Скопје

Ѓорѓиевски за инфраструктурата: „Есенинова“ ќе се пробива од „Чешма“ до „Шампионче“

Кандидатот за градоначалник на Скопје од ВМРО-ДПМНЕ, Орце Ѓорѓиевски, денес во Кисела Вода најави почеток на втората фаза од проектот „Есенинова“, со пробивање на улицата од „Чешма“ до „Шампионче“. Со ова директно ќе се поврзат улицата „Антон Панов“ и булеварот „Борис Трајковски“, кој исто така ќе биде целосно реконструиран до Драчево.

„Оваа интервенција ќе донесе растеретување на сообраќајот, побрз пристап и подобра мобилност за жителите на Кисела Вода“, истакна Ѓорѓиевски.

Тој додаде дека ова е дел од пошироката инфраструктурна мрежа што ја предвидува за Скопје, која вклучува: поврзување на „Бутелска“ со булевар „Христијан Тодоровски Карпош“, реконструкција на улиците „Перо Наков“, „Фрањо Клуз“, „Стар Качанички пат“, „101“, „Загребска“, како и улиците „Бутелска“ и „Радишанска“.

„Секој метар нова улица значи минута помалку во гужва, секој реконструиран тротоар значи поголема безбедност, секој поврзан кварт значи подобар пристап до училишта, болници и работни места. Ова е нашата визија и заложба за град со рамномерен развој“, додаде кандидатот.

Ѓорѓиевски истакна дека проектите се реализираат во соработка со Министерството за транспорт и министерот Александар Николовски, а во моментот се работат 13 други капитални проекти за кои Кисела Вода добила средства од Владата.

Скопје

Николоски: Карпош добива нов урбан лик со реконструкција на над 15 улици

Преку петнаесетина улици ќе се реконструираат во општина Карпош со подршка на Владата. Општината полека ќе го смени урбаниот лик и ќе се развива, истакна вицепремиерот и министер за транспорт Александар Николоски при денешната посета на општина Карпош.

Николоски заедно со градоначалникот Сотир Лукровски извршија увид во реконструкција на ул. Јуриј Гагарин, проект кој се реализира со подршка на Министерството за транспорт, а во заедничка соработка со општината.

“ Ова беше заглавен проект, ова беше проект без разлика што имавме обезбедено средства, не можевме да го реализираме. Откако беше избран за градоначалник, заедно со службите во општината, успееја да ги решат сите предизвици на овој проект, да се решат проблемите и еве веќе се гради и ако се оди добро и не послужи времето до Нова година може да се заврши оваа улица, паркингот зад зградите и да се добие нов урбан лик на овој простор. Сакам да најавам дека дополнително на ова имаме уште еден проект кој се реализира со Светска банка во вредност од над 13 милиони денари, тоа е улицата Петар Чаулев, целосна реконструкција околу 600 метри што дополнително се надевам ќе допринесе за урбаниот развој на општината. На тоа додаваме уште дванаесетина проекти кои што ги резлизираме преку вториот повик на Владата и севкупно имаме значајни проекти за општина Карпош. Тука е и подршката на Владата, мојата лична подршка за дополнителни работи кои треба да ги направиме во Карпош. Со изборот на новиот градоначалник, со неговата напорна работа се гледаат промените и навистина сите имаме желба да помогнеме и да се случуваат убави работи во општина Карпош”-изјави вицепремиерот Николоски.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.