Економија

Ѓорѓиевски најавува подобрување на бизнис-комуникацијата и инфраструктурата во Визбегово

Кандидатот за градоначалник на Скопје, Орце Ѓорѓиевски, оствари конструктивна средба со претставници од бизнис-секторот во индустриската зона Визбегово, заедно со вицепремиерот Изет Меџити и градоначалникот Дарко Костовски.

На средбата се разговараше за предизвиците со кои се соочуваат стопанствениците, како и за тоа како градот и општините можат да ја поддржат нивната работа. Претставниците на бизнис-секторот посочија дека досега наидувале на затворени врати и недостиг на комуникација, проблем што, според Ѓорѓиевски, ќе се реши со неговото доаѓање на чело на градот.

Еден од најголемите предизвици што беше истакнат е пристапот до индустриската зона Визбегово, за кој е потребна итна интервенција. Ѓорѓиевски најави дека завршувањето на клучката кај Момин Поток ќе биде еден од неговите приоритети.

„Визбегово е зона со огромен потенцијал, простор за развој на мали, средни и големи бизниси. Компаниите заслужуваат еднаков пристап, фер третман и вистинско партнерство со институциите“, истакна Ѓорѓиевски.

Средбата, според него, е само почеток на отворен и искрен дијалог меѓу градот и стопанството, кој ќе донесе резултати, развој и нови перспективи за Скопје.

Економија

МБИ10 со пад од 0,42%, вкупен промет од 75,7 милиони денари

Изготвен од Илирика Инвестментс АД Скопје врз основа на официјални податоци од Македонска берза.

На берзанската сесија од 23 декември 2025 година, индексот МБИ10 забележа пад од 0,42%, спуштајќи се на 10.071,87 поени, додека индексот ОМБ остана непроменет на 129,44 поени. Вкупниот дневен промет изнесуваше 75,7 милиони денари, при што активноста беше концентрирана кај Комерцијална банка, Алкалоид и Македонски Телеком, кои придонесоа за најголемиот дел од реализираниот обем на тргување.

Најтргувани хартии од вредност

● Комерцијална банка АД Скопје (KMB) – 61.096.000 денари (вклучува блок-зделка)

● Алкалоид АД Скопје (ALK) – 2.054.570 денари

● Македонски Телеком АД Скопје (TEL) – 4.830.000 денари

Топ добитници

● Комерцијална банка АД Скопје (KMB) +0,02%

Топ губитници

● Алкалоид АД Скопје (ALK) –0,06%

● Стопанска банка АД Скопје (STB) –2,98%

● Македонски Телеком АД Скопје (TEL) –2,74%

Обврзнички пазар

На денешната сесија беше реализирана една трансакција со државната обврзница „Р. Македонија – денационализација 22“, во износ од 318.930 денари по цена од 94 евра. Сите други државни и корпоративни обврзници останаа без промени во цените, при што индексот ОМБ остана стабилен на 129,44 поени.

На берзанската сесија од 23 декември 2025 година, пазарот беше активен, со висок вкупен промет од 75,7 милиони денари, главно поради блок-зделката со акциите на Комерцијална банка. Индексот МБИ10 забележа пад од 0,42%, поттикнат од негативните движења кај Македонски Телеком, Стопанска банка и Алкалоид, додека Комерцијална банка и покрај минималниот раст остана најликвидна хартиија од вредност. Обврзничкиот пазар беше слабo активен, со една реализирана трансакција и непроменет индекс ОМБ.

Економија

Бислимовски потврдува: Струјата поскапува

По барање на „ЕВН Хоум“, Регулаторната комисија за енергетика (РКЕ) донесе одлука за поскапување на електричната енергија. Според прес-конференцијата на претседателот на РКЕ, Марко Бислимовски, за првиот тарифен блок цената ќе расте за 2,45%, вториот блок за 2,87%, третиот за 3,33%, а четвртиот блок дури за 3,84%.

За евтината тарифа, РКЕ одлучи зголемување од 2,5%.

Бислимовски истакна дека одлуката е донесена по внимателна анализа и се однесува на сите домаќинства, со цел да се усогласат трошоците на електричната енергија со пазарните услови.

Економија

Домашните компании добиваат нова инјекција: 14,2 милиони евра веќе стигнаа до Развојната банка

Министерството за финансии соопшти дека од Буџетот се извршени две нови исплати кон Развојната банка, во вредност од 305 и 568 милиони денари, односно вкупно 873 милиони денари, што изнесува околу 14,2 милиони евра.

Со овие трансакции, вкупната државна поддршка за домашната економија достигна 217,5 милиони евра, од вкупно планираните 250 милиони евра.

Средствата се обезбедени преку кредитна линија од унгарската Експорт-импорт банка, а целта е да се стимулира растот на домашните компании преку поволни услови за инвестирање и развој. Финансирањето се одобрува преку деловните банки, со каматна стапка од 1,95% годишно, рок на отплата до 15 години и грејс период до 3 години.

Министерството за финансии истакнува дека вкупниот буџет за поддршка на домашните компании изнесува 250 милиони евра, додека проценетата вредност на инвестицискиот циклус изнесува околу 300 милиони евра.