Петгодишно девојче од Србија за малку избегнало трагедија кога волк ја нападнал на плажа во близина на Неос Мармарас, Грција. Животното се појавило ненадејно и се обидело да го зграпчи девојчето за половината, но мајката Ирена Пеиќ реагирала во секунда – ја зграпчила ќерката и почнала да трча. Еден човек од плажата со камења го одвратил волкот, кој потоа бил избркан од дворот на апартманот.

Девојчето поминало со гребнатина на грбот и веднаш било однесено во болница, каде примило вакцини и антибиотици.

Мајката изјави дека се спасиле благодарение на присебната реакција и помошта на непознатиот човек. Овој случај е петти напад на волк во областа за само неколку дена – претходно биле нападнати жена и куче. Се претпоставува дека по неодамнешниот пожар, животните се одвоиле од глутницата и се спуштиле кон населбите.