Македонија

Голема акција во Битола: Уапсен Борче Марковски, сопственик на „Марковски Компани“

Борче Марковски, сопственик на „Марковски Компани ДООЕЛ“ од Битола, е уапсен од Финансиската полиција под сомнение за местење тендер вреден околу 100 милиони денари (1,6 милиони евра) во РЕК Битола. Марковски е познат и како почесен конзул на Белорусија во Македонија.

„Марковски Компани“ беше една од најангажираните фирми во минатата влада, а на прес-конференции беше објавено дека со само 10 булдожери во РЕК Битола фирмата можела да заработува 63.000 евра дневно. Според шпекулации, во период од две години „Марковски Компани“ инкасирала околу 200 милиони евра од државата.

Компанијата, основана во 2002 година во Битола, е активна во нискоградба, земјени работи, изградба на патишта и ископи, и располага со возен и машински парк од над 300 вработени. Во 2024 година приходите на фирмата достигнаа речиси 2,8 милијарди денари, што ја позиционира меѓу најголемите градежни компании во регионот.

Најголемите договори на „Марковски Компани“ се поврзани со РЕК Битола, вклучувајќи ископ на јаглен и јаловина, како и механизација и одржување на рудничките постројки. Најголемиот тендер во 2023 година беше вреден околу 46 милиони евра, што претставува рекорд за компанијата.

Договорите предизвикаа контроверзии поради наводна нетранспарентност и предност на „Марковски Компани“ пред другите понудувачи. РЕК Битола истакна дека изборот бил законски и насочен кон непречено производство на електрична енергија, но дел од соработката подоцна беше прекината поради задоцнување во извршување на обврските.

Јавноста и медиумите реагираа на брзиот раст на компанијата од мал основен капитал до десетици милиони евра годишен обрт, што некои го нарекоа „симбол на клиентелизмот меѓу политиката и енергетиката“.

Македонија

Николоски: Македонија е пример за почитување на мајчиниот јазик на турската заедница

Нема поблизок народ за македонскиот народ од турскиот, нема поблиска држава за Македонија од Туркије и горд сум што можам да кажам дека Македонија овозможува изучување на мајчиниот турски јазик на турската заедница како најголема цивилизациска придобивка, рече заменик претседателот на Владата, Александар Николоски, на одбележувањето на Денот на наставата на турски јазик.

“Има многу заднички што можеме да кажеме и заеднички да споделиме меѓу двата народи и двете држави, а секако наставата на мајчин јазик е најголемата цивилизациска придобивка која што еден народ може да ја има. Горд сум што можам да кажам дека Македонија тоа го овозможува на сите припадници на турската заедница, на турскиот народ кој што живее во Македонија и ова е нешто што треба заеднички да го градиме и надградуваме затоа што нашите јазици коегзистираат со векови и тоа е цивилизациска придобивка која мора да ја надградуваме со децениите и вековите кои што доаѓаат пред нас.

Нема поблизок народ за мекедонскиот народ од турскиот, нема поблиска држава за Македонија од Туркије и затоа треба да заеднички да создаваме уште подобри услови за изучување на турскиот јазик и наставата на мајчин турски јазик. Нека е со среќа и да е за многу години, а ние заеднички да го зајакнуваме партнерството меѓу македонскиот и турскиот народ”- се обрати заменик претседателот на Владата, Александар Николоски.

Македонија

Поради густата магла откажани сите летови од Меѓународниот аеродром Скопје

Авиосообраќајот на Меѓународниот аеродром Скопје денеска е целосно прекинат, откако поради густата магла и значително намалената видливост беа откажани сите планирани летови, соопштија надлежните служби.

Од раните утрински часови, аеродромот не реализира ниту полетувања, ниту слетувања, а сите редовни летови на повеќе авиокомпании, меѓу кои Wizz Air, Turkish Airlines и Croatia Airlines, се откажани или пренасочени кон алтернативни аеродроми во регионот.

Според информациите од управувачот на аеродромот, ТАВ Македонија, густата магла ја намали видливоста под безбедносниот минимум за нормално одвивање на авионскиот сообраќај, поради што е донесена одлука за целосен прекин на летовите сè додека не се подобрат временските услови.

Дел од авионите што требало да слетаат во Скопје биле пренасочени кон аеродромите во Охрид, Приштина, Софија, Солун и Тирана, додека патниците се известуваат да не доаѓаат на аеродромот без претходна проверка на статусот на нивниот лет.

Од ТАВ апелираат патниците редовно да ги следат официјалните соопштенија и да стапат во контакт со своите авиокомпании за дополнителни информации и евентуални промени во распоредот, бидејќи маглата и понатаму ја отежнува воздушната навигација.

Македонија

М-НАВ ја заврши целосната демонтажа на стариот радар на Аеродромот Скопје

Соопштение за јавност

М-НАВ денеска успешно ги заврши преостанатите градежни активности за целосна демонтажа на останатите делови од стариот радар на Меѓународниот Аеродром Скопје.

Работите беа реализирани во период со магла и намалена видливост, кој беше оптимално искористен за комплетно и безбедно завршување на активностите, без какво било влијание врз одвивањето на воздушниот сообраќај.

Со оваа фаза се заокружува процесот на демонтажа на стариот и неупотреблив радар, како предуслов за понатамошните активности поврзани со инсталацијата на новиот модерен радарски систем.

М-НАВ и понатаму останува целосно посветен на безбедноста и континуитетот на воздушниот сообраќај, како и на навремена и професионална реализација на сите планирани активности.