Скопје

Ѓорѓиевски: Започна доградбата на „Невена Георгиева-Дуња“ и нови спортски сали во Кисела Вода

Градоначалникот на општина Кисела Вода и кандидат за градоначалник на град Скопје, Орце Ѓорѓиевски, соопшти дека започна доградбата на основното училиште „Невена Георгиева-Дуња“. На површина од 500 м² ќе се изградат шест нови училници, по три на секој кат, со што ќе се обезбедат подобри услови за учениците и наставниците.

„Со оваа инвестиција, заедно со веќе започнатите доградби во училиштата „Кирил Пејчиновиќ“ и „Кузман Шапкарев“, го исполнуваме дадениот збор – едносменско работење во основните училишта на територијата на нашата општина“, рече Ѓорѓиевски.

Во рамки на развојните проекти, се гради и нова спортска сала во подрачното училиште „Круме Кепески“ во Припор, како и нова спортска сала „Кузман Јосифовски-Питу“. Градоначалникот потенцира дека создавањето современи услови за образование и спорт останува врвен приоритет.

Особено се нагласува дека во „Невена Георгиева-Дуња“ веќе се обезбедени целосно опремен кабинет по хемија и природни науки, модерна библиотека со читална и нов инвентар, со што учениците добиваат интерактивно и квалитетно образование.

Ѓорѓиевски упати благодарност до министерката за образование Весна Јаневска и до премиерот Христијан Мицкоски за поддршката која, како што посочи, е клучна за развојот на општините и за силна Македонија.

„Продолжуваме посветено да го унапредуваме образованието, затоа што влогот во најмладите е влог во иднината“, заклучи Ѓорѓиевски.

Скопје

Николоски: Карпош добива нов урбан лик со реконструкција на над 15 улици

Преку петнаесетина улици ќе се реконструираат во општина Карпош со подршка на Владата. Општината полека ќе го смени урбаниот лик и ќе се развива, истакна вицепремиерот и министер за транспорт Александар Николоски при денешната посета на општина Карпош.

Николоски заедно со градоначалникот Сотир Лукровски извршија увид во реконструкција на ул. Јуриј Гагарин, проект кој се реализира со подршка на Министерството за транспорт, а во заедничка соработка со општината.

“ Ова беше заглавен проект, ова беше проект без разлика што имавме обезбедено средства, не можевме да го реализираме. Откако беше избран за градоначалник, заедно со службите во општината, успееја да ги решат сите предизвици на овој проект, да се решат проблемите и еве веќе се гради и ако се оди добро и не послужи времето до Нова година може да се заврши оваа улица, паркингот зад зградите и да се добие нов урбан лик на овој простор. Сакам да најавам дека дополнително на ова имаме уште еден проект кој се реализира со Светска банка во вредност од над 13 милиони денари, тоа е улицата Петар Чаулев, целосна реконструкција околу 600 метри што дополнително се надевам ќе допринесе за урбаниот развој на општината. На тоа додаваме уште дванаесетина проекти кои што ги резлизираме преку вториот повик на Владата и севкупно имаме значајни проекти за општина Карпош. Тука е и подршката на Владата, мојата лична подршка за дополнителни работи кои треба да ги направиме во Карпош. Со изборот на новиот градоначалник, со неговата напорна работа се гледаат промените и навистина сите имаме желба да помогнеме и да се случуваат убави работи во општина Карпош”-изјави вицепремиерот Николоски.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.