Македонија

Божиновска на „Јас сум жена“: Визијата е јасна – доволно енергија за граѓаните и зелени извори

Министерката за енергетика, Сања Божиновска, на панелот „Жени во енергетиката“ во рамки на Конференцијата „Јас сум жена“ истакна дека визијата на Министерството е Македонија да биде земја која произведува доволно енергија за сопствени потреби, со поголем дел од капацитетите од обновливи извори, модерна и дигитализирана мрежа и интегрирана во европската енергетска архитектура.

– Македонија треба да биде енергетски стабилна за граѓаните и компаниите, но и доверлив партнер во регионот. Енергетската дипломатија е алатка за постигнување на оваа цел преку соработка, доверба и заеднички проекти и инвестиции со соседите – рече Божиновска.

Министерката објасни дека градењето на ново Министерство за енергетика било како градење куќа – здрави темели со визија, структура и луѓе, ѕидови од процеси и тимови, и покрив од вредности кои ја заштитуваат институцијата. Таа нагласи дека професионалноста, компетентноста, транспарентноста и отчетноста кон граѓаните се вградени во темелите на министерството, како и визијата за одржлива иднина усогласена со европските зелени цели.

Божиновска потенцира дека најголемите предизвици во енергетските реформи се староста и неефикасноста на инфраструктурата, финансирањето, регулаторната рамка и човечкиот фактор. – Транзицијата кон нов енергетски модел бара инвестиции, обучени кадри и култура на одговорност – рече таа.

Министерката најави продолжување на проектите за фотоволтаични и ветерни капацитети, модернизација на електропреносната и дистрибутивната мрежа, нови закони и стратегии за поголеми приватни инвестиции, како и програми за енергетска ефикасност во домаќинствата и јавните институции.

Божиновска го истакна значењето на енергетската дипломатија и регионалната соработка за стабилност на системот и сигурност на снабдувањето, при што приоритет е прекуграничното поврзување на електропреносната и гасоводната мрежа и усогласување на пазарните правила и регулативи.

Министерката се осврна и на заштитата на македонскиот рубин, уникатен геолошки ресурс во Европа, како дел од националното богатство и природна гордост. – Ова е само почеток на поголем процес на заштита, вреднување и меѓународна промоција на македонското минерално богатство – рече Божиновска.

Македонија

УХМР најавува снег – еве кога започнуваат врнежите!

Според најновите информации од УХМР, денеска во Македонија ќе преовладува сончево време со слаба до умерена облачност, а во одделни котлини ќе се појави магла. Ќе дува слаб северозападен ветер, а дневните температури ќе се движат од 6 до 15 степени Целзиусови.

Во Скопје се очекува променливо облачно и мирно време, со магла во одредени делови од денот. Температурата ќе достигне околу 6 степени, а ветерот ќе биде слаб, околу 1 метар во секунда.

Стабилното и тивко време ќе продолжи до вторник, при што маглата ќе се задржува во котлините, проследена со зголемена облачност.

Од вторник навечер се очекува промена на временските услови, со повремени локални врнежи од дожд, а на повисоките и планинските предели врнежите ќе бидат од снег.

Македонија

Д-р Чибишев со апел до родителите: Надворешни активности се опасни за децата при висок степен на загадување

Доктор Андон Чибишев преку социјалните мрежи предупреди на сериозните ризици за здравјето на децата во услови на екстремно загаден воздух. Тој истакна дека денеска, предпладне, додека поминувал покрај улицата „Илинденска“ кај бензинската пумпа на „Макпетрол“, забележал група деца на возраст од околу 7 до 10 години како трчаат и тренираат на фудбалско игралиште.

„Физичкиот напор го зголемува интензитетот на дишењето, што значи и поголемо внесување на штетни и отровни гасови од амбиенталниот воздух. Не можам да разберам зошто на ваков ден, кога загадувањето е екстремно, децата би се изложувале на таков ризик“, изјави д-р Чибишев.

Тој апелираше до организаторите на активности и тренинзи да покажат одговорност и да ги одложат настаните со цел да се заштити здравјето на најмладите.

Апелот доаѓа во момент кога Скопје повторно се соочува со високо ниво на аерозагадување, а здравствените работници постојано предупредуваат на зголемени ризици, особено кај децата, хронично болните и постарите лица.

Македонија

Конгрес на ДУИ: Ахмети со нови барања

Лидерот на ДУИ, Али Ахмети, на Петтиот конгрес на партијата денеска изнесе сет клучни политички барања што, според него, треба да ја гарантираат стабилноста и функционалноста на државата. Во фокусот се избор на Влада со двојно мнозинство, уставни измени поврзани со одлучувањето во Уставниот суд и целосен ветинг на сите јавни функционери во последните три децении, под меѓународен надзор.

Промовирајќи го новиот „Национален договор за напредок“, Ахмети побара воведување на т.н. „извршен Бадентер“, според кој секој иден владин состав ќе мора да ја добие довербата не само од мнозинството пратеници во Собранието, туку и од мнозинството пратеници кои ги претставуваат немнозинските заедници.

Тој истакна дека унитарната држава може да биде стабилна само доколку се темели на доверба и лојалност меѓу сите заедници, нагласувајќи дека двојното мнозинство е механизам што обезбедува инклузивност и политичка рамнотежа.

Во делот на судството, Ахмети предложи законите донесени со Бадентеров принцип во Собранието да не можат да бидат поништени од Уставниот суд без истото двојно мнозинство меѓу уставните судии. Според него, потребни се уставно-правни измени со кои одлуките што ги засегаат правата на немнозинските заедници ќе се носат само со заемна согласност.

Покрај уставните промени, лидерот на ДУИ инсистираше и на темелно „прочистување“ на политичката сцена. Тој побара целосен ветинг за сите носители на јавни функции во изминатите 34 години, вклучувајќи проверка на потеклото на имотот и процесите на приватизација, со јасен меѓународен надзор.