Скопје

Министерството за спорт генерален покровител на големиот ММА спектакл -Арммада 14 во Скопје

Под генерално покровителство на Министерство за спорт, во организација на агенцијата Арммада и Македонската ММА федерација, вчера во СЦ „Јане Сандански“ во Скопје се одржа настанот – Арммадa 14.

Во боречката програма на овој ММА спектакл настапија 16 борци од Македонија, Молдавија, Грузија, Србија, Босна и Херцеговина, Црна Гора, Кипар и од Германија.

– Македонската публика и сите љубители на боречките спортови имаа ретка можност во живо да видат квалитетни борби и познати борци во ММА. Министерството за спорт како комплетен покровител го поддржа овој настан кој значи голема промоција на спортот кој е сѐ позастапен во Македонија и негово приближување до публиката – рече министерот за спорт, Борко Ристовски.

Овој најголем ММА спектакл што се одржал во Македонија во последниве години, беше крунисан со победи на македонските борци Даниела Алексовска, Марко Трајановски и Коста Георгиевски кои покажаа дека Македонија има борци со кои може да се гордее.

Даниела Алексовска ја воодушеви арената со сензационална победа уште во првата рунда. Македонската репрезентативка со маестрален арбар ја совлада својата противничка, Флацеа Алда од Молдавија, во последната минута од воведната рунда.

Марко Трајановски го запиша својот прв полупрофесионален триумф со убедлива судиска одлука против Петар Кликовац од Србија по целосни три рунди, а Костадин Георгиевски извојува победа со едногласна одлука на судии над Раде Новаковиќ од Србија.

-Ова е прв ваков настан што се организира во Македонија во последниве 15 години. Презадоволен сум од интересот, од поддршката и од тоа како помина целиот настан кој се пренесуваше и директно на каналот Арена фајт. Имавме убави борби, извонредни победи и најважно – немаше повреди. Овој настан е извонредна можност за популаризација на спортот и за промоција на државата – истакна претседателот на Македонската ММА федерација, Ивица Алексовски.

Скопје

„Зелен хуман град“ бара забрана за огномети во Скопје: Токсичните честички и бучавата сериозно го загрозуваат здравјето и безбедноста на луѓето и животните

Граѓанската иницијатива „Зелен хуман град“ предлага забрана за употреба на огномети во Скопје, потенцирајќи дека традиционалните прослави и забави со експлозивни материи со децении го загрозуваат здравјето на луѓето, животната средина и безбедноста на животните.

„Огнометите ослободуваат големи количини ПМ 2,5 и ПМ 10 честички, токсични гасови како CO, SO₂, NOx, како и тешки метали – бариум, бакар, стронциум и олово. Овие супстанции загадуваат воздух, вода и почва, а најранливите групи, како деца, бремени жени и лица со хронични респираторни или кардиоваскуларни заболувања, се директно погодени“, велат од иницијативата.

Тие предупредуваат дека огнометите предизвикуваат и сериозни психолошки реакции кај луѓето: анксиозност, панични напади, флешбекови кај лица со посттрауматски стрес, сензорни колапси кај луѓе со аутизам, како и ризик од епилептични напади кај лица со фотосензитивна епилепсија.

Последиците врз животните се исто така драматични. „Околу 70–75% од домашните миленици доживуваат силен страв, тресење, паника, обиди за бегство и повреди. Кај дивите животни се забележани масовни повреди, особено кај птиците, како и висок стрес, дезориентација и смрт“, додаваат од „Зелен хуман град“.

Иницијативата потсетува дека Законот за заштита од експлозивните материи веќе предвидува забрана за употреба на огномети без дозвола и стручно лице, но законот ретко се почитува на терен.

„Ги повикуваме сите советнички групи во Советот на Град Скопје да ја поддржат оваа иницијатива и да покажат дека здравјето на луѓето и животните, особено на најранливите жители на Скопје, е приоритет“, заклучуваат од „Зелен хуман град“.

Скопје

Виртуелно патување низ Кисела Вода – првата скопска општина со дигитална прошетка

Општина Кисела Вода влегува во новата дигитална ера, поставувајќи нов стандард за локална самоуправа.! Со лансирањето на спектакуларниот 360° виртуелен проект, наречен „Општина Кисела Вода НА ДЛАНКА – 360°“, таа стана првата скопска општина која доби ваква целосна, реална и интерактивна презентација.

Овој модерен дигитален потфат ја трансформира општината во достапен виртуелен простор. Граѓаните, учениците, но и сите посетители и туристи, сега имаат уникатна можност виртуелно да „прошетаат“ низ Кисела Вода, истражувајќи ги нејзините најзначајни точки – од образовни и културни центри, до спортски терени и духовни локации.

Со над 500 панорами снимени и од воздух и од земја, поврзани во беспрекорна интерактивна прошетка, корисниците добиваат реалистично искуство, комплетирано со сите релевантни информации за секоја локација.

Од Општината истакнуваат дека оваа иновативна алатка има далекусежни последици.

Проектот претставува едукативен пресврт. Учениците сега можат да ја користат виртуелната прошетка за полесно разбирање на содржините по историја, географија и други предмети – учењето никогаш не било поинтерактивно.

Од туристички аспект, „Кисела Вода НА ДЛАНКА“ е моќна промотивна алатка. Потенцијалните посетители сега можат однапред да ја истражат целосната понуда на општината, што создава силен потенцијал за привлекување нови туристи.

Со овој проект, Кисела Вода ја докажува својата посветеност кон иновациите и транспарентноста, ставајќи го секое ќоше од општината буквално во рацете на своите жители и гости.

Видеото може да го погледнете на: Facebook

Скопје

Дел од Сарај и високата зона во Ѓорче Петров денес без вода

Како што информираат од ЈП „Водовод и канализација“ – Скопје, денеска е регистриран прекин во водоснабдувањето за повеќе населени места.

Прекинот е предизвикан од дефект на затворач со пречник Ф-350 мм на улица 20 во населбата Сарај. Прекинот ќе трае од 07:30 часот до целосно санирање на дефектот.

Без вода ќе останат корисниците од следниве населени места во Општина Сарај: Лака, Крушопек, Грчец, Шишево, Глумово, Горна и Долна Матка, Арнакија, Љубин и Сарај

Исто така, прекинот ги зафаќа и високите зони, односно повисоките катови на зградите во населбата Ѓорче Петров.