Според извештајот Postbank Wohnatlas 2025, просечниот стан во Германија со површина од околу 80 метри квадратни чини околу 231.000 евра, додека со дополнителни трошоци како данок, такси и нотари, вкупната цена достигнува околу 260.000 евра.

Најевтините станови се наоѓаат во источниот дел на Германија, особено во помалите градови и села, каде цената за стан од 80 метри квадратни со сите дополнителни трошоци може да изнесува и помалку од 85.000 евра. Во овој случај, месечната рата за кредит изнесува околу 300 евра, што е достапно за домаќинства со бруто плата од околу 1.300 евра.

Станбените цени драстично се зголемуваат во големите градови. Во Берлин, Франкфурт и Хамбург, за стан од иста големина е потребна бруто плата од над 13.000 евра месечно, додека во Минхен тоа изнесува над 18.500 евра, што го прави најскапиот град за купување стан во Германија.