достапна за злонамерници. Дознавав и за најмалку три обиди за палење што биле брзо изгаснати“, изјави Ангелов.

Од ЈП „Дрисла“ апелираа до МВР да спроведе истрага и да ги санкционира, како што велат, потпалувачите на пожарите кои можеби имаат политички мотив. Во соопштението нагласија дека депонијата работи по највисоки стандарди и дека од 2022 година отпадот се обработува со автоклав, без согорување.

Премиерот Христијан Мицкоски, пак, посочи сомнеж дека пожарот е намерно предизвикан, наведувајќи дека во јавните претпријатија каде има кадри од ДУИ „се случуваат вакви работи“. „Чудно е како пожар кој беше речиси ставен под контрола одеднаш се распламти. Тоа ќе го истражиме и ќе обезбедиме докази“, изјави Мицкоски.

Депонијата „Дрисла“ е под надлежност на Град Скопје, а за в.д. директор во февруари беше назначен Самир Хусени. Претседател на Управниот одбор е Даме Димитровски, советник за животна средина на премиерот.

Извор: sdk.mk

Скопје

Николоски: Карпош добива нов урбан лик со реконструкција на над 15 улици

Преку петнаесетина улици ќе се реконструираат во општина Карпош со подршка на Владата. Општината полека ќе го смени урбаниот лик и ќе се развива, истакна вицепремиерот и министер за транспорт Александар Николоски при денешната посета на општина Карпош.

Николоски заедно со градоначалникот Сотир Лукровски извршија увид во реконструкција на ул. Јуриј Гагарин, проект кој се реализира со подршка на Министерството за транспорт, а во заедничка соработка со општината.

“ Ова беше заглавен проект, ова беше проект без разлика што имавме обезбедено средства, не можевме да го реализираме. Откако беше избран за градоначалник, заедно со службите во општината, успееја да ги решат сите предизвици на овој проект, да се решат проблемите и еве веќе се гради и ако се оди добро и не послужи времето до Нова година може да се заврши оваа улица, паркингот зад зградите и да се добие нов урбан лик на овој простор. Сакам да најавам дека дополнително на ова имаме уште еден проект кој се реализира со Светска банка во вредност од над 13 милиони денари, тоа е улицата Петар Чаулев, целосна реконструкција околу 600 метри што дополнително се надевам ќе допринесе за урбаниот развој на општината. На тоа додаваме уште дванаесетина проекти кои што ги резлизираме преку вториот повик на Владата и севкупно имаме значајни проекти за општина Карпош. Тука е и подршката на Владата, мојата лична подршка за дополнителни работи кои треба да ги направиме во Карпош. Со изборот на новиот градоначалник, со неговата напорна работа се гледаат промените и навистина сите имаме желба да помогнеме и да се случуваат убави работи во општина Карпош”-изјави вицепремиерот Николоски.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.