Свет

НАТО започнува голема нуклеарна вежба: „Секогаш ќе бидеме чекор пред противникот“

НАТО следната недела ќе ја одржи својата голема годишна нуклеарна вежба, соопшти генералниот секретар на Алијансата, истакнувајќи дека еден од клучните делови ќе биде заштитата на нуклеарното оружје пред неговата евентуална употреба.

Вежбата „Steadfast Noon“ ќе трае околу две недели, ќе ја води Холандија и ќе учествуваат 71 авиони од 14 земји членки на НАТО. Главниот дел од вежбата ќе се одржи над Северното Море, далеку од Русија и Украина, а ќе бидат вклучени и воени бази во Белгија, Британија, Данска и Холандија.

„Ова го правиме за да обезбедиме нашето нуклеарно одвраќање да остане веродостојно, безбедно и ефикасно. Исто така, тоа испраќа јасна порака до секој потенцијален противник дека ќе ги заштитиме сите сојузници од сите закани“, изјави генералниот секретар Марк Руте.

Во вежбата ќе учествуваат бомбардери и борбени авиони способни да носат нуклеарни боеви глави, но нема да се користи вистинско нуклеарно оружје. Американските сили обезбедуваат F-35 авиони, авиони за допуна и други поддржувачки летала, додека Финска и Полска испраќаат свои борбени авиони. Дел од активностите ќе се посветат на заштита на нуклеарното оружје на земја, а ќе се користи и опрема за електронско војување и разузнавачки системи.

Пуковникот Даниел Банч, шеф на нуклеарните операции на НАТО, истакна дека и покрај последните инциденти со дронови, Алијансата е подготвена и „секогаш ќе биде чекор пред противникот“.

Шефот на дирекцијата за нуклеарна политика на НАТО, Џејмс Стокс, додаде дека, иако се следи острата реторика на Кремљ, не се забележуваат промени во руската нуклеарна политика, а Русија не е во фокусот на вежбата, но нејзините активности, вклучително и употребата на ракети со двојна намена во Украина, внимателно се следат.

Свет

Лекарите во Англија стапија во петдневен штрајк

Лекарите во Англија денес започнаа петдневен штрајк поради несогласувања околу платите и условите за работа, јавува Ројтерс.

Станува збор за помладите болнички лекари, познати како „жители“, кои тврдат дека нивните плати во последните години значително се намалиле и дека работат под зголемен притисок и во тешки услови.

Владата, од своја страна, соопшти дека нема фискален простор за значителни покачувања на платите и дека штрајковите се неодговорни, нагласувајќи ја потребата за заштита на здравствениот систем и пациентите.

Свет

Вашингтон најавува нов притисок врз Москва преку енергетски санкции

САД подготвуваат нов пакет санкции насочени кон рускиот енергетски сектор, со цел дополнително да го зголемат притисокот врз Москва доколку рускиот претседател Владимир Путин одбие да прифати можен мировен договор со Украина, објавуваат странски медиуми повикувајќи се на информирани извори.

Според истите извори, меѓу мерките што се разгледуваат е и таргетирање на бродовите од руската флота на нафтени танкери, како и санкционирање на трговците и посредниците кои учествуваат во олеснување на трансакциите поврзани со извозот на руска нафта.

Изворите наведуваат дека станува збор за опции кои сè уште се во фаза на разгледување, а конечната одлука ќе зависи од развојот на дипломатските напори поврзани со војната во Украина.

Според најавите, новите санкции би можеле да бидат објавени уште во текот на оваа недела.

Свет

Мелони: Европа губи време поради внатрешна слабост и бавни одлуки

Италијанската премиерка Џорџа Мелони изјави дека Европската Унија се соочува со сериозни предизвици, предупредувајќи дека најголемата закана за Унијата не доаѓа однадвор, туку од нејзината сопствена неодлучност и неспособност навреме да носи клучни одлуки.

Говорејќи пред пратениците во Долниот дом на италијанскиот парламент, Мелони нагласи дека актуелниот геополитички момент бара прагматичен пристап, ослободен од идеолошки догматизам. Според неа, токму таквиот пристап е неопходен за соодветен одговор на новата безбедносна стратегија на Соединетите Американски Држави.

„Бесмислено и штетно е да се напаѓаат имагинарни непријатели. Вистинскиот проблем е нашата неспособност да изнаоѓаме конкретни и одржливи решенија“, истакна Мелони во пресрет на претстојниот Самит на ЕУ.

Премиерката се осврна и на прашањето за користење на замрзнатите руски средства за поддршка на Украина, оценувајќи дека станува збор за сложен процес кој мора да биде заснован на цврста и правно издржлива основа. Таа ја повтори поддршката на Италија за Украина и ставот дека Русија треба да ги сноси трошоците за војната, но додаде дека Москва поставува, како што рече, „неразумни“ услови во рамките на мировните напори поддржани од САД.

Мелони упати критики и до предлог-буџетот на Европската комисија за периодот 2028–2034 година, оценувајќи дека во сегашната форма е неприфатлив за Италија. Таа посочи дека документот предвидува зголемени финансиски придонеси, но намалени средства за политики кои се од клучно значење за земјата, како заедничката земјоделска и кохезиската политика.

„Нема да прифатиме да плаќаме повеќе, а да добиваме помалку“, порача италијанската премиерка.