Католичката црква во Македонија остро реагира на измената на муралот на света Мајка Тереза на „Школка“ во Градскиот парк во Скопје, каде што на ликот на светицата е додадена марама. Според Црквата, станува збор за „недостоен и навредлив чин“ кој ги повредува чувствата на верниците и почитувачите на нејзиното дело.

„Света Мајка Тереза е светица на Католичката црква, родена во Скопје, почесна граѓанка на овој град и граѓанка на светот. Со својот живот посветен на сиромашните и болните, ја направи Македонија и Скопје препознатливи во светот“, стои во реакцијата.

Од Скопската бискупија и Струмичко-скопската епархија потсетуваат дека нејзиниот лик треба да биде третиран со почит, особено по неодамнешното осветување на храмот „Свети Константин и Елена“ во близина на Спомен-куќата на светицата.

„Слободата на уметничкото изразување е драгоцена, но мора да се остварува со почит кон достоинството и она што е свето за една заедница. Недозволиво е светите ликови да бидат злоупотребувани за било какви цели“, се додава во соопштението.

Католичката црква се приклучува кон реакциите на граѓаните кои веќе го осудија чинот и апелира до јавноста за поголема свест и почит кон верските симболи. Воедно, ги повикува институциите да преземат мерки за заштита на верските чувства и превенција на вакви појави.