Скопје

Ѓорѓиевски: Започна изградбата на првата училишна спортска сала во Припор

Градоначалникот на Кисела Вода, Орце Ѓорѓиевски, денес направи увид во градежните активности за изградба на првата училишна спортска сала во населбата Припор. Новата сала ќе биде сместена во дворот на ПОУ „Круме Кепески“, ќе се простира на 500 квадратни метри и според планот, се очекува да биде завршена во рок од две години.

Проектот е овозможен со поддршка од Владата на Република Македонија, по успешната апликација на Општина Кисела Вода на повикот за капитални проекти. Салата ќе овозможи современи услови за спорт и рекреација на учениците и младите од Припор, а дополнително ќе се изврши и целосно партерно уредување на училишниот двор.

„Со изградбата на оваа спортска сала инвестираме во подобро образование, здрави навики и развој на младите генерации во Припор,“ истакна Ѓорѓиевски.

Во изминатите четири години, Општина Кисела Вода реализираше или започна изградба и реконструкција на повеќе училишни спортски сали, вклучувајќи ги Пинтија, „Невена Георгиева Дуња“, „Кузман Јосифовски Питу“, „Партение Зографски“ и „Климент Охридски“. Во моментов се подготвува документација за нова сала во ООУ „Кузман Шапкарев“, а салата „Расадник“ се реконструира темелно во соработка со Министерството за спорт.

Проектите се дел од стратешката цел на општината за унапредување на спортската инфраструктура, образование и квалитетот на живот на младите во Кисела Вода.

Скопје

Густа магла предизвика застој на скопскиот аеродром

Густата магла во скопската котлина денеска предизвика пореметување во авиосообраќајот на Меѓународниот аеродром Скопје, при што неколку летови доцнат, а еден е откажан. Временските услови влијаат на слетувањата и полетувањата, информираат од аеродромот.

Најголемо доцнење е регистрирано кај летот на „Пегасус“ од Истанбул (Сабиха Гокчен), кој наместо во 09:55 ќе слета во 11:25 часот. Летот на „Виз Ер“ од Дортмунд ќе пристигне со половина час доцнење, додека летот на „АЏет“ од Истанбул, предвиден за пладне, е откажан. Летовите од Нирнберг, Фридрихсхафен и Виена засега се реализираат според распоредот.

Доцнења има и кај заминувањата. Летот на „Виз Ер“ за Париз (Бове), предвиден за 12:25, ќе полета во 13:00, а летот на „Туркиш Ерлајнс“ за Истанбул е одложен за 1 час и 20 минути, со полетување во 14:20. Аеродромот ги советува патниците редовно да ја следат официјалната веб-страница за најнови информации.

Скопје

Меџити: Образованието на мајчин јазик е темел на еднаквост и соживот

Денеска беше одбележан Денот на турското образование, во организација на Основното училиште Тефејјуз, институција со долга традиција во образованието на мајчин јазик. Настанот беше посветен на значењето на турското образование во Северна Македонија, неговата улога во зачувувањето на културниот идентитет, како и на континуираниот придонес на турската заедница во образовниот и општествениот живот.

Градоначалникот на Чаир, Изет Меџити истакна дека ваквите настани ја потврдуваат вредноста на образованието на мајчин јазик како клучен елемент за почит, еднаквост и соживот во мултиетничкото општество. Тој нагласи дека институционалната поддршка за образованието на мајчин јазик останува јасна и недвосмислена заложба.

Според Меџити, почитувањето и унапредувањето на образованието на мајчин јазик за сите заедници претставува основа за еднаквост, општествена кохезија и градење инклузивно општество во кое секој граѓанин има еднакви можности.

Скопје

Активирани алармантни мерки во Скопје – газдите треба да ги ослободат од работа следниве категории на лица

Министерството за животна средина и просторно планирање информира дека според податоците од Државниот автоматски мониторинг систем за квалитет на амбиенталниот воздух и добиената временска прогноза од Управата за хидрометеоролошки работи, прагот на алармирање на суспендирани честички со големина до 10 микрометри (надминување на вредноста од 150 mg /m3 во текот на два последователни денови) е надминат на мерните места во Скопје – Центар, Гази Баба, Карпош, Лисиче и Ректорат.

Прагот на алармирање е дефиниран во Уредбата за изменување и дополнување на Уредбата за гранични вредности за нивоа и видови на загадувачки супстанции во амбиенталниот воздух и прагови на алармирање, рокови за постигнување на граничните вредности, маргини на толеранција за гранична вредност, целни вредности и долгорочни цели (Службен весник на Република Македонија бр. 183 од 14.12.2017 година).

Во табелата се прикажани среднодневните концентрации на PM10 на мернoто место и деновите каде има појава на надминување на праг на алармирање.

Согласно настанатата состојба за мерните места во Скопје – Центар, Гази Баба, Карпош, Лисиче и Ректорат важат следните мерки:

Да се интензивираат вонредните инспекциски надзори на инсталациите со А-Интегрирана еколошка дозвола

Да се интензивираат вонредните инспекциски надзори на терен за контрола на инсталациите со Б-Интегрирани еколошки дозволи и Елаборати

Инсталациите со континуиран мониторинг да овозможат јавен пристап на измерените податоци

Да се интензивираат вонредните контроли на техничката исправност на возилата, особено оние со дизел горива и нерегистрирани возила

Да се интензивираат вонредните контроли на градилиштата

Забрана на горење на отворено

Се препорачува на сите правни субјекти (работодавци) да ги ослободат од работни обврски бремените жени, лицата постари од 60 години, како и лицата со хронична астма, прележан миокарден инфаркт или мозочен удар, без разлика на возраста, со препорака на матичен лекар

Се препорачува на сите правни субјекти (работодавци) да го реорганизираат работното време и лицата кои работат на отворено да работат од 11.00 до 17.00 часот

Се препорачува да не се организираат спортски натпревари и други културни манифестации на отворено.