Црна Хроника

Романец ограбил скопјанец во Ѓорче Петров, обвинителството бара притвор

Скопското обвинителство поведе постапка против 41-годишен државјанин на Романија, осомничен за насилен грабеж извршен на 21 март годинава во општина Ѓорче Петров.

Според обвинителството, осомничениот на жртвата со сила му одзел златен ланец со крст од вратот, а потоа влегол во домот и пребарувајќи по полицата и фиоките украл уште 2.500 денари. Со тоа се стекнал со вкупна противправна корист од 11.500 денари, по што избегал.

„Станува збор за дрзок и насилен грабеж, при кој сторителот употребил сила за да го присвои туѓото имущество. Преземени се сите мерки за заштита на оштетениот и целосно расчистување на случајот“, соопштија од Основното јавно обвинителство.

Бидејќи осомничениот е странски државјанин без регулиран престој во државата, обвинителството оцени дека постои ризик од бегство и до судот достави предлог за определување мерка притвор.

Црна Хроника

Тепачка во Швајцарија: Уапсени шест лица, меѓу нив и двајца малолетници од Македонија

Шест лица, меѓу кои и двајца малолетници од Северна Македонија, се уапсени по физичка пресметка што се случила во вторникот вечерта во градот Винтертур, Швајцарија.

Инцидентот се случил во населбата Винтертур-Сенхоф и бил пријавен нешто пред 21 часот, откако полицијата добила дојава за лице кое лежи на земја со повреди на главата. По пристигнувањето на терен, полициските патроли затекнале повеќе лица вклучени во пресметката.

Според првичните информации од истрагата, настанот бил претходен од жестока вербална расправија која ескалирала во физичка тепачка, при што бил употребен и бибер-спреј. Во инцидентот биле повредени три лица – државјани на Сирија на возраст од 48, 18 и 17 години, кои со возило на итна медицинска помош биле пренесени во болница.

Повреди заработил и 15-годишен тинејџер од Северна Македонија, кој, според полициските информации, сам се упатил на лекарски преглед.

Полицијата привела и испрашала вкупно шест лица инволвирани во настанот. Меѓу нив се тројцата повредени државјани на Сирија, двајца малолетници од Северна Македонија на возраст од 15 и 17 години, како и 16-годишен швајцарски државјанин.

Сите учесници ќе бидат процесуирани од надлежните институции, при што малолетните лица ќе одговараат пред Обвинителството за малолетници, а полнолетните пред Јавното обвинителство.

Црна Хроника

Инвеститори под истрага за незаконска заработка од над 18 милиони денари

Двајца жители на Кичево се соочуваат со кривична пријава поради сомнение дека како инвеститори изградиле станбено-деловен објект без соодветна документација и одобрение за градба, при што оствариле значителна противправна имотна корист.

Од ОВР Кичево информираат дека кривичната пријава е поднесена против Б.Т. и В.Т., двајцата на возраст од 51 година, поради постоење основи на сомнение за сторено кривично дело „бесправно градење“. Според полицијата, пријавените, спротивно на законските прописи и без дозвола од надлежните институции, изградиле станбено-деловен објект.

Со ваквото незаконско постапување, како што наведуваат од полицијата, осомничените се стекнале со противправна имотна корист во износ од 18.051.600 денари.

Надлежните институции продолжуваат со постапката за целосно расчистување на случајот, а против пријавените ќе бидат преземени соодветни законски мерки во согласност со важечките прописи.