Свет

Северна Кореја ја покажа најмоќната нуклеарна ракета пред Кина и Русија

Со голема воена парада во Пјонгјанг, Северна Кореја го одбележа 80-годишниот јубилеј од основањето на Работничката партија. Илјадници војници маршираа низ престолнината прикажувајќи современо оружје, меѓу кое и новата интерконтинентална балистичка ракета „Хвасонг-20“, која државните медиуми ја опишаа како „најмоќниот нуклеарен систем на вооружување“ на земјата.

На трибината покрај лидерот Ким Џонг Ун присуствуваа кинескиот премиер Ли Ќианг, поранешниот руски претседател Дмитриј Медведев и виетнамскиот лидер То Лам. „Пријателите се заедно, непријателите стануваат нервозни,“ порача Медведев на руската социјална мрежа „Макс“, пренесува Deutsche Welle.

Во говорот, Ким изјави дека „непобедливата армија“ на Северна Кореја двојно ја зголемила својата сила благодарение на напорите на партијата и дека „револуционерниот дух“ на севернокорејските војници кои се борат на странски боишта ја покажал нивната идеолошка зрелост. Според податоци на Јужна Кореја, околу 600 севернокорејски војници загинале, а илјадници се ранети додека се бореле на страната на Русија во Украина.

Парадата, според анализите, претставува потврда за зголеменото геополитичко влијание на Пјонгјанг и зајакнувањето на врските со Москва и Пекинг. Северна Кореја во последните месеци добива гориво и храна од Русија, додека за возврат испраќа муниција и војници.

Американската воена разузнавачка агенција проценува дека Северна Кореја е во „најсилна стратешка позиција во последните децении“ и дека нејзината способност да ја загрози територијата на САД е значително зголемена.

Ким Џонг Ун, кој веќе се појави заедно со кинескиот претседател Си Џинпинг и рускиот претседател Владимир Путин, се надева дека американскиот претседател Доналд Трамп ќе ги укине санкциите и ќе се согласи на нови разговори. Во медиумите се шпекулира дека можно е нивна средба повторно да се одржи на 38. паралела, слично како во 2019 година.

Со парадата, Работничката партија не само што го прослави својот јубилеј, туку и ја потврди централната улога на Ким како „врховен другар“ и апсолутен лидер на државата.

Свет

Лекарите во Англија стапија во петдневен штрајк

Лекарите во Англија денес започнаа петдневен штрајк поради несогласувања околу платите и условите за работа, јавува Ројтерс.

Станува збор за помладите болнички лекари, познати како „жители“, кои тврдат дека нивните плати во последните години значително се намалиле и дека работат под зголемен притисок и во тешки услови.

Владата, од своја страна, соопшти дека нема фискален простор за значителни покачувања на платите и дека штрајковите се неодговорни, нагласувајќи ја потребата за заштита на здравствениот систем и пациентите.

Свет

Вашингтон најавува нов притисок врз Москва преку енергетски санкции

САД подготвуваат нов пакет санкции насочени кон рускиот енергетски сектор, со цел дополнително да го зголемат притисокот врз Москва доколку рускиот претседател Владимир Путин одбие да прифати можен мировен договор со Украина, објавуваат странски медиуми повикувајќи се на информирани извори.

Според истите извори, меѓу мерките што се разгледуваат е и таргетирање на бродовите од руската флота на нафтени танкери, како и санкционирање на трговците и посредниците кои учествуваат во олеснување на трансакциите поврзани со извозот на руска нафта.

Изворите наведуваат дека станува збор за опции кои сè уште се во фаза на разгледување, а конечната одлука ќе зависи од развојот на дипломатските напори поврзани со војната во Украина.

Според најавите, новите санкции би можеле да бидат објавени уште во текот на оваа недела.

Свет

Мелони: Европа губи време поради внатрешна слабост и бавни одлуки

Италијанската премиерка Џорџа Мелони изјави дека Европската Унија се соочува со сериозни предизвици, предупредувајќи дека најголемата закана за Унијата не доаѓа однадвор, туку од нејзината сопствена неодлучност и неспособност навреме да носи клучни одлуки.

Говорејќи пред пратениците во Долниот дом на италијанскиот парламент, Мелони нагласи дека актуелниот геополитички момент бара прагматичен пристап, ослободен од идеолошки догматизам. Според неа, токму таквиот пристап е неопходен за соодветен одговор на новата безбедносна стратегија на Соединетите Американски Држави.

„Бесмислено и штетно е да се напаѓаат имагинарни непријатели. Вистинскиот проблем е нашата неспособност да изнаоѓаме конкретни и одржливи решенија“, истакна Мелони во пресрет на претстојниот Самит на ЕУ.

Премиерката се осврна и на прашањето за користење на замрзнатите руски средства за поддршка на Украина, оценувајќи дека станува збор за сложен процес кој мора да биде заснован на цврста и правно издржлива основа. Таа ја повтори поддршката на Италија за Украина и ставот дека Русија треба да ги сноси трошоците за војната, но додаде дека Москва поставува, како што рече, „неразумни“ услови во рамките на мировните напори поддржани од САД.

Мелони упати критики и до предлог-буџетот на Европската комисија за периодот 2028–2034 година, оценувајќи дека во сегашната форма е неприфатлив за Италија. Таа посочи дека документот предвидува зголемени финансиски придонеси, но намалени средства за политики кои се од клучно значење за земјата, како заедничката земјоделска и кохезиската политика.

„Нема да прифатиме да плаќаме повеќе, а да добиваме помалку“, порача италијанската премиерка.