Скопје

Ѓорѓиевски: Четири години работа за Кисела Вода, време е за нова приказна во Скопје

Градоначалникот на Кисела Вода, Орце Ѓорѓиевски, денеска одржа отчет за својата четиригодишна работа и ги претстави реализираните проекти, нагласувајќи дека општината доживеала вистинска трансформација.

„Четири години заедно ја пишувавме новата приказна на Кисела Вода. Почнавме со многу предизвици, но денес резултатите се видливи насекаде,“ истакна Ѓорѓиевски.

Тој потсети дека во изминатиот мандат биле обновени над 70 километри улици и патишта, изградени нови водоводни и канализациони линии и создадени над 80.000 квадратни метри зелени површини. Ѓорѓиевски нагласи дека со отворањето на пет нови и пет доградени градинки, целосно е укината листата на чекање за згрижување деца во општината.

Во образованието, според него, биле дигитализирани училиштата, поставени фотоволтаици, а по еден век започнала изградба на ново училиште „Св. Климент Охридски“ во Драчево.

Посебен акцент беше ставен и на спортот – 22 нови игралишта, 16 спортско-рекреативни центри, нови спортски сали и реконструкција на салата „Расадник“, како и изградба на затворен базен.

„Кисела Вода стана првата целосно дигитална општина во Македонија и дел од меѓународни мрежи за отворена власт и соработка. Во културата повторно отворивме кино и библиотека, а во животната средина исчистивме 246 диви депонии и поставивме систем за мониторинг на воздухот,“ додаде Ѓорѓиевски.

Тој ја промовираше и својата наследничка во општината – Бети Стаменковска Трајковска, за која рече дека ќе ја продолжи започнатата работа во Кисела Вода.

„Јас, пак, заедно со вас ја барам поддршката за следниот чекор – Скопје. Главниот град заслужува ренесанса со нова енергија, инвестиции, чист воздух, функционален јавен превоз и културен живот по мерка на граѓаните,“ порача Ѓорѓиевски.

Тој се заблагодари на граѓаните за довербата и додаде дека најдоброто допрва доаѓа.

Скопје

Николоски: Карпош добива нов урбан лик со реконструкција на над 15 улици

Преку петнаесетина улици ќе се реконструираат во општина Карпош со подршка на Владата. Општината полека ќе го смени урбаниот лик и ќе се развива, истакна вицепремиерот и министер за транспорт Александар Николоски при денешната посета на општина Карпош.

Николоски заедно со градоначалникот Сотир Лукровски извршија увид во реконструкција на ул. Јуриј Гагарин, проект кој се реализира со подршка на Министерството за транспорт, а во заедничка соработка со општината.

“ Ова беше заглавен проект, ова беше проект без разлика што имавме обезбедено средства, не можевме да го реализираме. Откако беше избран за градоначалник, заедно со службите во општината, успееја да ги решат сите предизвици на овој проект, да се решат проблемите и еве веќе се гради и ако се оди добро и не послужи времето до Нова година може да се заврши оваа улица, паркингот зад зградите и да се добие нов урбан лик на овој простор. Сакам да најавам дека дополнително на ова имаме уште еден проект кој се реализира со Светска банка во вредност од над 13 милиони денари, тоа е улицата Петар Чаулев, целосна реконструкција околу 600 метри што дополнително се надевам ќе допринесе за урбаниот развој на општината. На тоа додаваме уште дванаесетина проекти кои што ги резлизираме преку вториот повик на Владата и севкупно имаме значајни проекти за општина Карпош. Тука е и подршката на Владата, мојата лична подршка за дополнителни работи кои треба да ги направиме во Карпош. Со изборот на новиот градоначалник, со неговата напорна работа се гледаат промените и навистина сите имаме желба да помогнеме и да се случуваат убави работи во општина Карпош”-изјави вицепремиерот Николоски.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.