Скопје

Истражна постапка по пожарот во Трубарево: кој ќе одговара за складирањето на електронски отпад?

По пожарот што го зафати објектот за електронски отпад на „Ф-Групација“ во Трубарево, се отвораат многу прашања околу одговорноста и безбедноста на ваквите објекти. Инспекциите на терен земаат примероци од вода, воздух и почва, за да утврдат какво е загадувањето и дали се направени пропусти во работењето на објектот и издавањето на дозволи.

Директорката на Инспекторатот за животна средина, Ивана Гиновска, истакна дека објектот поседува важечка дозвола за управување со отпад издадена во 2021 година, со важност до 2031 година. Сепак, истрагата ќе треба да покаже дали фирмата водела точна евиденција за увоз, извоз и преработка на отпадот. За прашањата поврзани со здравјето на жителите, одговор ќе даде Институтот за јавно здравје.

Сè уште не е утврдена точната причина за пожарот. Првиот човек на Дирекцијата за заштита и спасување, Стојанче Ангелов, како и премиерот Христјан Мицкоски, се сомневаат дека станува збор за хибриден напад од внатрешен и надворешен фактор. Министерот за животна средина и просторно планирање, Изет Меџити, нагласи дека одговорност и казни мора да имаат, иако лично не се чувствувал одговорен бидејќи цел ден бил во комуникација со институциите на терен.

„Ф-Групација“, која работи од 1998 година и е овластена за собирање и преработка на електронски отпад, батерии и акумулатори, претрпе непроценливи штети во пожарот. На ниво на земјата постојат околу 50 слични објекти, но „Ф-Групацијата“ е најголемата од ваков тип, соопшти Инспекторатот.

МВР информираше дека привеле четворица лица, меѓу кои сопственикот и управителот на погонот, како и уште две лица, во рамки на истрагата за причините и одговорноста за пожарот.

Скопје

Николоски: Карпош добива нов урбан лик со реконструкција на над 15 улици

Преку петнаесетина улици ќе се реконструираат во општина Карпош со подршка на Владата. Општината полека ќе го смени урбаниот лик и ќе се развива, истакна вицепремиерот и министер за транспорт Александар Николоски при денешната посета на општина Карпош.

Николоски заедно со градоначалникот Сотир Лукровски извршија увид во реконструкција на ул. Јуриј Гагарин, проект кој се реализира со подршка на Министерството за транспорт, а во заедничка соработка со општината.

“ Ова беше заглавен проект, ова беше проект без разлика што имавме обезбедено средства, не можевме да го реализираме. Откако беше избран за градоначалник, заедно со службите во општината, успееја да ги решат сите предизвици на овој проект, да се решат проблемите и еве веќе се гради и ако се оди добро и не послужи времето до Нова година може да се заврши оваа улица, паркингот зад зградите и да се добие нов урбан лик на овој простор. Сакам да најавам дека дополнително на ова имаме уште еден проект кој се реализира со Светска банка во вредност од над 13 милиони денари, тоа е улицата Петар Чаулев, целосна реконструкција околу 600 метри што дополнително се надевам ќе допринесе за урбаниот развој на општината. На тоа додаваме уште дванаесетина проекти кои што ги резлизираме преку вториот повик на Владата и севкупно имаме значајни проекти за општина Карпош. Тука е и подршката на Владата, мојата лична подршка за дополнителни работи кои треба да ги направиме во Карпош. Со изборот на новиот градоначалник, со неговата напорна работа се гледаат промените и навистина сите имаме желба да помогнеме и да се случуваат убави работи во општина Карпош”-изјави вицепремиерот Николоски.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.