Македонија

СДСМ со нова визија за Куманово

Кандидатот за градоначалник на СДСМ во Куманово, Мартин Костовски, заедно со кандидатите за советници, синоќа пред кумановци ја презентираа програмата со која настапуваат на локалните избори. Настанот се одржа во поранешниот „Комитет“, каде што беа најавени реални и остварливи проекти за секое маало и улица.

Поддршка за Костовски даде и потпретседателката на СДСМ, Фани Каранфилова Пановска, која повика граѓаните да ја изберат промената што, како што рече, Куманово ја заслужува. Таа остро го критикуваше актуелниот градоначалник Максим Димитриевски, обвинувајќи го дека градот го претворил во „касаба“.

„Костовски е најдобриот избор за Куманово. Тој е чесен, работлив и човек кој секогаш бил меѓу луѓето, а не во канцеларија. Димитриевски и ЗНАМ ги изневерија граѓаните и даваат легитимитет на погубните политики на ВМРО-ДПМНЕ,“ рече Каранфилова Пановска, додавајќи повик и кон неопределените гласачи, како и кон дел од поранешните сопартијци од ЗНАМ, „да се вратат дома“.

Костовски најави повеќе крупни проекти за Куманово – изградба на олимписки базен со аквапарк, административно-деловен центар со подземна гаража, четири нови градинки, реконструкција на стадион и градски пазар, како и семеен парк во Проевце. Дополнително, вети мерки за чистење на депонии, изградба на нови пешачки зони, откупен центар за земјоделци и прифатилиште за бездомни кучиња.

„Не ветуваме чуда, туку нудиме реални промени. Нашата програма не е само листа на ветувања, туку обврска. Ќе вложуваме во зелени површини, во локален економски развој и во подобар квалитет на живот за сите граѓани,“ истакна Костовски.

Носителот на советничката листа, Томица Илиќ, додаде дека целта е да се создаде современо и уредено Куманово – без депонии, со чист воздух, регулиран сообраќај, катни гаражи и нов јавен превоз.

Македонија

Конгрес на ДУИ: Ахмети со нови барања

Лидерот на ДУИ, Али Ахмети, на Петтиот конгрес на партијата денеска изнесе сет клучни политички барања што, според него, треба да ја гарантираат стабилноста и функционалноста на државата. Во фокусот се избор на Влада со двојно мнозинство, уставни измени поврзани со одлучувањето во Уставниот суд и целосен ветинг на сите јавни функционери во последните три децении, под меѓународен надзор.

Промовирајќи го новиот „Национален договор за напредок“, Ахмети побара воведување на т.н. „извршен Бадентер“, според кој секој иден владин состав ќе мора да ја добие довербата не само од мнозинството пратеници во Собранието, туку и од мнозинството пратеници кои ги претставуваат немнозинските заедници.

Тој истакна дека унитарната држава може да биде стабилна само доколку се темели на доверба и лојалност меѓу сите заедници, нагласувајќи дека двојното мнозинство е механизам што обезбедува инклузивност и политичка рамнотежа.

Во делот на судството, Ахмети предложи законите донесени со Бадентеров принцип во Собранието да не можат да бидат поништени од Уставниот суд без истото двојно мнозинство меѓу уставните судии. Според него, потребни се уставно-правни измени со кои одлуките што ги засегаат правата на немнозинските заедници ќе се носат само со заемна согласност.

Покрај уставните промени, лидерот на ДУИ инсистираше и на темелно „прочистување“ на политичката сцена. Тој побара целосен ветинг за сите носители на јавни функции во изминатите 34 години, вклучувајќи проверка на потеклото на имотот и процесите на приватизација, со јасен меѓународен надзор.

Македонија

Македонските деца сè порано пробуваат цигари и алкохол: Првата цигара на 9 години, алкохол на 13

Резултатите од најновото истражување ЕСПАД 2024, презентирано од Институтот за јавно здравје, покажуваат загрижувачки тренд кај македонските ученици – дел од децата ја запалуваат првата цигара уште на деветгодишна возраст, додека првиот контакт со алкохол најчесто се случува околу 13 години.

Истражувањето било спроведено во 96 средни училишта со повеќе од 2.800 ученици и укажува и на значителен пораст на употребата на електронски цигари. Повеќе од една четвртина од учениците пробале е-цигари, а секој десетти ги користел во изминатиот месец.

Алкохолот останува најраспространета психоактивна супстанца меѓу адолесцентите, при што момчињата почесто пријавуваат рана употреба, интоксикација и тешко епизодно пиење. Речиси третина од учениците првпат консумирале алкохол на 13 години или помлади.

Иако помал обем се регистрира и употреба на седативи без рецепт, канабис и коцкање, овие појави се особено присутни кај машката популација. Надлежните институции предупредуваат дека овие трендови бараат засилени и современи превентивни мерки.

Од Министерството за образование и наука информираат дека училиштата веќе спроведуваат програми за превенција на злоупотреба на психоактивни супстанци, а од оваа учебна година е воведен и изборен предмет за здравствена писменост. Институтот за јавно здравје нагласува дека резултатите од ЕСПАД треба да послужат како основа за подобрување на политиките и заштита на здравјето на младите.

Македонија

АХВ засилено ги контролира детските новогодишни пакетчиња: дел од нив повлечени поради неточни декларации

Во пресрет на новогодишните празници, Агенцијата за храна и ветеринарство (АХВ) спроведе 262 вонредни инспекциски надзори за да ја провери безбедноста на детските новогодишни пакетчиња. Контролите беа извршени во магацини за пакување, маркетите и продавниците кои ги пласираат овие производи.

Поради несовпаѓање на роковите на збирната декларација со поединечните рокови на производите и непотполни декларации, инспекциските служби издадоа 4 решенија за повлекување на пакетчиња од промет. Дополнително, двајца оператори со храна добија наредби за ставање на комплетни збирни декларации на пакетчињата.

Од спроведените 262 инспекциски надзори, не се изречени парични казни и не е поништена ниту една храна како небезбедна. Во споредба со ланската сезона, кога беа утврдени сериозни неправилности како погрешни ознаки, истечен рок на употреба и промени во својствата на производите, годинава се забележани само минимални недоследности кај операторите.

АХВ најавува дека контролните активности ќе продолжат и во наредниот период, особено пред и по новогодишните празници, со цел да се осигура безбедноста на детските пакетчиња.