Свет

Откриено: Еден повик сè променил — Трамп со месеци тајно ѝ помага на Украина

САД со месеци ѝ обезбедуваат тајна поддршка на Украина во изведување далекуметни напади врз руската енергетска инфраструктура, со цел да се ослаби економијата на Владимир Путин и да се изнуди Русија на преговори, објави Financial Times, а пренесе Index Vijesti.

Американските разузнавачки служби на Киев му доставувале податоци што овозможиле прецизни удари врз клучни руски рафинерии и складишта на нафта, длабоко зад фронтот. Поддршката, која досега не беше јавно објавена, значително се засилила од средината на летото и била од суштинско значење за успешното спроведување на украинските операции.

До промена во американската стратегија наводно дошло по телефонскиот разговор меѓу претседателот Доналд Трамп и украинскиот лидер Володимир Зеленски во јули. Според извори запознаени со разговорот, Трамп прашал дали Украина би можела да нападне цели во Москва доколку Вашингтон ѝ обезбеди далекуметно оружје, при што сигнализирал поддршка за стратегијата „Русите да ја почувствуваат болката“. Од Белата куќа подоцна појаснија дека американскиот претседател „само поставувал прашање, а не поттикнувал насилство“.

Американските разузнавачки податоци им помагаат на украинските сили да ги планираат летовите, времето и патеките на нападите, со што нивните дронови успеваат да избегнат руската противвоздушна одбрана. Дел од официјалните лица тврдат дека Украина самостојно ги избира целите, додека други извори наведуваат дека Вашингтон понекогаш поставува приоритети.

Зеленски, одговарајќи на прашања за улогата на САД, изјави дека Украина соработува со американските служби „исклучиво за своја одбрана“, нагласувајќи дека успехот во нападите се должи и на технолошките подобрувања и зголеменото домашно производство на дронови и проектили.

Украинската служба СБУ неодамна објави дека нејзините дронови успешно погодиле рафинерија во Уфа, на 1.400 километри од границата, објект што снабдува руски воени сили. Според нив, нападите имаат за цел да го ослабнат воениот и економскиот потенцијал на Русија.

Според проценките, до септември се погодени најмалку 16 од 38 руски рафинерии, што предизвикало намалување на производниот капацитет за повеќе од еден милион барели дневно и го натерало Кремљ да го ограничи извозот на дизел.

Портпаролот на Кремљ Дмитриј Песков изјави дека е „очигледно“ оти САД и НАТО редовно ѝ обезбедуваат разузнавачка поддршка на Украина, додека Белата куќа тврди дека Трамп се обидува да стави крај на војната, а не да ја ескалира.

Засега не е донесена одлука дали Вашингтон ќе ѝ испорача на Украина далекуметни ракети како Tomahawk, но Зеленски потврди дека таа можност активно се разгледува.

Свет

Зеленски: Подготвени се клучните документи за безбедносни гаранции и обновата на Украина

Претседателот на Украина, Владимир Зеленски, соопшти дека преговарачкиот тим се враќа од Мајами и дека деталите од разговорите ќе бидат познати во текот на утрешниот ден. Според него, за почетните нацрт-документи е направено сè што било потребно.

Зеленски истакна дека планот содржи 20 точки и дека, иако не е сè совршено, рамката веќе е поставена. Предвидени се безбедносни гаранции меѓу Украина, европските партнери и Соединетите Американски Држави, содржани во рамковен документ, како и посебен билатерален документ со САД за безбедносни гаранции.

Тој нагласи дека билатералниот документ ќе треба да биде разгледан од Конгресот на САД, при што одредени детали и анекси ќе останат класифицирани. „Во овој момент, сето тоа изгледа цврсто и достоинствено“, рече Зеленски, додавајќи дека станува збор за работни нацрти подготвени од украинската војска во соработка со САД.

Претседателот оцени дека фактот што документите се развиени заеднички со САД покажува дека страните се многу блиску до реален исход. Паралелно, се подготвува и првиот нацрт-документ за обновата на Украина, кој ќе ја дефинира економската стратегија.

„Јадрото на сите документи е подготвено. Постојат работи што ние не сме подготвени да ги прифатиме, како и работи што, сигурен сум, Русија не е подготвена да ги прифати“, изјави Зеленски. Тој додаде дека американската страна продолжува со разговорите со руските претставници и дека Украина ќе добие повратни информации по тие средби, при што од украинска страна сите потребни информации веќе се доставени.

Свет

Орбан предупредува: Украина падне ли, Унгарија ризикува катастрофа

Унгарскиот премиер Виктор Орбан изјави дека евентуален колапс на Украина би имал сериозни и негативни последици за Унгарија, нагласувајќи дека Будимпешта има силен интерес да спречи такво сценарио. Пораката ја испрати за време на говор во Сегед, во рамки на неговата предизборна турнеја, пренесува Euronews.

„Не треба да се залажуваме – падот на Украина би бил катастрофа за Унгарија. Тоа не е во наш интерес и мора да направиме сè што можеме за да не се случи“, порача Орбан пред своите поддржувачи, ставајќи акцент на надворешната политика.

Својот став тој го илустрираше со споредба од секојдневниот живот, посочувајќи дека вредноста и стабилноста на една држава, како и кај земјиштето, не зависат само од нејзината состојба, туку и од состојбата на соседите и од тоа кој живее таму.

Орбан истакна дека Украина во голема мера зависи од Унгарија во енергетскиот сектор, наведувајќи дека 44 отсто од електричната енергија и 56 отсто од природниот гас што ги користи доаѓаат преку Унгарија, при што значителен дел од тие ресурси имаат руско потекло. Овие податоци унгарските власти ги користат и како аргумент против критиките за блиските односи со Русија.

Говорејќи за војната, Орбан повтори контроверзен став, оценувајќи дека е „тешко да се каже кој кого нападнал“, што е во спротивност со доминантниот меѓународен став за руската инвазија врз Украина. Тој, исто така, оцени дека испраќањето воена помош за Киев само го продолжува конфликтот и, според него, не придонесува за интересите на Украина.

Свет

Убиен висок руски офицер: Безбедносните служби на терен

Смртта на генералoт Фанил Сарваров во Москва претставува „ужасно и брутално убиство“, изјави денес портпаролот на Кремљ, Дмитриј Песков. Тој нагласи дека руските безбедносни служби ќе преземат сè што е неопходно во рамки на истрагата за случајот, пренесува РИА Новости.

Според Руски истражен комитет, Сарваров, кој бил началник на одделот за оперативна обука на Генералштабот на руските вооружени сили, бил тешко повреден кога експлозивна направа поставена под неговиот автомобил детонирала порано денес во Москва. Генералот им подлегнал на повредите на пат кон болница.

Во исто време, Песков ги отфрли тврдењата дека Русија наводно планира обнова на сферите на влијание на поранешниот Советски Сојуз. Тој реагираше на извештај на Ројтерс, кој се повикува на американски разузнавачки извори и тврди дека рускиот претседател Владимир Путин има планови за проширување на руското влијание во Источна Европа.

„Не знаеме колку се веродостојни тие информации. Дури и ако постојат такви извештаи, станува збор за погрешни претпоставки и заклучоци на разузнавачки служби. Тоа апсолутно не е точно“, изјави Песков.