Република

Коњановски: Инвестиции во енергетска ефикасност и здрава животна средина за модерна Битола (ВИДЕО)

Тони Коњановски, кандидат за градоначалник на општина Битола, истакна дека локалната самоуправа продолжува со заложбите за енергетска ефикасност и заштита на животната средина, со цел создавање на почиста и поодржлива средина за сите граѓани

Коњановски најави воведување субвенции за енергетска ефикасност и одржливост кои ќе вклучуваат нови фасади, дограми, велосипеди, соларни колектори и фотоволтаици со што ќе се намали загадувањето и трошоците за енергија кај граѓаните

На училишта, градинки, јавни институции и старскиот дом „Сју Рајдер“ ќе бидат поставени фотоволтаични системи кои ќе произведуваат чиста електрична енергија и ќе придонесат за енергетска независност на општината

Кандидатот потенцира дека се создаваат нови паркови и се спроведуваат пошумувања, заедно со едукативни активности за правилна селекција на отпад, со цел секој граѓанин да има активна улога во заштита на природата

Во партнерство со стручни институции ќе се воведат конкретни решенија за намалување на загадувањето, а ќе се постават повеќе пунктови и контејнери за селекција на отпад, заедно со медиумска кампања која ќе ги охрабри граѓаните да станат дел од промената

„Нашата заедничка мисија е да изградиме почиста, поздрава и поодржлива средина за нас, за нашите деца и за идните генерации Вистински избор е зелена и модерна Битола“ порача Коњановски

Висеото може да го погледнете тука

Република

Четири тетовски села утре ќе бидат без струја

Дел од тетовските села Цепчиште, Јажинце, Доброште и Слатино утре, 23 декември 2025 година, ќе бидат без електрична енергија поради планирани прекини во дистрибутивната мрежа.

Според најавата, прекинот ќе трае од 09:00 до 14:00 часот. Во селото Џепчиште без струја ќе останат објекти кои се наоѓаат кон центарот на селото, додека во Јажинце прекинот ќе ги зафати објектите во близина на џамијата. Во Доброште и Слатино без напојување ќе бидат делови од селата, согласно планираните активности.

Од надлежните апелираат граѓаните навреме да ги планираат своите обврски и да преземат потребни мерки за време на прекинот.

Република

Хумана новогодишна акција: Дедо Мраз пристигна на мотор кај децата од „Кочо Рацин“ во Битола

Моторџиите од МК Конзули Битола денеска организираа хумана новогодишна посета во Ресурсниот центар Кочо Рацин во Битола, носејќи го Дедо Мраз на мотор за да им подели пакетчиња на децата.

Настанот помина во празнична атмосфера, исполнета со детска радост, насмевки и искрена возбуда. Од МК „Конзули“ истакнаа дека ваквите моменти се потсетник на вистинската смисла на празниците – хуманост, споделување и грижа за најмладите.

Тие упатија благодарност до вработените во ресурсниот центар за топлиот пречек и посветеноста што секојдневно ја вложуваат во грижата и образованието на децата, најавувајќи дека и во иднина ќе продолжат со вакви хуманитарни активности.

Извор: Апла.мк

Република

Проданоски: Наставата на мајчин турски јазик е темел на културниот идентитет и соживотот

По повод Денот на наставата на турски јазик, градоначалникот на Општина Прилеп, Дејан Проданоски, упати искрени честитки до сите наставници, ученици и образовни работници кои ја негуваат и унапредуваат наставата на мајчин турски јазик.

Тој упати посебни честитки до колективот и учениците од ООУ „Св. Кирил и Методиј“ во село Канатларци, каде што успешно се реализира настава на турски јазик и со голема посветеност се негува јазикот како значаен дел од културниот идентитет.

Проданоски ја истакна важноста од негувањето на мајчиниот јазик и почитувањето на повеќекултурните вредности, нагласувајќи дека мајчиниот јазик е нераскинлив дел од идентитетот, традицијата и културното наследство на секој народ, а неговото почитување придонесува за меѓусебно разбирање, почит и пријателство во мултикултурно општество.

Општина Прилеп, како што беше нагласено, ќе продолжи посветено да ги негува повеќекултурните вредности и да го чува културниот идентитет на сите заедници, вклучително и на турската заедница, со цел создавање подобри услови за изучување и унапредување на наставата на мајчин турски јазик.