Република

Бранислав Светозаревиќ носител на советничката листа на ВМРО-ДПМНЕ во Тетово

ВМРО-ДПМНЕ ја претстави советничката листа за Општина Тетово, чиј носител ќе биде историчарот и архивист Бранислав Светозаревиќ Покорни.

„За Тетово со чесност, визија и луѓе кои знаат што значи љубов кон татковината. Носител на советничката листа е нашиот Бранислав Светозаревиќ – човек кој ја чува вистината за Македонија и кој од 2010 до 2018 година го водеше Музејот на македонската борба“, изјави Александар Велјаноски, претседател на Општинскиот комитет на партијата.

Светозаревиќ, кој зад себе има богато искуство во областа на историјата и културното наследство, во Советот на Општина Тетово влегува со јасна визија за развој на градот, но и со цел да придонесе за зачувување на македонската историска меморија.

„Заедно со голем тим од докажани луѓе влегуваме во Советот со огромно знаење и со јасна визија како да го направиме градот место што сите го посакуваме“, порача Светозаревиќ.

Со неговиот избор, ВМРО-ДПМНЕ најавува нова енергија и посветеност во локалното управување, фокусирајќи се на чесност, професионализам и вистински патриотски вредности.

Република

Повеќе делови од Тетово утре без електрична енергија

Повеќе делови од Тетово утре, 17 декември 2025 година, ќе останат без електрична енергија поради планирани прекини во дистрибутивната мрежа.

Според најавата, прекините ќе се одвиваат во периодот од 09:00 до 14:30 часот и ќе зафатат различни делови од градот. Без струја ќе бидат објекти на улицата „Борис Кидрич“, како и делови во кругот на поранешната печатница „Напредок“.

Дополнително, прекин е најавен и за делови од Тетово во населбите Два Бреста и Певчина, каде електричната енергија ќе биде исклучена во периодот од 09:20 до 13:00 часот.

Од надлежните служби информираат дека станува збор за планирани активности и апелираат до граѓаните навремено да ги прилагодат своите обврски.

Република

Лажни дојави на бомби: како се обезбедуваат училиштата во Македонија

Министерот за внатрешни работи, Панче Тошковски, потврди дека лажни дојави на бомби се забележани во повеќе градови и дека секогаш се постапува согласно антитерористички протоколи, без разлика дали дојавата е во училиште или на друго место со поголем број граѓани.

Министерката за образование и наука, Јаневска, истакна дека упатството за постапување по дојави на бомби е доработено и доставено до сите училишта, но МОН нема прецизна информација како се спроведува на терен. Таа посочи на несоодветна комуникација помеѓу врвните институции и локалните структури, додавајќи дека обврски имаат и градоначалниците и директорите на училиштата, особено во делот на евакуацијата и превозот на учениците.

„Сакам да ве уверам дека постапуваме согласно стандарди и протоколи како и останатите европски земји, делуваме превентивно и со целосна грижа за безбедноста на граѓаните, особено на децата“, изјави Тошковски. Тој додаде дека при појава на проблеми, тие се решаваат во најбрзо време и дека безбедноста на учениците останува прв приоритет.

Министерот потенцираше дека МВР сега многу поефикасно се справува со лажните дојави и дека максимално се преземаат сите дејствија во надлежност на министерството.

Република

Намалена видливост поради магла: внимателно на овие патишта

Поради појава на магла, видливоста во околината на Дебар е намалена до 50 метри, соопшти Автомото сојузот на Македонија (АМСМ).

Сообраќајот на државните патишта се одвива непречено, со претежно суви коловози, додека надвор од градските средини интензитетот на сообраќај е умерен. На граничните премини од македонска страна нема подолги задржувања за влез и излез од државата.

АМСМ препорачува возачите да се движат со прилагодена брзина, да ги почитуваат поставените сообраќајни знаци и внимателно да управуваат со возилата, особено на патиштата низ котлините, речните долини и клисурите каде постои ризик од одрони.

Посебна внимателност се советува на делниците: Катланово – Велес, Маврово – Дебар – Струга, Виница – Берово и Кочани – Делчево.