Црна Хроника

Приведени тројца Албанци кај Ќафасан, еден фатен со марихуана

Тројца државјани на Албанија се приведени синоќа на магистралниот пат Струга–Ќафасан, откако биле затекнати во возило со кое нелегално влегле на територијата на Македонија. Кај еден од нив била пронајдена и дрога.

Според информациите од СВР Охрид, полициски службеници од Полициската станица за граничен надзор „Франгово“ ги лишиле од слобода Л.М. (26), Е.К. (28) и 16-годишен малолетник, сите од Албанија. Тројцата се движеле со патничко возило „Фолксваген Туран“ со албански регистарски таблички, сопственост на Л.М.

– При извршената контрола е утврдено дека Е.К. и малолетникот нелегално ја преминале државната граница од Албанија кон Македонија, а при преглед кај Е.К. е пронајдена марихуана. Лицата веднаш се приведени, а со малолетникот разговор извршија адвокат за малолетници и претставник од Центарот за социјални работи во Струга – изјави портпаролот на СВР Охрид, Стефан Димоски.

Од полицијата информираат дека по целосно документирање на случајот, против тројцата приведени ќе бидат поднесени соодветни пријави.

Црна Хроника

Драма во Скопје: Возач со мерцедес удрил полицаец и избегал

Лишен од слобода возачот кој во Скопје со возило „мерцедес“ удри во полициски службеник и избега од местото на настанот, следува кривична пријава

Полициски службеници од Одделението за увиди на сообраќајни незгоди при СВР Скопје го пронајдоа и лишија од слобода Д.С. (67) од Скопје, кој на 11.12.2025 во 14:45 часот на кружен тек од ул.„Борис Сарафов“, ул.„Лука Геров“, ул.„Македонски војски“ и бул.„Партизански Одреди“ во Скопје, со патничко возило „мерцедес“ удрил во полицискиот службеник Х.М.(34), кој извршувал службени дејства, по што со возилото го напуштил местото на настанот. Во несреќата Х.М. се здобил со телесни повреди, констатирани во Градската општа болница „Св.Наум Охридски“, а по преземени мерки, возачот Д.С. е пронајден и по насоки на јавен обвинител, против него ќе биде поднесена кривична пријава.

Црна Хроника

Ескалација на конфликт во Аеродром – тепачка на паркинг простор

Жестока расправија на паркинг простор во скопската општина Аеродром кулминираше со физички напад во раните утрински часови денеска.

Околу 02:25 часот, 42-годишниот Ј.Ј. од Пробиштип, пријавил во СВР Скопје дека бил нападнат од О.А. (37) од Скопје. Инцидентот се случил по претходна, очигледно вжештена, вербална пресметка.

Според полицискиот извештај, Пробиштипјанецот е жртва на агресијата, која се случила на паркинг, без да се прецизира дали станува збор за приватен или јавен простор.

Полицијата веднаш презеде мерки за расчистување на случајот. Од СВР Скопје најавуваат дека по целосното документирање и собирање на доказите, против напаѓачот ќе биде поднесен соодветен поднесок – најверојатно кривична пријава за насилство.

Црна Хроника

Падна шверцерска шема на автопатот – возила полни со брендирана стока

Лишени од слобода две лица, запленети 272 парчиња разновидна брендирана стока, 174 парчиња разновиден рачен алат без документација

На 14.12.2025 на автопат Табановце-Куманово, полициски службеници од Мобилната единица за компезаторни мерки при ОГРМ во два одвоени настани ги лишија од слобода Б.И (38) од Куманово и Б.С (41) од Скопје. Полициските службеници прво сопреле патничко возило “Голф” со кумановски регистарски ознаки, управувано од Б.И. и при преглед на возилото пронајдени се 272 парчиња разновидна брендирана стока, без документација. Стоката е одземена, а лицето е лишено од слобода.

Во вториот настан, полициските службеници сопреле патничко возило “мерцедес” со скопски регистарски ознаки, управувано од Б.С. и при преглед на возилото биле пронајдени 174 парчиња разновиден рачен, батериски и електричен алат без документација. Возилото и алатот се одземени, а лицето е лишено од слобода.

По целосно документирање на случаите ќе бидат поднесени соодветни поднесоци.