Балкан

Бугарските здруженија во Србија алармираат: без итни мерки ќе згаснат културните центри

Седум бугарски културни и образовни здруженија во Србија бараат итна реакција поради застојот на Програмата за поддршка на бугарските заедници во странство за 2025 година. Писмото е испратено преку Амбасадата и Генералниот конзулат на Бугарија.

Програмата, усвоена во 2020 година и завршена на крајот од 2024-та, во изминатите пет години овозможи десетици проекти за зачувување на културата, образованието и идентитетот на бугарските малцинства во Србија, Албанија, Косово, Украина, Молдавија и Северна Македонија.

Иако Министерството за надворешни работи предложи продолжување на програмата до 2029 година, повеќе од четири месеци нема никакво поместување. Организациите предупредуваат дека без овие средства се соочуваат со финансиски колапс – неплатени кирији, трошоци за одржување и административни казни.

Во писмото се наведува дека, споредувајќи со политиките на Србија и другите матични држави кон нивните малцинства, ваквиот застој ја доведува во прашање целата инфраструктура на бугарските културни центри во Србија. Ако состојбата не се промени, тие најавуваат затворање на канцелариите и прекин на активностите, како и алармирање на бугарската јавност за неуспехот на оваа политика.

Документот го потпишаа Културно-информативните центри од Босилеград, Звонци, Цариброд, Ниш и Ерма, Здружението „ГЛАС“ и Бугарско-српскиот центар „Врање“.

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.