Скопје

Анкета: Меџити со предност од 3,3% пред Османи во Чаир, ВЛЕН води пред ДУИ

Кандидатот на ВЛЕН за општина Чаир, Изет Меџити, има предност од 3,3 проценти пред кандидатот на АКИ, Бујар Османи, покажува најновата анкета на Институтот за политички истражувања – Скопје (ИПИС), спроведена за МРТ во текот на октомври на примерок од 1.004 испитаници преку телефонско анкетирање со жители на Чаир.

Според резултатите, 27,5% од анкетираните изјавиле дека би гласале за Меџити, а 24,2% за Османи. Кандидатот Ицо Колевски добил поддршка од 1,1%, додека 47,2% се неопределени или не одговориле.

Доколку изборите се одвиваат во втор круг, 28,8% би го поддржале Меџити, а 25,4% Османи – разлика од 3,4 процентни поени. За ниту еден кандидат не би гласале 18,7% од анкетираните, а 27,1% остануваат неопределени.

Во делот на поддршката за советничките листи, ВЛЕН добива најголема доверба со 22,4%, пред АКИ со 20,3%. Поддршка за ВМРО-ДПМНЕ дале 6,1% од испитаниците, за СДСМ 1,9%, за Левица 1%, а за ЗНАМ 0,8%. Околу 20% сè уште не се определени, 13,7% нема да гласаат, а 10,7% одбиле да одговорат.

Кога станува збор за изборите за Град Скопје, 19,6% од анкетираните би гласале за кандидатот на ВМРО-ДПМНЕ, Орце Ѓорѓиевски, додека 7,6% за кандидатката на СДСМ, Каја Шукова. Над 70% се или неопределени или не би гласале.

На прашањето која партија очекуваат да победи на локалните избори, 23,2% го посочиле ВЛЕН, 19,5% АКИ, 7,8% ВМРО-ДПМНЕ, а 1,4% СДСМ.

Анкетата покажува дека етничката структура на испитаниците е 68,5% Албанци, 23,1% Македонци и 8,4% од други етнички заедници. Освен локалните прашања, граѓаните како најитен приоритет го посочиле искоренувањето на корупцијата.

Скопје

Николоски: Карпош добива нов урбан лик со реконструкција на над 15 улици

Преку петнаесетина улици ќе се реконструираат во општина Карпош со подршка на Владата. Општината полека ќе го смени урбаниот лик и ќе се развива, истакна вицепремиерот и министер за транспорт Александар Николоски при денешната посета на општина Карпош.

Николоски заедно со градоначалникот Сотир Лукровски извршија увид во реконструкција на ул. Јуриј Гагарин, проект кој се реализира со подршка на Министерството за транспорт, а во заедничка соработка со општината.

“ Ова беше заглавен проект, ова беше проект без разлика што имавме обезбедено средства, не можевме да го реализираме. Откако беше избран за градоначалник, заедно со службите во општината, успееја да ги решат сите предизвици на овој проект, да се решат проблемите и еве веќе се гради и ако се оди добро и не послужи времето до Нова година може да се заврши оваа улица, паркингот зад зградите и да се добие нов урбан лик на овој простор. Сакам да најавам дека дополнително на ова имаме уште еден проект кој се реализира со Светска банка во вредност од над 13 милиони денари, тоа е улицата Петар Чаулев, целосна реконструкција околу 600 метри што дополнително се надевам ќе допринесе за урбаниот развој на општината. На тоа додаваме уште дванаесетина проекти кои што ги резлизираме преку вториот повик на Владата и севкупно имаме значајни проекти за општина Карпош. Тука е и подршката на Владата, мојата лична подршка за дополнителни работи кои треба да ги направиме во Карпош. Со изборот на новиот градоначалник, со неговата напорна работа се гледаат промените и навистина сите имаме желба да помогнеме и да се случуваат убави работи во општина Карпош”-изјави вицепремиерот Николоски.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.